Actividades

O departamento de Filosofía conmemora o Día Internacional dos Dereitos Humanos cunha exposición no corredor da planta baixa do noso centro. En palabras do profesor de Filosofía, Víctor González: "Os dereitos humanos asináronse no ano 1948, tras os desastres da Segunda Guerra Mundial, pero unha cousa é a sinatura, unha mera formalidade, e outra o seu cumprimento, a aparencia vai por unha banda e a verdade pola outra, é a verdade é que o cumprimento da maioría dos dereitos humanos no mundo deixa motio que desexar.
Os filósof@s que ata fai ben pouco acamparon por estes lares, lembraredes, contaron este mito. Foi Platón quen o fixo, e máis ou menos ven a dicir que hai moito tempo houbo uns prisioneiros escondidos nunha caverna, ficaban atados de pes e mans, ata o pescozo o tiñan amarrado, o caso, estou resumindo, é que un deses prisioneiros, o chamaremos Sócrates para identificalo, liberouse das súas cadeas e, tras moitos esforzos, conseguíu saír da caverna para descubrir que fóra había unha realidade, unha luz, un sol, unha verdade da que carecía o interior da caverna, todo aparencia. Espero que a miña versión sexa entendida; Platón, no libro "República", o conta como deus manda.
Dixera Platón o que dixera, estou eu seguro que se Sócrates se liberase das cadeas, hoxe, 2021, case xa 22, cando saíra da caverna, non atoparía o mesmo que atopara o platónico. Sabedes que atoparía?  Volo digo, un decorado, non a verdade e a luz que atopou o outro, non. O meu Sócrates estamparíase contra un decorado... unha farsa, un timo. Os dereitos humanos non deixan de ser iso, un decorado, unha pantalla.... aparencia, como a que había na caverna. Cantos dereitos humanos cúmprense hoxe no mundo?... Aí o deixo.
Porén, no IES de Valga, somos vangarda, como non podía ser de outro xeito. No soportal do instituto reza que aqueles que non respecten os dereitos humanos non deben seguir adiante, "ninguén que non respecte os dereitos humanos, pase". Está escrito. É a herdanza que deixaron os filósof@s antes da súa partida. Puxéronse serios, como ten que ser nun asunto como este.
Home, xa sabemos que os que queiran pasar, pasarán, non deberían, iso si, porque non respectan os dereitos humanos, pero se pasan, os que o fagan, que saiban que van a ser esixidos e obrigados por aqueles que xa percorren as corredoiras do instituto, son loitadores e defensores dos dereitos humanos. Seguramente non os coñecederes, están recén chegados de todas as partes do mundo, os podedes visitar e coñecer pois aínda quedarán uns días por aquí. Está Said Boumedouha, que ven desde Irak, e Julio Torales do Paraguay, e moitos máis... apenas son coñecidos, certo, pero son imprescindibles ... "hai homes que loitan un día, e son bos, hai outros que loitan moitos días, e son mellores, pero hai os que loitan toda unha vida, ese son son imprescindibles". Bertol Bretch. Poucas bromas".

O departamento de Filosofía co seu profesor Víctor González organizou unha Exposición na Biblioteca para conmemorar o Día Mundial da Filosofía na Biblioteca do noso centro. En palabras do propio profesor, Víctor González: "Chegaron. De noite, onte e con sixilo, que é como mellor entran as veces os pensamentos, mesturados cos soños. Xa están aquí, saltaron aramados, coma furtivos, liberaron fechaduras, navegaron mares e océanos, cruzaron ríos e tenderon pontes. Costoulles, pero chegaron, mal que lles pese a algúns. Si, son os filósofos e as filósofas. Acamparon xa, e descansan na biblioteca do IES de Valga das fatigas. Grazas a Áida García Barreiro, aliumna do Centro, que axudou a acomodalos. Grazas, amiga.
Non, non, o tiveron doado. Non o ten doado a filosofía. Algúns non a queren ver diante, roubanlle horas de didáctica (véanse os xornais); será porque os filósof@s traen nas alforxas a beleza. Moita carga parece, pero é o que traen. Nin ouro, nin prata, tampouco incenso ou especias semellantes. Nada de iso. Non son magos, son filósof@s. Só traen a beleza, nada máis, e nada menos. Algúns, ben intencionados, defenden que sen filosofía morre a disidencia, e ata a liberdade morre e virán as tiranías .... non será para tanto, que incluso aqueles que negan a filosofía, a practican sen darse conta, porque negar é pensar, como dixo aquel, xa fai tempo.... lembrade, aquel que nega a Deus, xa está pensando en el, que negándoo, o pensa, e se o pensa, existe. Coa filosofía pasa o mesmo. a filosofía sempre está, aínda que non se queira; pérdese moito máis que a liberdade, pérdese unha historia fermosa, a historia do pensamento. Que pensaríades se algún iluminado propuxera, por exemplo, quitarlle horas dos curriculums pedagóxicos a historia da literatura, galega ou castelán, que pensaríades se, por culpa do ordeamento curricular, houbera alumn@s que non coñeceran quen foi Lope de Vega, por exemplo, ou Miguel Hernández ou que non soubera que a península ibérica foi visitada polos musulmáns porque roubáronlle horas a didáctica da Historia poño por caso?... Non, non fan falta respostas, non as preciso, o silencio que agora gardades é resposta dabondo.
Si, chegaron os filósofos/as. Están en pé de guerra. Non é para menos, pero visitade a biblioteca do IES, que non morden. Están alí acampados, descansando, camiño de outras empresas, outras loitas. Adoitan ser loitas dialécticas, pero outras, máis belixerantes, non están descartadas."