Lingua Galega e Literatura

Departamento de Lingua Galega e Literatura

"As alumnas" visítannos da man de Paula Carballeira

Xov, 02/05/2024 - 16:37 — IES A Sangriña

Paula Carballeira IES A Sangriña

O pasado martes día 30 de abril visitou o noso centro a escritora Paula Carballeira. Pero a súa visita xa comezara previamente, a pasada semana, cando "As alumnas" se meteu nas nosas aulas a través dunha serie de lecturas dramatizadas en 1º de Bacharelato nas que participaron os departamentos de Lingua Galega e Lingua Castelá. Esta obra, Premio Nacional de Literatura Dramática e Premio Follas Novas 2023 á mellor Obra de Teatro, foi o eixo sobre o que xirou esta actividade organizada pola Bibliotrega Magdalena Garabatos.

"As alumnas" foi escrita a partir dunha proposta de Fran Rei como representante de Culturactiva. Elvira Fontao e Rosa Lires, antigas alumnas de María Barbeito, volven atoparse na data da morte da mestra, no ano 1970. Xa son mulleres. Atrás queda a infancia, o mundo que lles abriu a mestra antes de que o Comité de Depuración a afastase do seu traballo na escola. Así, a memoria, as lembranzas que se van desenvolvendo neste xogo de persoas adultas que é o teatro, fannos descubrir como as decisións que se tomaron, e o medo e a rebeldía, marcan o seu destino.

Paula Carballeira (Maniños, Fene, 1972) é licenciada en Filoloxía e cun curso de Especialización en Arte Dramática, narradora oral profesional desde 1994, actriz, directora e escritora. Candidata dous anos consecutivos ao Astrid Lindgren Memorial Award, ten unha ampla produción literaria en narrativa e teatro, aínda que tamén escribe poesía e ensaio. Moitos dos seus libros foron premiados e traducidos a diferentes idiomas. Como actriz, é membro da compañía teatral Berrobambán desde 1996 e participou en varias series e programas da Televisión de Galicia. Como dramaturga recibiu o Premio Nacional de Literatura Dramática no ano 2023 por "As alumnas", publicado en Editorial Galaxia, onde tamén publicou "Daniel no peirao" (2023), un texto de teatro infantil arredor dun episodio da infancia de Castelao, ademais de "Nunca mascotas" (2016), "O lobishome de Candeán" (2012) e "As outras historias" (2011), entre outros.

Nota biográfica da autora na páxina web da Editorial Galaxia. Para consultar a información completa dos seus libro, preme aquí.

María Reimondez fala con nós sobre "Corredora" e "Cobiza"

Xov, 02/05/2024 - 14:24 — IES A Sangriña

María Reimondez IES A SANGRIÑA

O pasado luns día 29 de abril visitou o noso centro a escritora María Reimóndez para conversar co noso alumnado de 1º de ESO e de 1º de Bacharelato, que neste ano académico leron dous dos seus libros, "Corredora" e "Cobiza".

En "Corredora", cóntasenos ahistoria de Genet Mullugueta, que naceu nunha aldea de North Wolloh en Etiopía. Dende noviña o que máis lle gustaba era correr e correr polo ventre da montaña. Mais a fame, a guerra e a figura do pai obrígana a acompañar a súa nai e a pedir esmola polas rúas inseguras e caóticas de Addis Abeba.
"Cobiza" é unha apaixonante novela de ciencia ficción feminista que foi merecedora do I Premio Pinto e Maragota á diversidade sexual e de xénero organizado polo Concello de Pontevedra e Xerais. Forma parte dunha triloxía da que, en 2023, saiu xa a segunda parte "Multitudes".

María Reimóndez (Lugo, 1975) é tradutora e intérprete de profesión e feminista por convicción. Conta cunha ampla lista de títulos, dende a poesía ao ensaio, pasando pola narrativa. Como poeta destaca "Galicia en bus" (2018), co que gañou o Premio de Poesía Johán Carballeira, e en ensaio, a obra "Feminismos" (2013), en coautoría con Olga Castro, E "A casa do amo" (Xerais, 2024). Como narradora para o público mozo destacan "Usha" (2006); "Corredora" (2017); "Fóra do normal" (2018), Premio Agustín Fernández Paz; "A formiga destemida" (2020), "Bárbaras!" (2021) e "Furia", Premio Jules Verne 2023. Para persoas adultas, "O club da calceta" (2006), Premio Arcebispo Xoán de San Clemente 2007, traducida ao castelán, italiano e francés e adaptada á escena e ao cine ou as novelas do Ciclo dos Elementos: "En vías de extinción" (2012); "Dende o conflito" (2014), Premio Xerais de Novela; "A música dos seres vivos" (2015); "As cousas que non queremos oír" (2017) e "As estacións do lobo" (2019). Na colección Milmanda publicou "Cobiza" (2021), I Premio Literario Pinto e Maragota á diversidade sexual e de xénero e "Multitudes" (2023).

Nota biográfica da autora na páxina web de Edicións Xerais. Para consultar a información completa dos seus libros, preme aquí.

Fomos ver "O corno" e visitamos "Vigo no tempo"

Mér, 10/01/2024 - 20:09 — IES A Sangriña

Sangriña O corno Vigo

O alumnado de 1⁰ de Bacharelato realizou hoxe unha viaxe académica á cidade de Vigo para asistir ao filme "O corno" e realizar unha visita guiada á exposición "Vigo no tempo" na sede de Afundación (de Abanca).

O CORNO é un filme galego, dirixido por Jaione Camborda, que vén de ser recentemente premiado no prestixioso Festival Internacional de Cine de San Sebastián. Este drama ambiéntase na Illa de Arousa, no ano 1971. María é unha muller que gaña a vida mariscando. Tamén é coñecida na illa por axudar outras mulleres nos seus partos con especial dedicación e coidado. Tras un inesperado suceso, vese obrigada a fuxir e comeza unha perigosa travesía que a fará loitar pola súa supervivencia. Buscando a súa liberdade, María decide cruzar a fronteira por unha das rutas de contrabando entre Galicia e Portugal.

VIGO NO TEMPO é a quinta das exposicións que se poñen en marcha no marco dun proxecto máis amplo, 'Cidades no tempo', que inclúe unha exposición en cada unha das sete principais cidades galegas. Despois de Santiago, Ferrol, Lugo e A Coruña, a proposta continúa a súa andaina en Vigo co obxectivo de recuperar a cultura urbana como compoñente fundamental da identidade de Galicia. Pode visitarse na Sede de Afundación de Vigo ata o 20 de xaneiro de 2024.

Fomos á Casa de Rosalía de Castro e a Pontevedra

Mér, 20/12/2023 - 12:41 — IES A Sangriña

visita pontevedra e rosalía de castro

O alumnado de 3º de ESO realizou, onte día 20 de decembro, unha excursión educativa á Casa Museo de Rosalía de Castro e á cidade de Pontevedra organizada polo departamento de Lingua Galega e Literatura.

Na viaxe, subvencionada con fondos que o departamento conseguiu da Deputación de Pontevedra, o alumnado puido coñecer a Casa da Matanza, sé do Padroado Rosalía de Castro, que está dedicada ao estudo e divulgación da figura da autora de Cantares Gallegos e Follas Novas, icono da cultura galega desde o Rexurdimento.

Posteriormente, os estudantes desprazáronse á cidade de Pontevedra, onde gozaron de pasear polas súas rúas e visitaron o Museo Provincial. Nesta institución realizaron unha visita guiada, con especial atención á obra de Castelao.