IES A SANGRIÑA

IES A Sangriña Springweek 2024

Xov, 18/04/2024 - 10:54 — IES A Sangriña

A Resolución do 8 de febreiro 2024 resolve a participación do noso centro nas actividades de inmersión linguïstica en inglés que se desenvolverán dentro do programa SpringWeek auspiciado pola Consellería de Educación. Serán 25 alumnos/as de 2º da ESO do noso centro os que na semana desde o 28 de abril ao 4 de maio terán a oportunidade de vivir unha experiencia inmersiva de aprendizaxe de inglés que implica unha carga lectiva de 20/25 horas (a razón de 4/5 horas diarias repartidas nos cinco días do programa) co obxectivo de recrear a maior inmersión lingüística en inglés posible de cara a reforzar as competencias comunicacionais nesa lingua de todo o alumnado participante. A presenza de profesores e monitores nativos será fundamental para acadar o maior grado de inmersión nun programa que combinará as actividades académicas con actividades lúdicas e complementarias. Todo isto desenvolto nun entorno natural que busca espertar no alumnado actitudes de respecto cara a conservación do medio.

A SpringWeek desenvolverase no complexo Cemar no Concello de Mondariz. O complexo está ubicado nun incomparable medio natural e presenta un conxunto de instalacións de alto rango para a práctica deportiva e de actividades relacionadas co medio natural onde se sitúa.

O Departamento de Inglés do IES A Sangriña organizará aos 25 alumnos/as seleccionados/as para esta experiencia única. Se precisades máis detalles, non dubidedes en contartar co centro para facilitarvos calquera dato que necesitedes.

Achegamos para máis información e a guía do programa no documento pdf que podes consultar premendo aquí.

Obradoiro "Emprender é soñar"

Mér, 17/04/2024 - 18:51 — IES A Sangriña

Obradoiro Emprender é soñar IES A SANGRIÑA

Este pasado luns, o alumnado de Economía de 1º de Bacharelato do IES A Sangriña traballou nun obradoiro de emprendemento que significa o seu primeiro paso dentro dunha actividade de maiores dimensións e moi completa. Trátase dun proxecto que, ao abeiro do programa "Empresa familiar nas aulas", está a organizar o departamento responsable desta materia en colaboración coa Asociación Galega da Empresa Familiar e a Afundación Obra Social de ABANCA . O proxecto consta dos seguintes eventos:

Obradoiro emprendemento.
Elaboración, por grupos, dun Plan de Empresa que incluirá un vídeo de presentación co que participarán nun concurso.
Encontro nas instalacións do centro cun empresario local, que no noso caso será Antón Fonseca, vicepresidente do Grupo Terras Gauda.
Visita ás á Bodega Terras Gauda.

Desde o IES A Sangriña queremos agradecer esta oportunidade a todas as entidades implicadas e destacar, desde xa, o fantástico traballo que neste proxecto está a realizar o noso alumnado.

Para coñecer un pouco máis da Asociación Galega da Empresa Familiar e coñecer os seus "Talleres de economía circular para fomentar o emprendemento" podes consultar a esta ligazón.

Xurxo Mariño descubriunos os segredos do cerebro humano

Mér, 17/04/2024 - 14:12 — IES A Sangriña

Xurxo Mariño IES A SANGRIÑA

Hoxe martes, o alumnado de 1º de Bacharelato de Anatomía Aplicada do noso centro tivo a fortuna de asistir a unha charla dun dos mellores divulgadores científicos do noso país, Xurxo Mariño. Doutor en Neurofisioloxía pola Universidade de Santiago de Compostela, Xurxo Mariño é profesor da Universidade da Coruña, realizou o posdoutoramento no Massachusetts Institute of Technology (MIT) e tamén é membro do grupo Neurocom, da Universidade de Santiago de Compostela.

A conferencia coloquio, como non podía ser doutra maneira, estivo á altura das expectativas creadas coa visita do que é un divulgador da ciencia a través de cafés de teatro científico, programas de discursos e do seu blog Scientific Culture e que foi galardoado co Premio Especial do Xurado do I Certame de Comunicación Científica FECYT en 2011.

