O conselleiro de Cultura, Educación e Ordenación Universitaria, Román Rodríguez, participou esta mañá na xornada ‘Un colexio intelixente’, organizada polo Instituto Galego do TDAH e Trastornos Asociados para afondar nesta materia desde un punto de vista educativo. O encontro, que se celebra na Facultade de Psicoloxía da Universidade de Santiago de Compostela, desenvolverase ao longo da mañá e terá como relatores a expertos no Trastorno por Déficit de Atención e Hiperactividade, entre eles o propio presidente de INGADA, Ángel Carracedo.

Durante a súa intervención o titular do departamento educativo da Xunta salientou a conexión deste encontro coa política educativa do Goberno galego, que trata a diversidade como un valor, promovendo espazos de inclusión para todo o alumnado, de tal forma que poidan desenvolver todo o seu potencial. Neste sentido, lembrou que é necesaria a unión de forzas para avanzar neste camiño de integración, no que o sistema educativo debe actuar como referente social, contribuíndo á formación dunha sociedade libre, democrática, tolerante e pacífica.

A encargada da presentación das xornada foi a vicepresidenta da Fundación INGADA, a doutora Elvira Ferrer. O acto contou tamén coa presenza de representantes da Facultade de Psicoloxía, da concelleira de Xustiza Social e Coidados do Concello da Coruña, Silvia Cameán; e do concelleiro de Educación e Cidadanía de Santiago, Manuel Dios.

Expertos relatores

Tras a intervención do conselleiro, Ángel Carracedo ofrecerá un percorrido polas fortalezas e debilidades dos diferentes sistemas educativos, e Teresa Caramés, docente nun centro educativo en Ferrol, exporá propostas para avanzar cara un novo modelo de escolas baseado na educación das diferentes intelixencias humanas.

Pola súa banda, a doutora Mª Jesús Mardomingo, do Hospital Gregorio Marañón, presentará o ‘Tratado de Psiquiatría do neno e do adolescente’, unha ampla exposición da historia desta disciplina, os avances da investigación nas últimas décadas, as súas aplicacións á práctica clínica e as perspectivas de futuro.

Tratamento do TDAH

A participación da Consellería nestas xornadas enmárcase no convenio asinado o pasado mes de setembro, a través do cal as Fundacións María José Jove e Ingada renovaron a súa colaboración co obxectivo de seguir formando ao profesorado para o tratamento do alumnado con TDAH. Ao abeiro do mesmo, ao longo deste primeiro trimestre de curso escolar proporciónase formación a 200 docentes de Educación Primaria, Educación Secundaria Obrigatoria e Bacharelato.

Así mesmo, complementa o convenio asinado coa Federación Galega de Asociación de Persoas con Trastorno por Déficit de Atención e Hiperactividade (DEGADAH) para o desenvolvemento de accións e actividades dirixidas á mellora da atención educativa deste alumnado.

Cómpre sinalar, en calquera caso, que todas as actuacións neste sentido toman como referencia o Protocolo de consenso sobre TDAH na infancia e na adolescencia nos ámbitos educativo e sanitario, elaborado pola Xunta de Galicia.

O conselleiro de Cultura, Educación e Ordenación Universitaria, Román Rodríguez; e a presidenta de UNICEF Comité Galicia, Myriam Garabito Cociña, asinaron hoxe un convenio de colaboración ao abeiro do que ambas as entidades colaborarán na difusión nos centros de ensino dos dereitos da infancia e da cidadanía en xeral.

Unha vez formalizado o convenio, a Consellería incluirá no portal educativo (http://www.edu.xunta.gal/portal/) un enlace desde o que se poderá acceder directamente á información relacionada con dereitos dos nenos e nenas e da cidadanía global no web de UNICEF. Así mesmo, a Administración educativa fomentará a celebración dentro do calendario escolar do ‘Día Universal da Infancia’ o 20 de novembro. De forma parella, promoverase a inclusión destas materias no proxecto educativo dos centros e a formación do profesorado ao respecto.

