A Consellería de Cultura, Educación e Ordenación Universitaria asinará un convenio de colaboración con Autismo Ourense para a prestación do servizo de transporte escolar, de tal forma que se eleva a 200 o número de alumnas e alumnos aos que o departamento educativo da Xunta de Galicia facilita este servizo complementario adaptado. Neste sentido cómpre lembrar que no Consello da Xunta do pasado 25 de xuño aprobouse a sinatura de convenios con outras 8 asociacións para este mesmo fin que, xunto co hoxe aprobado, sumarán un investimento de máis de 533.000 euros en transporte adaptado.

Trátase de escolares con distintos tipos de discapacidades que precisan nos seus traslados ao centro educativo dunha atención específica e personalizada, de acordo coas súas necesidades físicas e psíquicas particulares. Así, os convenios cobren os desprazamentos de ida e volta desde os domicilios dos rapaces aos seus centros escolares, así como a ou desde os centros en que reciban tratamento rehabilitador, cando este coincida co horario escolar. Ademais, o servizo obxecto do convenio estará adaptado ás necesidades horarias das alumnas e alumnos, moitas veces condicionadas polos tratamentos médicos que necesitan.

Ao abeiro destes convenios, as devanditas asociacións comprométense a facilitar os desprazamentos cos vehículos adaptados que sexan necesarios, así como a prestar os pertinentes servizos especializados de acompañamento e atención ao alumnado trasladado. Pola súa banda, a consellería farase cargo do 80% do gasto derivado da prestación destes servizos.

Os acordos encádranse no compromiso do departamento educativo da Xunta de Galicia coa atención á diversidade do alumnado galego, garantindo o acceso á educación dun sector da poboación escolar galega que require una atención específica e preferente.

O conselleiro de Cultura, Educación e Ordenación Universitaria, Román Rodríguez, asinou hoxe dous convenios coa Organización Nacional de Cegos Españois (ONCE), a través dos que se lle facilita o acceso á escolarización ao alumnado galego atendendo á súa diversidade e ás súas necesidades específicas e mais favorecendo a inclusión educativa.

Un destes acordos terá como finalidade a transcrición, a gravación e a adaptación de libros editados en lingua galega solicitados polos seus afiliados, coa finalidade de facilitar e fomentar entre os seus membros a lectura, o estudo e o traballo en galego co pleno respecto á normativa sobre propiedade intelectual. O outro refírese á contratación de seis profesores pertencentes ao corpo de mestres, especializados na atención do alumnado con cegueira ou discapacidade visual grave.

O acto de sinatura celebrouse esta tarde no Centro de Recursos educativos da ONCE en Pontevedra, que o conselleiro tivo a oportunidade de percorrer acompañado polo director do centro, José Ángel Abraldes; polo delegado territorial da organización, Manuel Martínez Pan; e polo presidente do Consello territorial de Galicia, Carlos Fernández Lamigueiro.

Normalización lingüística

En prol da implantación do uso do galego en todos os ámbitos sociais, ambas as dúas entidades rubricaron o acordo de colaboración para desenvolveren durante o ano en curso un programa de normalización lingüística no que se inclúen diversas actuacións de interese xeral para impulsar a promoción do uso da lingua galega desde a ONCE.

Coa sinatura deste convenio, a ONCE adaptará ao braille e traducirá ao galego, como mínimo, cinco dos libros de texto que sexan solicitados polos seus afiliados e contará coa colaboración e o asesoramento técnico (lingüístico e terminolóxico) da Secretaría Xeral de Política Lingüística no desenvolvemento das actividades recollidas no acordo. Pola súa banda, a Secretaría Xeral de Política Lingüística porá á disposición da ONCE materiais destinados á aprendizaxe do idioma propio de Galicia.

Docentes especializados

O segundo acordo supón a renovación da colaboración para prestar atención personalizada a alumnos con discapacidade visual, a través da contratación de seis profesores pertencentes ao corpo de mestres, especializados na atención do alumnado con cegueira ou discapacidade visual grave, que se integrarán nos equipos específicos da ONCE. Deste acordo veranse beneficiados no curso 2015/2016 un total de 357 estudantes de educación primaria e mais de 1º e 2º da ESO de toda Galicia.

