Noticias

Resolución provisional do Fondo solidario de libros de texto e axudas para material escolar para o alumnado da ESO (2024-2025)

Mar, 09/07/2024 - 11:27 — IES A Sangriña

Segundo establece a ORDE do 7 de maio de 2024 pola que se regula a participación no fondo solidario de libros de texto, o vindeiro venres 12 de xullo publicaranse, no taboleiro situado na entrada do centro, as listaxes provisionais do Fondo solidario de libros de texto e axudas para material escolar para o alumnado da ESO.

O prazo para a presentación de reclamacións finalizará o xoves 17 de xullo.

Ante a necesidade de aclaracións para solventar dúbidas, prégase ás familias que se poñan en contacto coa Vicedirección do IES A Sangriña.

Lembramos que se trata dunha resolución provisional, motivo polo que as listaxes definitivas, que se publicarán a finais do mes de xullo, poderán sufrir modificacións.

Convocatoria dos premios extraordinarios de ESO 23-24

Mér, 03/07/2024 - 09:37 — IES A Sangriña

Publicadas dúas resolucións referidas aos premios extraordinarios de Educación Secundaria Obrigatoria ao rendemento académico correspondentes ao curso 2023-2024.

- Resolución do 21 de xuño de 2024, relativa á composición do tribunal que elaborará, supervisará e avaliará a proba, onde tamén se ditan instrucións para a súa realización. Nela queda fixada a data, o horario e as condicións de presentación das persoas candidatas (DOG núm. 127, do 2 de xullo).

- Resolución do 2 de xullo de 2024, relativa aos lugares de realización da proba.

Máis información sobre a convocatoria nas seguintes plataformas:

Na aplicación PremiosEdu.

No Portal Educativo da Consellería de Educación, Ciencia, Universidades e Formación Profesional.

Na Sede Electrónica da Xunta de Galicia (introducindo na caixa de busca o código de procedemento ED311D).

Animamos aquel alumnado do IES A Sangriña que cumpra as condicións requeridas a participar neste premio.

O prazo de presentación de solicitudes acaba o 8 de xullo.

MEGABAU 2024: Estudantes da Sangriña entre os mellores de Galicia

Xov, 27/06/2024 - 20:06 — IES A Sangriña

a sangriña megabau

O pasado venres 21 de xuño celebrouse no Coliseum de A Coruña o acto de recoñecemento académico MEGABAU 2024. O acto estivo presidido polo conselleiro de Educación, Ciencia, Universidades e Formación Profesional da Xunta de Galicia e os reitores das tres universidades.

Fíxose entrega dun diploma de recoñecemento e duns agasallos das tres universidades. O Centro IES A Sangriña tamén recibiu unha distinción pola excelencia acadada por tres alumnos/as do centro que obtiveron unha nota superior a 9.00 na fase xeral das ABAU 2024, á que se lle sumará a nota da parte voluntaria. Así, Manuel Moreira Rodríguez cun 9,518, Irene Vicente Cividanes con 9,278 e María Lima González cun 9,004 recibiron este recoñecemento tan merecido tras un ano de esforzo e dedicación.

Moitísimos parabéns, rapaces!

Sodes un orgullo para o IES A Sangriña!

Acabamos o curso e o Proxecto Simula!

Lun, 24/06/2024 - 20:18 — IES A Sangriña

Desde o pasado mes de abril, o alumnado da familia de Administración participou no programa SIMULA da Xunta de Galicia.

Durante este período, a través dá plataforma de simulación SEFED, os alumnos de ciclo medio e ciclo superior, interactuaron con outras empresas simuladas realizando todo tipo de operacións empresariais. Estes alumnos e alumnas de ciclo, comezaron coa constitución dun negocio virtual, As Aceñas, SLS e despois xestionaron todas as áreas da empresa, reproducindo na aula desde a dirección ata o resto de situacións reais do ámbito financeiro, administrativo, laboral, comercial, fiscal ... da empresa. Esta actividade encadrada dentro do Plan EduEmprende da Xunta de Galicia, permitiu aos alumnos coñecer un pouco máis, e desde dentro, a realidade administrativa e comercial da empresa.

Foi unha actividade moi enriquecedora, polo que no próximo curso contamos con traballar no proxecto desde o mes de setembro, de modo que podamos ampliar o número de participantes e a posta en práctica de maiores contidos.

Mil grazas aos participantes (alumnos e profesores) e en especial aos profes Pilar e Javi pola súa total implicación no proxecto.