Programa educativo Navega con Rumbo

Mar, 16/04/2024 - 12:23 — IES A Sangriña

A Dirección Xeral de Ordenación e Innovación Educativa organiza a XI edición do programa educativo Navega con Rumbo. Ao abeiro do mesmo, celebráronse hoxe no noso centro dúas charlas coordinadas por vicedirección cos seguintes obxectivos:

Poñer a disposición da comunidade educativa recursos de interese sobre seguridade na rede, así como ferramentas para o seu uso didáctico na aula.
Previr o ciberacoso e outros riscos derivados do mal uso de internet e das redes sociais.
Contribuír ao desenvolvemento da Estratexia Educación Dixital 2030, promovendo unha navegación segura e responsable.

Á primeira das sesións acudiron o alumnado de 1º de ESO A e 1º de ESO B, e á segunda o alumnado de 1º de ESO C e FP Básica.

Alfonso Armada: xornalismo, guerra e literatura

Mar, 16/04/2024 - 11:50 — IES A Sangriña

Onte tivemos a fortuna de contar no noso centro con Alfonso Armada Rodríguez, xornalista, escritor, dramaturgo e poeta. Na súa traxectoria como xornalista cubriu conflitos como o cerco de Saraxevo ou o xenocidio de Ruanda. Alfonso Armada foi corresponsal para África no diario El País durante cinco anos e de 1999 a 2005 corresponsal en Nova York para o diario ABC. De novembro de 2017 a outubro de 2021 foi presidente da sección española de Reporteiros sen Fronteiras.

Como non podía ser doutra maneira, especialmente tratándose dun grande orador, todas estas experiencias acabaron por dar forma a unha charla trepidante, excitante, atraente, variada... que algúns dos alumnos describiron como "a mellor conferencia das súas vidas".

Obradoiro de primeiros auxilios

Mar, 16/04/2024 - 11:05 — IES A Sangriña

Entre onte luns e hoxe martes recibimos unha desas visitas que xa son habituais no noso centro. Estivo a traballar co noso alumnado José Palacios Aguilar, coordinador do Grupo de Investigación en Actividades Acuáticas e Socorrismo, profesor da Universidade da Coruña, creador e Coordinador do Grupo Internacional de Actividades de Prevención e Socorrismo, doutor e licenciado en Educación Física e Presidente da Asociación de Educación Ambiental e do Consumidor. Como é habitual, no obradoiro traballáronse técnicas básicas de primeiros auxilios: cadea de supervivencia, RCP básica, uso do desfibrilador e actuación ante obstrución de vía aérea.

Moitas grazas a José Palacios por un traballo que nos pode axudar a salvar vidas.

A Sangriña viaxeira (algunhas fotografías)

Lun, 15/04/2024 - 11:49 — IES A Sangriña

A Sangriña viaxeira 2024

A semana antes da Semana Santa boa parte do noso instituto saiu das nosas aulas a ver mundo. O departamento de Educación Física levou, como xa é tradicional, o alumnado de 4º de ESO a Androrra para esquiar e coñecer o país. O departamento de Relixión organizou unha saída didáctica que comezou nas médulas e recorreu cidades como Astorga, León, Burgos, Tarazona, Calatayud, Nuévalos/Mosteiro de Pedra e Zaragoza. Esta saída realizouse en colaboración co IES Antón Alonso Ríos e o IES San Paio de Tui. Finalmente, o alumnado de Bioloxía e Xeoloxía participou nunha excursión organizada polo departamento de Bioloxía que tivo como destino o Xeoparque de Quiroga e a Praia das Catedrais, onde ademais de facer exercicio ao aire libre, o alumnado puido experimentar e poñer en práctica en situacións reais, boa parte dos coñecementos adquiridos nas aulas.

A continuación, publicamos en pdf algunhas fotografías destas viaxes:

Paremos o masacre en Palestina!!!