O convenio supón un claro apoio ao labor educativo desenvolvido pola ONCE que, pola súa parte, pon a disposición do alumnado mestres, traballadores sociais, psicólogos, un pedagogo, persoal técnico de rehabilitación, persoal instrutor tiflotécnico, animadores socioculturais, un coordinador deportivo, especialistas en núcleos periféricos, especialistas de emprego, especialistas de música e un mestre destinado á investigación e á formación.

O acordo contempla tamén a colaboración para a transcrición e gravación a braille dos libros de texto e dos materiais curriculares.

O conselleiro de Cultura, Educación e Ordenación Universitaria, Román Rodríguez González, participou hoxe no acto de entrega da certificación de calidade AENOR á Asociación de Familias de Persoas con Discapacidade Psíquica das Comarcas do Barbanza e Noia “AMICOS”, un acto co que se recoñece o labor desta entidade en prol da inclusión destas persoas.

O conselleiro salientou o importante traballo que desenvolve AMICOS no eido educativo, a favor da escolarización inclusiva do alumnado con este tipo de discapacidades. Neste sentido lembrou que se acaba de aprobar a sinatura dun convenio a través do cal a Consellería achegará máis de 66.000 euros a esta entidade para apoiar o servizo de transporte escolar adaptado que prestará o vindeiro curso a 18 alumnas e alumnos.

Ao abeiro deste acordo, cóbrense - en vehículos adaptados- os desprazamentos de ida e volta desde os domicilios dos rapaces aos seus centros escolares, así como a ou desde os centros en que reciban tratamento rehabilitador, cando este coincida co horario escolar. Igualmente, o servizo obxecto do convenio estará adaptado ás necesidades horarias das alumnas e alumnos, moitas veces condicionadas polos tratamentos médicos que estes necesitan. Ademais, préstanse os pertinentes servizos especializados de acompañamento e atención ao alumnado trasladado.

Neste sentido o conselleiro sinalou que a colaboración do seu departamento con AMICOS, así como con outras entidades especializadas neste eido, encádrase no compromiso da Xunta de Galicia coa atención á diversidade do alumnado galego, garantindo o acceso á educación dun sector da poboación escolar galega que require una atención específica e preferente.

Ademais do conselleiro, participaron neste acto o director de AENOR Galicia, Martín Pita López ; o alcalde de Ribeira, Manuel Ruiz Rivas; e mais familias das persoas atendidas pola asociación.

Educación e servizo asistencial

AMICOS é unha entidade sen ánimo de lucro que ten como fin estatutario a defensa dos intereses das persoas discapacitadas, a fin de acadar a máxima atención social á problemática que presentan, así como a súa propia recuperación, rehabilitación e integración na sociedade. Non en balde, no 2014 acadou a inserción laboral de máis de 50 persoas.

A asociación atende a diario a máis de 100 persoas a través das instalacións que xestiona na bisbarra do Barbanza, que desenvolven funcións de centro de educación especial e unidade de atención temperá, centro de día, residencial, ocupacional e unidade de formación pre-laboral. Así mesmo, dispoñen dun Bio Centro de cultivo ecolóxico, viveiros e xardinería, dun Eco viveiro, e dun piso tutelado no que promoven e facilitan a autonomía das persoas con este tipo de discapacidade.

O secretario xeral técnico da Consellería de Cultura, Educación e Ordenación Universitaria, Jesús Oitavén Barcala; participou hoxe no acto de conmemoración do XX aniversario da Asociación de Altas Capacidades de Galicia (ASAC), onde salientou o compromiso da Xunta coa atención á diversidade do alumnado. Neste sentido, sinalou que o Decreto 229/2011, elaborado polo actual Goberno galego, articula os recursos necesarios para que todos os estudantes reciban unha atención que teña en conta tanto as súas potencialidades como as súas necesidades educativas. “Trátase de dar unha resposta educativa axustada ao alumnado con altas capacidades, desde o marco dunha escola inclusiva e coa implicación activa do seu profesorado”, dixo.

