IES A SANGRIÑA

Podes ver aquí a entrevista a Mariví Álvarez

Xov, 29/02/2024 - 14:40 — IES A Sangriña

Xa está publicado na web de La Voz de Galicia o vídeo da entrevista que este xornal realizou, no noso centro, a Mariví Álvarez, Presidenta de COPLANT. A peza é o resultado do traballo de Iago García, Álex López-Benito e Senén Rouco.

Na entrevista, Mariví achega datos e reflexións que nos resultaron impactantes e nos fixeron conscientes do tipo de traballo que unha empresa coma esta, que está tan preto do noso centro pode realizar. Por exemplo, descubriunos que COPLANT pode distribuír plantas en Berlín nun prazo de tan só 72 horas ou que a empresa está preparada para crecer até un 30% nos próximos anos. Ademais, consideramos especialmente importante a reflexión que Mariví facía sobre a necesidade de fixar poboación en concellos como os nosos e a importancia que empresas como COPLANT teñen para conseguilo.

Para ver o vídeo completo preme na seguinte ligazón: Entrevista a Mariví Álvarez en "De 0 a 100".

Se chegas ao final do vídeo verás as fantásticas preguntas do noso alumnado!!!

Participamos en "De 0 a 100"

Lun, 26/02/2024 - 19:24 — IES A Sangriña

COPLANT IES A Sangriña La Voz de Galicia

"De 0 a 100" é unha iniciativa da Consellaría de Educación encamiñada a realizar, en colaboración con diferentes centros de ensino e o xornal La Voz de Galicia, entrevistas a empresarios e empresarias galegos destacados pola súa traxectoria e a súa vontade innovadora. Desta maneira, preténdense dar a coñecer entre o alumnado casos de éxito en diversos ámbitos empresariais.

No IES A Sangriña a protagonista da entrevista en que participou o alumnado de Economía de 2⁰ de Bacharelato foi Maria Victoria "Mariví" Álvarez (Presidenta de COPLANT). Este é un proxecto que nace no ano 2004 grazas ao compromiso e unión de cinco viveiros de plantas ornamentais da zona sur de Galicia, establecendo a súa sede e centro loxístico na comarca do Baixo Miño. Xunto á experiencia conxunta e á vocación de atención ao cliente que os caracteriza, ofrecen unha ampla gama de plantas ornamentais en diferentes tamaños e formatos. COPLANT está orientado á comercialización de plantas ornamentais de calidade a nivel nacional e internacional, e está presente nos principais mercados europeos como Francia, Reino Unido, Alemaña, Holanda, Bélxica, Portugal, Italia e Dinamarca.

Visitamos os museos científicos da Coruña

Lun, 26/02/2024 - 17:34 — IES A Sangriña

ies a Sangriña coruña

O alumnado de 3⁰ de ESO do IES A Sangriña visitou, hoxe luns día 26 de febreiro o museo Domus e o Aquarium Finisterrae da Coruña. A actividade foi organizada e acompañada polo profesorado dos departamentos de Bioloxía e Xeoloxía e Física e Química.

Domus foi o primeiro museo interactivo do mundo dedicado integramente ao ser humano, e é o segundo dos tres Museos Científicos da Coruña. O edificio, obra do arquitecto xaponés Arata Isozaki, conta con máis de 150 módulos interactivos para divertirse e reflexionar sobre as características da especie humana.

O Aquarium Finisterrae é un centro científico público dedicado á educación ambiental e á divulgación científica de temas mariños. O terceiro dos Museos Científicos Coruñeses ten como obxectivo promover o coñecemento do océano e educar actitudes amorosas cara o mar e a vida mariña. Foi creado polo Concello da Coruña o 5 de xuño de 1999. O Aquarium Finisterrae conta con catro salas de exposición, cada unha con personalidade propia, e unha colección biolóxica formada por máis de trescentas especies diferentes.

Asalto poético rosaliano

Ven, 23/02/2024 - 18:58 — IES A Sangriña

Día de Rosalía Sangriña 2024

Hoxe foi 23 de febreiro, Día de Rosalía de Castro. Para celebralo, a grande poeta galega enviou polas aulas e gabinetes do IES A Sangriña un comando de asaltantes poéticxs que marabillou a todxs xs que tivemos a sorte de gozar coa súa arte. Esta fotografía é da súa intervención na xefatura de estudos. Grazas por nos regalar esta mañá de poesía rosaliana en galego.

Imos ao cine e visitamos o monte do Castro

Mar, 20/02/2024 - 20:48 — IES A Sangriña

Visita vigo 1 eso sangrriña

O alumnado de 1⁰ de ESO do IES A Sangriña desprazouse onte a Vigo da man do departamentos de Lingua Castelá e Literatura e Bioloxía para asistir a unha proxección cinematográfica e visitar o monte do Castro na cidade de Vigo.

O filme escollido foi "El peor equipo del mundo", baseado na historia do adestrador holandés Thomas Rongen, o artífice de levar a cabo unha tarefa practicamente imposible no deporte: tomou as rendas da selección de fútbol de Samoa Americana, e tentou converter un grupo desastroso nun equipo de vencedores naturais.

Mo monte do Castro, realizouse unha visita guiada á fortaleza, edificada sobre as ruínas dun castelo medieval derruído no século XV, que foi a principal construción defensiva da cidade. A visita incluíu o acceso ás galerías subterráneas empregadas durante a guerra contra os franceses, abertas ao público recentemente polo Concello de Vigo.