Pola súa banda, UNICEF comprométese a facilitar o acceso gratuíto aos devanditos materiais no seu web, así como a poñer a disposición dos centros interesados materiais de autoavaliación institucional sobre dereitos da infancia e a cidadanía. Asemade, poderá ofertarlles aos docentes as accións de formación que organiza en colaboración coa Universidade Nacional de Educación a Distancia (UNED).

Con este acordo como base, a Consellería e UNICEF poderán subscribir convenios específicos, en caso de considerarse necesarios para abordar asuntos e materias concretas.

A Consellería de Cultura, Educación e Ordenación Universitaria e a Asociación de Familias de Persoas con Parálise Cerebral (APAMP) veñen de intensificar a súa colaboración co obxectivo de poñer en marcha medidas específicas de apoio educativo dirixidas ao alumnado con necesidades especiais de Vigo e a súa área de influencia. O conselleiro Román Rodríguez e mailo presidente de APAMP, Daniel Varela Lago, asinaron hoxe un convenio para avanzar na liña de garantir a atención á diversidade do alumnado.

Un dos principais puntos de actuación serán os plans de formación do profesorado que promove a Consellería. De feito, e a raíz deste acordo, tamén se vai contar co apoio de especialistas da APAMP co fin de tratar ao alumnado con parálise cerebral e afíns. 

Deste xeito, o departamento educativo da Xunta e a citada Asociación colaborarán na sensibilización e na difusión de materiais e documentos que permitan un maior coñecemento das circunstancias específicas asociadas ao alumando con este tipo de necesidade. Así mesmo, o persoal de APAMP poderá prestar o seu apoio nos centros docentes que teñan escolarizado a alumnado con parálise, prestando asesoramento tanto ao profesorado, como aos alumnos e ás súas familias. Tamén poden orientar sobre metodoloxías axeitadas a aplicar así como realizar aportacións sobre as adaptacións curriculares que se estimen necesarias.

A colaboración dos especialistas desta Asociación cos centros educativos farase sempre dentro dos termos organizativos e de xestión acordados ca dirección de cada centro e haberá una persoa que se encargará da coordinación das accións que se desenvolvan.

Coa sinatura deste convenio, o Goberno galego da un paso máis cara unha escola inclusiva, na que se teña en conta a atención á diversidade do alumnado, e se dispoña dos mecanismos axeitados para dar respostas ás necesidades de apoio educativo de determinados colectivos. No acto estiveron tamén presentes o subdirector xeral de Ordenación e innovación educativa e formación do profesorado, Manuel Vila; e o xefe territorial da Consellería na provincia de Pontevedra, César Pérez Ares.

A Consellería de Cultura, Educación e Ordenación Universitaria e a Federación Galega de Asociacións de Persoas con Trastorno por Déficit de Atención e Hiperactividade (FEGADAH), colaborarán no desenvolvemento de accións e actividades dirixidas á mellora da atención educativa ao alumnado con TDAH en Galicia.

Así se reflicte no convenio de colaboración asinado hoxe entre o conselleiro de Cultura e Educación, Román Rodríguez, e a presidenta de FEGADAH, Montserrat Álvarez Rodríguez, que ten como finalidade sumar esforzos tanto no que se refire á atención aos alumnos e alumnas con esta problemática coma no eido de formación do profesorado e do asesoramento e atención ás familias de rapaces e rapazas con TDAH.

Deste xeito, dentro das actividades de formación permanente do profesorado deseñadas pola Consellería de Cultura e Educación, esta promoverá -en colaboración coa FEGADAH- modalidades formativas específicas no que atinxe á atención á diversidade e na formación do profesorado que atende a alumando con TDAH. Ambas institucións tamén colaborarán na sensibilización e na difusión de materiais e documentos que permitan un maior coñecemento das circunstancias asociadas ao TDAH no eido educativo.

Para tal fin, a Consellería facilitará que os profesionais da Federación poñan os seus coñecementos a disposición dos centros docentes. É dicir, que presten asesoramento na atención educativa dos alumnos con Trastorno por Déficit de Atención, que orienten sobre metodoloxías axeitas no caso destes alumnos, e sobre as adaptacións curriculares que se estimen necesarias.