Oitavén Barcala destacou, así mesmo, o labor desenvolvido por ASAC nestes vinte anos de traxectoria informando á sociedade, ás familias e ao profesorado das peculiaridades das nenas e nenos con altas capacidades intelectuais. “Falar de altas capacidades intelectuais é facelo dun alumnado potencialmente brillante, que precisa apoio e estímulos adaptados ao seu potencial de aprendizaxe. Do contrario -dixo- estámonos arriscando á presenza do fracaso escolar”. O representante de Cultura e Educación avogou así por unha implicación activa da Administración educativa, das familias, do profesorado, do propio alumnado e da conxunto da sociedade para acadar o mellor dos sistemas educativos.

No acto participaron, ademais do secretario xeral técnico, o presidente de ASAC, Manuel Campos; e familias e nenos membros da asociación.

Estímulo de capacidades

ASAC é unha asociación sen ánimo de lucro que naceu como lugar de encontro das familias de nenas e nenos con alta capacidade intelectual, e que ten como sede a Facultade de psicoloxía da Universidade de Santiago de Compostela. Na actualidade conta con preto de 300 socios e desenvolve unha ampla actividade dirixida a estimular as potencialidades e habilidades sociais das rapazas e rapaces participantes, así como a dar orientación e formación aos seus pais e nais.

A Consellería de Cultura, Educación e Ordenación Universitaria facilitará no vindeiro curso 2015/2016 o servizo de transporte adaptado a 192 alumnas e alumnos con discapacidades e o de comedor escolar a outros 297, ao abeiro das sinatura de convenios de colaboración con asociacións especializadas na atención a estas persoas. Para iso, o Consello da Xunta deu hoxe o visto e prace á sinatura destes convenios, que suporán un investimento de case 635.000 euros.

Os acordos encádranse no compromiso do departamento educativo da Xunta de Galicia coa atención á diversidade do alumnado galego, garantindo o acceso á educación dun sector da poboación escolar galega que require una atención específica e preferente. Neste sentido, cómpre tamén sinalar o carácter educativo que para este alumnado con distintos tipos de discapacidades ten o comedor escolar, en canto ao aprendizaxe de habilidades que redunden nunha maior autonomía persoal e, polo tanto, nunha maior inclusión.

Transporte adaptado

No referido ao servizo de transporte, a colaboración producirase coa Asociación Comarcal de Educación Especial Santísimo Cristo del Amor (ACEESCA), coa Asociación de Atención á Parálise Cerebral e Afíns (AMENCER-ASPACE), coa Asociación de Familias de Persoas con Discapacidade Psíquica das Comarcas do Barbanza e Noia (AMICOS), coa Asociación de Pais de Persoas con Parálise Cerebral- A Coruña (ASPACE-Coruña), coa Asociación a favor das Persoas con Discapacidade Intelectual da Provincia de Pontevedra (ASPANAEX), coa Asociación Pro Persoa cons Discapacidade Intelectual de Galicia (ASPRONAGA), con Baión Asociación para o Tratamento do Autismo (BATA), e coa Asociación BS ‘A Esperanza do Val Miñor’.

Trátase de escolares con distintos tipos de discapacidades que precisan nos seus traslados ao centro educativo dunha atención específica e personalizada, de acordo coas súas necesidades físicas e psíquicas particulares. Así, os convenios cobren os desprazamentos de ida e volta desde os domicilios dos rapaces aos seus centros escolares, así como a ou desde os centros en que reciban tratamento rehabilitador, cando este coincida co horario escolar. Ademais, o servizo obxecto do convenio estará adaptado ás necesidades horarias das alumnas e alumnos, moitas veces condicionadas polos tratamentos médicos que estes necesitan. Ao abeiro dos convenios, as devanditas asociacións comprométense a facilitar os desprazamentos cos vehículos adaptados que sexan necesarios, así como a prestar os pertinentes servizos especializados de acompañamento e atención ao alumnado trasladado. Pola súa banda, a consellería farase cargo do 80% do gasto derivado da prestación destes servizos. O servizo contará co apoio de 36 auxiliares e será prestado por 35 condutores.

Comedor escolar

No caso do comedor, asinaranse convenios para subvencionar este servizo a 297 alumnas e alumnos con discapacidade, en concreto con AMENCER-ASPACE, con ASPACE-CORUÑA, con ASPANAES, con ASPRONAGA, coa Fundación MENELA e coa Asociación Nuestra Señora de Chamorro.