IES de Soutomaior

A Consellería de Educación vén de convocar un total de 525 prazas para alumnado de Bacharelato dirixidas a realizar estadías lingüísticas no estranxeiro co fin de mellorar as súas competencias noutros idiomas:

• PDF informativo con requisitos e información sobre o proceso de solicitude aquí.
  

Resumo da convocatoria

• Destinatarios: alumnado de 1º ou 2º de Bacharelato de centros sostidos con fondos públicos.
• Requisitos académicos: ter superadas todas as áreas ou materias no curso 2020/21 e ter acadado no curso 2020/21, na área ou materia de lingua estranxeira que se vai perfeccionar na estadía, unha cualificación mínima de 6 no 4º curso de ESO para as prazas convocadas para o 1º de Bacharelato e de 6 no 1º curso de Bacharelato para as prazas convocadas para o 2º curso de Bacharelato.
• Prazas e destinos: 525, a desenvolver en Canadá, Reino Unido, Francia e Portugal durante a última semana do mes de xuño ata finais do mes de agosto de 2022, coa excepción das actividades para 2º curso de Bacharelato, que se desenvolverán no mes de agosto.
• Presentación de solicitudes: o prazo para a entrega de solicitudes é dun mes, contado a partir do día seguinte ao da publicación desta orde no Diario Oficial de Galicia (31 de xaneiro de 2022). As solicitudes presentaranse preferiblemente por vía electrónica a través do formulario normalizado dispoñible na sede electrónica da Xunta de Galicia: https://sede.xunta.gal. O procedemento de solicitude iniciarase a través da aplicación en liña dispoñible desde a páxina web https://www.edu.xunta.gal/axudasle  e cubrirase o formulario electrónico que corresponda en función da actividade en que desexan participar.

A última xuntanza do clube de lectura que reúne alumnado de 3º, 4º de ESO e 1º de Bacharelato tivo lugar en dúas xornadas nas que compartimos impresións sobre a obra "Matar un ruiseñor" (1960), de Harper Lee, adaptada a novela gráfica por Fred Fordham en 2018.

Os mozos e mozas do clube de lectura interpretaron diversas escenas clave da obra poñéndose na pel de diferentes personaxes. Tras cada unha das representacións, analizaron cada personaxe e achegaron interesantes reflexións que os levaron a conectar os tempos en que sucede a historia coa actualidade.

A lectura que os reunirá na próxima xuntanza será a novela Flor de area, de Manuel Lourenzo.

Máis imaxes neste álbum de fotografías

Como cada 26 de xaneiro, hoxe celébrase o Día Mundial da Educación Ambiental, que ten a súa orixe no Seminario Internacional de Educación Ambiental que se organizou en Belgrado en 1975. Naquel foro constituíronse os principios da Educación Ambiental recollidos na Carta de Belgrado: mellorar as relacións ecolóxicas, incluíndo as do home coa natureza e as dos homes entre si; concibir como un todo a educación ambiental dende un punto de vista ecolóxico, político, económico, tecnolóxico, social, lexislativo, cultural e estético; e considerar esta aprendizaxe como un proceso continuo e permanente tanto na escola como fóra dela.

Con estas premisas, o noso centro sumou dúas novas iniciativas ao labor de concienciación que nesta materia se veñen desenvolvendo este curso e os anteriores. Por unha banda, o autodenominado "Batallón de limpeza dos escarabellos de 1º ESO C" arremangou as mangas e lanzouse a recoller todo tipo de refugallos que atoparon nas beirarrúas e prazos lindeiros ao instituto: recipientes, plásticos, cabichas, máscaras... Os rapaces e rapazas de 1º ESO C e mailo seu titor José Luís completaron con éxito a misión, regresaron sen baixas e co deber cumprido: recolleron e separaron en bolsas o lixo atopado, que logo depositaron nos diferentes contedores que hai ás portas do centro. Ademais, tamén tiveron tempo para coñecer o noso compañeiro Luís, unha das tres persoas que se encarga da limpeza do centro. Así, non só comprenderon o importante que é reciclar senón tamén respectar o traballo que fan as persoas que fan que o noso centro estea limpo e sexa saudable. 

Por outra banda, o alumnado da materia Ciencias da Terra e do Medio de 2º de Bacharelato, coa súa profesora Montse, presentou e comezou unha nova campaña que procura concienciar o alumnado na correcta reciclaxe dos residuos. Como seguen observando que nos patios non se cumpren totalmente as normas, estes mozos e mozas supervisarán un día á semana a limpeza e os contedores dos patios na hora do recreo e farán unha valoración obxectiva, que servirá para mostrar uns resultados semanais da limpeza e reciclaxe nos diferentes patios que serán mostrados na pantalla do vestíbulo de entrada.

Feita a revisión semanal, elixirán un grupo de alumnas e alumnos para que recollan os residuos mal depositados e os coloquen no  contedor correcto; este alumnado colaborador irá alternando semanalmente. Como elas mesmos explican, todas sabemos que os residuos son un dos maiores problemas medioambientais que temos e que cómpre solucionar, sen esquecer que o mellor residuo é aquel que non se produce. 

Como que nos entra nunha lingua e nos sae por outra? De que estamos a falar? De linguas! Si, de linguas, en concreto, dos estudos e do traballo de Tradución e Interpretación que nos veu presentar a doutora Lara Domínguez Araújo, profesora da Universidade de Vigo, no marco do noso ciclo de charlas divulgativas e temáticas das universidades.

Tras establecer as diferenzas que hai entre as actividades da tradución e a interpretación, esta docente e investigadora achegou o alumnado aos estudos que se imparten na Facultade de Filoloxía e Tradución viguesa e a multitude de ámbitos en que desenvolven o seu traballo estes profesionais unha vez licenciados: dende os filmes aos videoxogos pasando pola publicidade, o turismo e sectores económicos e artísticos de todo tipo.

Así mesmo, dende o coñecemento de quen tamén se dedica á tradución e interpretación profesional, salientou o papel activo que xoga a lingua galega como vantaxe competitiva no mundo globalizado e, como exemplo disto, mostrou unha extensa nómina de empresas tecnolóxicas, multinacionais de todo tipo, institucións e e asociacións locais e internacionais que demandan o traballo de tradutores/as e intérpretes galegos/as saídos da UVigo (Das Lagoas a Silicon Valley: vivir da tradución e a interpretación en Galicia). 

Finalmente, explicou os procesos cognitivos que interveñen na aprendizaxe da interpretación, unha habilidade que precisa de moito estudo e preparación continuos, dunha grande capacidade de concentración e coordinación... e moita práctica,, pero que tamén regala moitas satisfaccións, coñecementos e experiencias. E así rematou a charla, coñecendo as diferentes modalidades da interpretación e practicando nunha actividade na que os rapaces e rapazas fixeron de intérpretes e oíntes de inglés-galego e galego-castelán. E aínda houbo tempo para o coloquio con Lara, á que lle agredecemos todo canto aprendemos hoxe e que sementase o interese pola súa profesión entre o alumnado. Para máis información: Grao de T&I, AGPTI e Rede Vértice.