Orientación

Visita do alumnado de 4º ESO ao centros de FP de Santiago: Lamas de Abade e CIFP Politécnico

Sáb, 18/03/2023 - 22:05 — IES de Valga

O venres 17 de marzo, o departamento de Orientación organizou unha visita aos centros educativos de Formación Profesional de Santiago: Lamas de Abade e o CIFP Politécnico para que, o alumnado de 4º ESO, puidese coñecer de primeira man outras posibilidades que, pode elexir unha vez remate a súa etapa académica no noso centro. Foron acompañados polas profesoras Esther de Andrés, Mar Tejero, Nieves Gómez e Laura Souto.

Visita do alumnado de 2º Bacharelato e 4º ESO á USC, CIFP Politécnico e EA Mestre Mateo de Santiago

Xov, 14/02/2019 - 20:09 — IES de Valga

O xoves 14 de febreiro e como actividade final da "Semana de orientación e emprego" do noso centro, o departamento de Orientación organizou unha visita a distintos centros educativos de Santiago para que o alumnado de 2º Bacharelato e 4º ESO puidese coñecer de primeira man as posibilidades que pode elexir unha vez remate a súa etapa académica no IES Valga. Puideron visitar, segundo a opción elexida, a USC, dentro do programa "A Ponte", o CIFP Politécnico de Santiago e a EASD Mestre Mateo. Foron acompañados polas profesoras Rosalía García, Noa Carrera e Pilar Lestido.

Terceira xornada da "Semana de orientación e emprego" no IES Valga

Mér, 13/02/2019 - 20:56 — IES de Valga

O mércores, 13 de febreiro e dentro da "Semana de orientación e emprego", tivo lugar na aula de audiovisuais a terceira das xornadas con outras dúas interesantes actividades dirixidas ao alumnado de 4º ESO, 2º Bacharelato, 2º FP Básica e de Ciclos. A primeira foi unha charla-obradoiro que baixo o título de "as cooperativas, fórmula de Economía Social" tivo como poñente a Ana Oliveira, técnica da rede Eusumo. A poñente informou de tódalas posibilidades que dá o cooperativismo nos diferentes sectores económicos e mostrou con exemplos reais o futuro desta modalidade empresarial.

Na segunda das actividades, o actor David Amor explicou coa súa charla "Namórate do que fas" a súa experiencia laboral no mundo da televisión e do espectáculo en xeral, conseguindo namorar coa súa disertación ao alumnado e profesorado asistente.

Charlas no segundo día da "Semana de orientación e emprego"

Mar, 12/02/2019 - 21:00 — IES de Valga

O martes, 12 de febreiro e dentro da " Semana de orientación e emprego", tiveron lugar na aula de audiovisuais dúas interesantes actividades dirixidas ao alumnado de 4º ESO, 2º Bacharelato, 2º FP Básica e de Ciclos. A primeira foi unha charla-coloquio que baixo o título de "o papel dos sindicatos e as condicións laborais" tivo como poñentes aos membros da CIG, Carmiña Naveiro e Eduardo Sebio. Os poñentes fixeron un repaso aos órganos representantes nas empresas, a afiliación sindical e ás consecuencias da reforma laboral do 2012.

Na segunda das actividades, realizouse un obradoiro titulado "ferramentas de comunicación coa Administración" a cargo dos técnicos da administración da USC, Ana Domínguez e Delfín Pérez, os cales informaron de cuestións relacionadas con documentos tan básicos e importantes como o certificado dixital ou a sinatura electrónica; ademais fixeron fincapé nos dereitos e deberes dos administrados fronte á Administración.

Xornada de portas abertas e charla sobre autoemprego na "Semana de Orientación"

Lun, 11/02/2019 - 22:19 — IES de Valga

Comezou no noso Centro a "Semana de Orientación" cunha xornada de portas abertas e unha charla sobre auotemprego. Despois do acto de apertura na Biblioteca, alumnado do CPI de Catoira, do CPI de Pontecesures e do IES Macías O Namorado percorreu as instalacións do noso Centro. Posteriormente, nas dúas últimas horas da mañá, tivo lugar unha charla titulada "O autoemprego: unha alternativa laboral" a cargo de Santiago Resua Nine, fundador da empresa IRONOR Metalurgia, SL Este empresario e exalumno do noso Centro explicou ao alumnado de 4º ESO, 2º Bacharelato e Ciclos a súa experiencia na creación dunha empresa partindo dos seus inicios como traballador por conta allea.