2020-2021

Desde a Biblioteca Escolar e  en colaboración co departamento de Lingua Galega e o EDNLG, organizamos a celebración do día das Letras Galegas 2021 dedicado a Xela Arias.

A autora de Sarria, que destacou polo seu compromiso cívico nas problemáticas do seu tempo, traballou na editorial Galaxia e destacou na tradución ao galego de autores como Roald Dahl, Giani Rodari, Baudelaire ou James Joyce. No entanto, foi o seu traballo como poeta, con obras como Intempériome, Darío a diario ou Denuncia do equilibrio, o seu principal contributo á historia das nosas letras.

No noso instituto, Xela Arias entrou da man dos seus versos para o alumnado ilustralos nunha cartelería creativa, que pendura nos nosos corredores. Alén diso, convocamos o concurso fotográfico "Versos a flor de pel". Cada participante escolleu un verso á vontade para ser "tatuado" de xeito orixinal nalgunha parte do seu corpo e, finalmente, facer unha fotografía artística. Todas elas locen na exposición para o xurado emitir o seu fallo a vindeira semana. Outorgarase un primeiro e segundo premio en vales para o comercio local de Camariñas.

Animádevos a ler a Xela Arias e feliz día das Letras Galegas 2021!

Este mércores 24 de marzo gozamos coa visita de María Lado, a través dun obradoiro de creación poética, que organizou a Biblioteca Escolar no marco do programa Encuentros Literarios promovido polo Ministerio de Cultura y Deporte.

A poeta da Costa da Morte, que fai parte do actual e puxante panorama poético galego, falounos do oficio de poeta e narradora, da súa traxectoria e da creatividade literaria. Na segunda parte do encontro, a través dun recurso dadaísta, o grupo participante de 3ºESO foi compoñendo un poema colectivo sobre a temática eterna: o amor. Con moita picardía e non menos romanticismo, crearon un novo poema a partir de versos alleos. Ao grupo e á poeta non lles faltaron humor e lirismo nunha das poucas actividades presenciais que organizamos este curso a causa da Covid.

Ser Rosalía é un acto de rebeldía, é unha acción política. Cada mirar nos ollos fire coma cen saetas. Non precisamos máis, só mirar. Quen mira a obra de Rosalía entende a muller de vangarda que hai detrás dela, a insubmisa, a creadora do pensamento, a inconformista, a muller valente que elixe a palabra para loitar contra a inxustiza e para crear un país sublime. (Fragmento do manidesto da AELG.)

Dende 2010, o 24 de febreiro conmemórase o nacemento de Rosalía de Castro. Escrita no século XIX, a súa obra mantense vixente, na denuncia da inxustiza social e na reivindicación feminista.