2018-2019

A finais do mes de marzo, o persoal da Biblioteca Escolar do IESP Pedra da Aguia asistiu ás Xornadas de Encontro das BE de Galicia. Sempre atopamos inspiración no labor de tanto profesorado que traballa na dinamización das biblios dos centros de ensino. Como sorpresa nesta edición, a ponencia de Alicia Sellés titulada “Bibliotecas e Axenda 2030, tamén na escola” tratou sobre o rol clave que estas xogan para o acceso á información e, por tanto, para o desenvolvemento das comunidades no contexto dos ODS 2030 da ONU.

A nosa biblioteca sábeo ben e por iso é parte importante do traballo interdisciplinar que estamos a desenvolver no Plan Proxecta deste ano, O Mundo que Queremos.

O Día de Europa, 9 de maio, celebrámolo no Instituto cun simulacro electoral. Os nosos embaixadores júnior formaron catro grupos políticos, escribiron aos eurodeputados para se informar dos temas propostos e fixeron carteis publicitarios para pedir o voto para cadansúa formación. Finalmente, as votacións realizáronse o 9 de maio na entrada do centro en dúas mesas habilitadas para o momento, unha para que votara o alumnado e outra para que o fixeran o persoal do centro, os pais e quen se inscribira no censo. Gañou a opción conservadora, con Jéssica Blanco como cabeza de lista. Pero o resultado foi o de menos. O que se pretendía era que os rapaces aprenderan como funciona a maquinaria electoral e a importancia de exercer o dereito a voto, sobre todo de cara ao 26 de maio cando coinciden comicios locais e europeos.

Máis info en El Correo Gallego, La Voz de Galicia, Que Pasa na Costa, Avante Toda e Diario Camariñán

Na Semana Santa a actividade dos embaixadores do IESP Pedra da Aguia non cesou, na idea de promocionar o voto para as eleccións do 26 de maio ao Parlamento Europeo. Coa colaboración do concello, que nos facilitou un stand na Mostra Internacional de Encaixe, os embaixadores júnior estiveron repartindo información sobre a UE dende o mércores ata o domingo. Mesmo se elaborou un pequeno cuestionario diario para probar os coñecementos que tiñan os asistentes ao evento sobre Europa.

A actividade seguinte será a simulación dunhas eleccións europeas no propio instituto o día 9 de maio, día de Europa. Con tal motivo, os rapaces crearon 4 grupos políticos e terán que facer campaña no centro para conseguir o maior número de apoios para ese día.