Non obstante, tendo en conta a autonomía pedagóxica, organizativa e de xestión dos centros docentes, será a dirección do centro, o persoal especializado da Federación e as familias de alumnado con TDAH quen establezan os termos específicos de colaboración para cada centro concreto. Deste xeito, o profesorado titor (ou o que designe a dirección do centro) será o responsable de coordinar as posibles actuacións concretas das persoas especialistas da FEGADAH en cada un dos casos, así como de manter informada a cada unha das familias.

Por tanto, tal como se especifica no convenio, a actuación dos profesionais da Federación nos centros docentes estarán baseados no principio do colaboración entre todas as persoas que atenden a un mesmo alumno ou alumna. Trátase, deste modo, de facilitarlle unha atención educativa inclusiva e axustada á súa particular forma de ser e de aprender.

A Consellería de Cultura, Educación e Ordenación Universitaria, e as Fundacións María José Jove e Ingada (Instituto Galego do TDAH) renovaron hoxe a súa colaboración co obxectivo de seguir formando ao profesorado para o tratamento do alumnado con Trastorno por Déficit de Atención e Hiperactividade (TDAH).

Ao abeiro do convenio asinado en outubro do ano pasado para establecer esta liña de cooperación, o conselleiro Román Rodríguez; a presidenta da Fundación María José Jove, Felipa Jove; e o presidente de Ingada, Ángel Carracedo, rubricaron hoxe unha addenda a través da cal se amplía esta colaboración ao curso actual.

Tralo balance positivo desta primeira experiencia –na que participaron 187 profesores de 168 centros educativos galegos–, as tres institucións acordan agora ampliar este programa formativo co fin de dotar aos docentes do coñecemento necesario sobre este trastorno para facilitarlles a súa abordaxe nas aulas, favorecendo así tamén o desenvolvemento e integración dos nenos e nenas con esta problemática.

Neste sentido, o conselleiro definiu este convenio como un “paso fundamental para seguir avanzando na atención á diversidade do alumnado”, coa que a Xunta, segundo salientou, está comprometida. Ademais, lembrou que o Executivo galego, a través dos departamentos de Educación e Sanidade, foi pioneiro á hora de presentar o primeiro protocolo a nivel autonómico que avanza na prevención e na atención temperá deste trastorno.

Destinado a 200 docentes

O novo curso formativo estará destinado a 200 docentes de Educación Primaria, Educación Secundaria Obrigatoria e Bacharelato, impartirase durante o primeiro trimestre do actual curso académico 2015-2016 e constará de 25 horas de formación teórica e práctica. Ademais, cada un dos asistentes deberá realizar un proxecto final, que terá que ser aprobado polo equipo docente do curso.

Tal e como queda reflectido no convenio, ambas as dúas fundacións encargaranse de organizar o curso de formación, mentres que a Consellería difundirá a actividade entre o profesorado e, así mesmo, ofrecerá o soporte técnico necesario para levala a cabo a través da Rede de Formación Permanente do Profesorado.

Con motivo da presentación do número dezanove da revista Maremagnum, o conselleiro de Cultura, Educación e Ordenación Universitaria, Román Rodríguez, recordou o esforzo do seu departamento e de toda a comunidade educativa con respecto á atención á diversidade, regulada mediante decreto e que, posteriormente, favoreceu o nacemento da Rede Galega de Atención Temperá.

Así o lembrou o titular do departamento educativo da Xunta de Galicia durante a presentación desta publicación, editada pola Federación Autismo Galicia e especializada nos Trastornos do Espectro do Autismo (TEA). Neste senso, Román Rodríguez felicitou a todos os que fan posible a revista, que conta co apoio da Consellería, así como á Federación polos seus vinte anos en activo. Tal e como destacou, iniciativas coma esta permitirán rematar cos datos de desemprego que se rexistran neste colectivo.

A maiores do conselleiro –que estivo acompañado polo presidente da Federación Autismo Galicia, Antonio de la Iglesia; e o vicepresidente do organismo e tamén director da revista, Cipriano Luís Jiménez– ao acto tamén asistiu o secretario xeral de Política Lingüística, Valentín García; e a secretaria xeral de Política Social, Coro Piñeiro.