Skip to Content

Club de Ciencia

Club de Ciencia

 

Os experimentos e actividades científicas permiten aos nenos e adolescentes desenvolver a súa creatividade e iniciativa, agudizar o seu sentido crítico e darlle unha maior significación á aprendizaxe das ciencias.

 

 A finalidade do club de ciencia é auxiliar ao alumno para afirmar e profundar os seus coñecementos teóricos por medio de experiencias totalmente prácticas, ademais de contribuír a formar unha disciplina con base no método científico, fundamental no mundo que o rodea.

 

No curso 2018-2019 o CEIP Plurilingüe Ben-Cho-Shey solicita a participación no programa da Consellería "Club de Ciencia" coa proposta de levar a cabo esta actividade co alumnado de 4º curso de Educación Primaria fora do horario lectivo.

 

As mestras que participan nesta iniciativa son:

 

  • Meli Cachaldora Álvarez
  • Ángela Guede Mojón
  • Isabel Blanco Pumar (coordinadora)

 

No curso 2019-2020 continuamos participando no programa da Consellería "Club de Ciencia" coa proposta de levar a cabo esta actividade co alumnado de 5º e 6º curso de Educación Primaria fora  do horario lectivo. Ademais das mestras que xa participaban no club únese Nancy Fernández Cid.

 

Na seguinte ligazón podedes ver máis información sobre o programa e a resolución definitiva na que se inclúe o noso centro.

 

https://www.edu.xunta.gal/portal/es/node/25227

 

 

 

 

 

Experimentos caseiros

Na casa tamén aproveitamos para facer experimentos diversos con produtos que temos na nosa cociña como ovos, vinagre, sal, azucre, especias...

Aprendemos sobre a densidade, a tensión superficial da auga e a presión.

Álbum: STEM 2020-2021 -> Experimentos caseiros

Obradoiro CSI Galiciencia

Participamos no obradoiro CSI de Galiciencia. Empregando os kits que nos enviaron tivemos que resolver unha misteriosa desaparición. Para iso aprendemos a recoller e clasificar probas, extraer pegadas dactilares e analizalas, identificar rastros ocultos con luz ultravioleta, analizar cromatograficamente mostras de bolígrafos, elaborar un retrato robot e analizar rastros de sangue e pegadas de zapatos. 

Álbum: STEM 2020-2021 -> Obradoiro CSI Galiciencia

Saída á Chaira

Como actividade final do proxecto sobre o cambio climático saímos ao monte da Chaira a observar o entorno que nos rodea. Tamén aproveitamos para gravar un vídeo coa canción da campaña “Sing for the Climate”.

Álbum: STEM 2020-2021 -> Saída á Chaira

Cambio climático

Tendo en conta os obxectivos de desenvolvemento sostible e a campaña de Scientix centrada neste curso na Sostibilidade e na Cidadanía levamos a cabo un proxecto en inglés no que o alumnado aprendeu a través de vídeos e distintas tarefas sobre o cambio climático e debatiron e propuxeron ideas para mellorar a situación. Finalmente deseñaron na materia de plásticas un cartaces para concienciar á comunidade do cambio climático e da necesidade de coidado o medio no que vivimos.

Álbum: STEM 2020-2021 -> Cambio climático

Electrización

Investigamos sobre o proceso de paso de carga eléctrica de un corpo a outro corpo utilizando un bolígrafo e anacos de papel.

Álbum: STEM 2020-2021 -> Electrización

O sistema respiratorio con Ozobot

Empregando o robot Ozobot os alumnos de 5º  fixemos unha representación do camiño que fai o osíxeno polo corpo humano. Con rotuladores de distintas cores deseñamos o circuítos para que o Ozobot co módulo seguiliñas fose seguindo as distintas ordes.

Álbum: STEM 2020-2021 -> Ozobot

Condutividade

Con distintos obxectos comúns (clip, escarvadentes, goma...) fixemos as nosas hipóteses sobre que materiais eran condutores da electricidade e cales non. Despois comprobamos as nosas hipóteses empregando a placa Makey Makey, engadimos os materiais e obxectos a nosa táboa de condutores e illantes e probamos con outros obxectos da clase.

Álbum: STEM 2020-2021 -> Materiais illantes e condutores

Día da Muller na Ciencia

Para celebrar este día tivemos a visita de María a Tifoidea que veu do pasado para contarnos a súa historia e explicarnos a importancia da hixiene e do coidado persoal na transmisión de bacterias.

O alumnado aprendeu a crear un caldo de cultivo e tomar mostras. Neste caso para comprobar a diferencia existente entre mans lavadas sen xabón e mans sucias tomáronse mostras de varios alumnos en distintos tarros de cristal e deixáronse algún días en repouso. O alumnado puido observar a contaminación na mostra das mans máis sucias con respecto a das mans que se lavaran coidadosamente con xabón.

Nesta sesión do Club os alumnos tamén aprenderon sobre distintas mulleres científicas e fixeron un xogo de emparellamento para familiarizarse con elas.

Álbum: STEM 2020-2021 -> Día da muller na ciencia

Circuíto eléctrico

Nesta actividade aprendemos a facer un circuíto eléctrico cunha pila de botón, un LED e cinta de cobre. Aproveitamos o circuíto para crear unha postal de Nadal na que o facer presión nunha esquina da postal prendíase unha luz na árbore.

Álbum: STEM 2020-2021 -> Circuito eléctrico
Distribuir contido


by Dr. Radut