Ven, 12/04/2024 - 20:33 — IES A Sangriña

Este 12 de abril ás 12, convocados por Docentes por Palestina, centos de centros de ensino galegos concentrámonos baixo o lema "PAREMOS O MASACRE EN PALESTINA". A continuación, compartimos con vós o comunicado que foi lido nesta xornada reivindicativa:

Está pasando agora, mentres lemos estas palabras, mentres andamos polos corredores do noso centro, mentres o alumnado estuda e aprende, mentres o profesorado explica a materia. Está pasando agora, mentres saímos de clase, subimos e baixamos do autobús camiño das nosas casas. Esta pasando agora.

Non fai falta ir aos libros de Historia, nestes momentos Palestina sofre un ataque continuo en forma de xenocidio por parte das tropas ocupantes de Israel. A mediados de marzo de 2024 superan amplamente as 30.000 persoas mortas, masacradas. Case 80.000 as feridas. 1,7 millóns de persoas desprazadas dos seus fogares. Casas, hospitais, escolas destruídas de forma sistemática e planificada.

A comunidade escolar temos a obriga de actuar fronte á barbarie e actuar como o que somos, parte da sociedade civil, para presionar os nosos gobernos co fin de parar este xenocidio. A LOMLOE, no seu primeiro artigo, afirma como un dos nosos principios “a transmisión e posta en práctica de valores que favorezan a liberdade persoal, a cidadanía democrática, a solidariedade, a tolerancia, a igualdade, o respecto e a xustiza”. O silencio, a equidistancia, ignorar o que está a suceder en Gaza é incompatible coa solidariedade, a xustiza e a cidadanía democrática.

Esa mesma lei comprométenos a velar polo cumprimento da Convención sobre os Dereitos das Crianzas adoptada polas Nacións Unidas. Esa mesma convención, no seu artigo 6, afirma que “toda crianza ten o dereito intrínseco á vida”. A vida de todas as crianzas, tamén as palestinas.

Por solidariedade co pobo palestino.

Irina Guimarães e Maria Antónia Serrano, saúde en portugués

Ven, 12/04/2024 - 20:22 — IES A Sangriña

Hoxe, no IES A Sangriña, tivemos a fortuna de que dúas doutoras do país veciño viñesen visitarnos para impartir dúas magníficas conrencias. Irina Guimarães é Doutora do Instituto Portugués de Oncoloxía de Coímbra e María Antónia Serrano é Doutora especialista en Imaxioloxía do Instituto Portugués de Oncoloxía.

Á primeira das conferencias, organizada polo Departamento de Bioloxía, asistiu o alumnado de 1º de Bacharelato da materia de Anatomía e tivo como título "Anatomía humana: o esqueleto, lesións e doenzas máis comúns". Á segunda, organizada por Vicedirección, acudiu alumnado de ciclos medioe e FP Básica, e o seu título foi "Vicios que matan: a relación fatal entre o consumo de tabaco e o cancro".

Esta actividade, ademais da colaboración e da asistencia do profesorado dos diferentes departamentos envolvidos, contou coa implicación do Departamento de Portugués e, máis alá dos interesantísimos e importantísimos contidos de ambas charlas, a súa realización tivo como finalidade paralela facer que o noso alumnado sexa consciente de como o seu dominio da lingua galega o habilita para interactuar en espazos académicos de nivel en lingua portuguesa.

Obrigado á Irina e á Maria Antónia, dúas grandes profesionais, pola súa colaboración e polo esforzo realizado para compartir con nós esta mañá de ciencia, saúde e lingua!

Co galego a ciencia aínda me leva lonxe

Ven, 12/04/2024 - 09:50 — IES A Sangriña

Co galego a ciencia aínda me leva lonxe

Esta actividade está integrada nun proxecto maior chamado O galego lévame lonxe e consiste en que profesores de diferentes departamentos utilizan materiais en portugués nunha das súas unidades didácticas. Desta maneira, preténdese que o alumnado que non frecuenta a materia de Lingua Portuguesa se torne consciente da vantaxe competitiva de falar galego e da utilidade da súa variante internacional no ámbito científico.

O galego lévame lonxe realízase no ámbito dos plans PROXECTA +, dentro da temática Promoción do Patrimonio e da Lingua Galega e ligado ao Programa de Proxectos de innovación en dinamización lingüística.