Skip to Content

Segundo trimestre

11F: Día internacional da muller e a nena na ciencia

O 11F conmemórase o Día Internacional da Muller e da Nena na Ciencia.

No noso IES celebrámolo proxectando un vídeo no que varias mulleres científicas responden ás preguntas plantexadas polo noso alumnado.

Esperamos que sirva de inspiración!

Concurso de ilustración polo 8 M

Animámosvos a participar nun novo concurso de ilustración, nesta ocasión, co motivo da conmemoración do 8M, Día internacional da muller.

Apuntádevos na Biblio ata o venres 11 e, así, poderemos titorizar o voso traballo.

O venres 18 recolleranse as ilustracións para envialas a concurso.

Pasa pola Biblio se queres participar!

Semana de celebración polo día da Candeloria

A partir da candeloria, ningunha ave voa soa, di o refrán para lembrar que o mes de febreiro comeza, na cultura popular, cunha celebración ben especial, xa que casan os paxariños, ao que comeza o retorno das aves migratorias e os cortexos preludian o renacer primaveral.

Desde a Biblioteca propoñemos varias actividades para celebrar, entre o 2 e o 9 de febreiro, unha semana de afectos co motivo da Candeloria e do San Valentín:

- Escritura de cartas de afecto.

- Realización de debuxos ou ilustracións.

- Realización de figuras de plastilina.

- Outras manualidades: colares, origami,...

Animádevos a participar nalgunha delas! O material creado servirá de agasallo para a persoa á que queirades demostrar afecto. Para iso, depositádeo en sobre nalgún dos buzóns localizados na entrada do instituto e dende a biblioteca encargarémonos de que o destinatario o reciba o 14 de febreiro. Non esquezades poñer no sobre o seu nome!

Día da Ilustración 2022

Cada 30 de xaneiro, coincidindo coa data de nacemento de Castelao, celébrase o Día da Ilustración.

Sumándose á conmemoración, o alumnado de 2º ESO realizou uns debuxos para o logo do proxecto sobre hábitos de vida saudables, benestar emocional e consumo responsable. Ao longo desta semana poderase votar a través da aula virtual para decidir que ilustración representará finalmente o proxecto.

Podedes ver as propostas na propia aula virtual, na entrada da biblioteca ou no seu blog, Vilán. Éxito aos participantes!

Clubs de encontro na biblioteca

Desde a biblioteca estanse organizando clubs de encontro, nos que o alumnado será o protagonista e o encargado de dirixilos.

Se estades interesados, é o momento de que propoñades un club ou vos sumedes a algunha das propostas dos vosos compañeiros. Na entrada da biblioteca tedes os carteis nos que vos inscribir, deseñados polas voluntarias da biblioteca Judith, Naira e Siomara.

Non perdas a oportunidade de compartir as túas afeccións.

Formación de novos usuarios da biblioteca

Continuamos neste segundo trimestre coa formación de novos usuarios da biblioteca.

Desta vez, o alumnado de 1º ESO aprendeu a buscar no novo catálogo de Koha e a localizar, segundo a súa sinatura, libros e outros fondos nos estantes.

Esperamos que poñan en práctica todo o aprendido!

Distribuir contido


by Dr. Radut