III Concurso de lettering Rosalía de Castro

Ven, 16/02/2024 - 09:39 — IES A Sangriña

Imaxe web IES A Sangriña Lettering Rosalía

Para celebrar a nosa autora máis universal e para que a vosa habilidade co lettering saia ao mundo máis alá dos vosos cadernos de apuntamentos e exercicios... o Equipo de Dinamización da Lingua Galega do instituto organiza novamente o Concurso de lettering Rosalía de Castro, que vai xa pola súa terceira edición.

Normas de participación:

Escolle un poema de Rosalía de Castro.
Selecciona con que parte del queres traballar.
Fai un lettering nun folio en branco co texto escollido.
Envía o teu traballo ao seguinte e-mail: asangrinha.edlg@gmail.com
Data límite de recepción de traballos: 1 de marzo de 2023.

O premio do concurso consistirá nun vale de 30 € en material de debuxo, escolar, deportivo ou libros que escollerá a persoa gañadora.

Ama coa túa lingua no IES A Sangriña

Mér, 14/02/2024 - 17:05 — IES A Sangriña

14 de febreiro Sangriña 2024

Hoxe é 14 de febreiro, día dos namorados... e na Sangriña queremos que no que resta de semana ames na nosa lingua. Para isto, o Equipo de Dinamización da Lingua Galega instalará mañá no hall o photocall e o taboleiro dos post-it do amor en galego.

QUE IMOS FACER?

O día 15 instalaremos un photocall no vestíbulo para facermos fotos de grupo ou en parella e celebrar o noso amor!
Haberá tamén un taboleiro do amor onde poderedes deixar post-it coas vosas mensaxes de amor e amizade en galego!

Non deixes de participar. As mostras de amor e amizade constrúen un mundo mellor!

Apúntate nas estadías lingüísticas de verán

Mér, 14/02/2024 - 16:51 — IES A Sangriña

Recentemente veñen de se convocar 648 prazas de estadías lingüísticas de verán no estranxeiro para o alumnado de Bacharelato.

O alumnado que resulte seleccionado disporá de tres semanas en réxime residencial ou familiar en Reino Unido, Francia, Portugal, Canadá e Alemaña no período estival, entre xullo e agosto. As axudas poden chegar a cubrir entre o 92% e o 62% dos gastos derivados da actividade e poden solicitarse a través da sede electrónica da Xunta de Galicia.

Requisitos e baremación

Para obter as bolsas os candidatos terán que estar cursando, no réxime xeral, 1º ou 2º de Bacharelato, en centros de Galicia sostidos con fondos públicos, durante o curso 2023-2024; ter acadado unha nota mínima na área ou materia de lingua estranxeira que se vai perfeccionar na estadía de 6 no curso 2022/23, así como ter superadas todas as materias nese mesmo ano académico.

Os criterios para o baremo, puntuación e determinación das achegas familiares serán a nota media do expediente académico no curso 2022/23 (ata dez puntos) e a renda per cápita da unidade familiar (ata 20 puntos). Ademais, terase en conta o feito de pertencer a unha familia numerosa (dous puntos), contar cun membro cunha discapacidade igual ou superior ao 33% ou pensionista de grande invalidez (dous puntos), ou non ter sido beneficiario dunha axuda destas características na convocatoria do ano pasado (un punto).

Podes ver toda a información completa premendo nesta ligazón.

A Sangriña cumpre até a derradeira orde do meco!

Ven, 09/02/2024 - 16:49 — IES A Sangriña

entroido Sangriña 2024

Hoxe vivimos un entroido moi movido no IES A Sangriña. Foron moitos e moitas os alumnos e profesores que viñeron disfrazados ao centro. Variadas fantasías encheron os nosos corredores e aulas: un Castelao, científicos tolos, peluches e animais de diferentes especies e tamaños, deportistas, extraterrestres, bruxas, hippies... e até un Xesús de Nazaret!

Mais houbo dúas comparsas organizadas que, pola súa entrega e ilusión, non podemos deixar de mencionar dunha maneira especial. A comparsa AS BICHEIRAS, en homenaxe ás xa míticas personaxes de Davila, O Bichero, púxolle un tinte enxebre, rocanroleiro e reivindicativo ao entroido da Sangriña. A comparsa O XABARÍN CLUB, do Departamento de Lingua Galega (e Portuguesa), encheu de música e barullo os corredores. Risas e fotos cos máis peques (e algúns vellotes) para un entroido noso e en galego.

Do bacharelato á universidade

Ven, 09/02/2024 - 13:52 — IES A Sangriña

universidade sangriña exalumnos

Esta mañá, no IES A Sangriña, tivemos a grande fortuna de contar co retorno de dous fantásticos exalumnos do centro para lle falar ao noso estudantado de 1º e 2º de bacharelato sobre os retos que implica o camiño á universidade.

Rafael González compartiu con nós a súa experiencia no tránsito do bacharelato a unha vida universitaria que o levou a vivir en diferentes países, até que a obtención da bolsa “Ramón y Cajal” lle abriu as portas para volver e traballar na Universidade de Vigo

Andrea Maquieira, tamén destacada exalumna da Sangriña, compartiu como foi ese camiño co alumnado de Humanidades de Ciencias Sociais, profundizando nas vantaxes e esixencias da realización dun dobre grado e na importancia da formación posgrao para acceder a un posto de traballo no ámbito profesional desexado.