Descubrindo o Norte

A visita de D. Carlos Spuch ao noso colexio supuxo unha festa e goce científico entre o noso alumnado de 6º. O evento dividiuse en dúas partes. A primeira na biblioteca do centro, onde o Dr. fixo unha presentación sinxela e breve sobre D. Santiago Ramón y Cajal. Máis que nos datos biográficos, o invitado completou a súa poñencia con numerosas anécdotas da vida do pai da neurociencia así como das mulleres pioneras da ciencia e da "Escuela" que creou o Premio Nobel. Despois dun pequeno cambio de impresións, pasamos ao laboratorio, onde desenvolveuse a segunda parte do acto. Nesta dependencia, o alumnado puido sentirse neurocientíficos por un día. Foi unha experiencia fantástica na que o alumnado obserbou cos microscopios as mostras dos cortes de neuronas, cerebros humanos e de ratos.

Como sempre, D. Carlos Spuch non defraudou. Agradecemos moito a súa colaboración co proxecto Descubrindo o norte.

Galería fotográfica	Carta de agradecemento

Cada vez son máis as persoas que recorren ás bicicletas como medio de transporte limpo e respectuoso co medio ambiente. Desprázanse polas cidades en bicicleta, para ir ao traballo ou darse un paseo, e os carrís-bici son cada vez máis frecuentes en todos os lugares. Ademais, as bicicletas, son un elemento ao que podémoslle sacar moito beneficio tanto a nivel familiar como escolar e deportivo. A dimensión escolar no ámbito da educación vial está clara; no ámbito familiar é unha boa escusa para iniciar aos cativos dun xeito divertido nos hábitos de vida saudable facendo xogos e pequenas excursións adaptadas ás respectivas idades; No ámbito do deporte non fai falta falar moito: ciclismo, MTB, Orientación en bici(MTB-O)... E neste sentido, un ano máis, o Club Ciclista Vigués achegou ao noso alumnado a súa paixón por estes deportes.

Moitas grazas unha vez máis a María, Ángel, Elsa e Fátima. Grazas ao Club Ciclista Vigués.

Galería fotográfica

Como vén sendo habitual, o proxecto “Descubrindo o norte”, ademais do desenvolvemento psicomotriz do noso alumnado, impulsa tamén valores como a inclusión e a coeducación tratando de equilibrar as diferenzas á vez que fomenta o desenvolvemento persoal. Para iso utilizamos os deportes minoritarios e os alternativos cos que, por ser menos coñecidos e practicados, conseguimos minimizar as diferenzas nas habilidades de quen os practica.O balonkorf é un destes deportes. O noso alumnado de 6º tivo a oportunidade de coñecelo da man dun dos seus técnicos na primeira quincena do mes de abril.

Galería fotográfica

"Citus, altius, fortius". Como comentei en anteriores ocasións, este é o lema que o barón Pierre de Coubertain vinculou aos Xogos Olímpicos. Nesta xuntanza deportiva, o atletismo cobra un significado especial. A carreira, o salto e o lanzamento son accións presentes no atletismo e son base necesaria para calquera outro deporte. O amplo grupo de deportes que inclúe o atletismo, favorecen o desenvolvemento da forza, a resistencia física e conséguese velocidade. Así mesmo, correr fai que mellore a capacidade pulmonar. Por outro lado, ademais das vantaxes físicas, o atletismo ten outras psicolóxicas: mellora a autoestima, o autocontrol, estabilidade emocional o cal redunda nun maior rendemento escolar xa que a actividade física en xeral, forxa o carácter, desenvolve actitudes inclusivas, mellora a empatía, a autoestima e a forza de vontade poñendo en valor actitudes como o esforzo, a constancia e o optimismo para alcanzar os obxectivos propostos. E todo iso respectando en todo momento aos adversarios.

O proxecto “Descubrindo o norte” en colaboración co Servizo provincial de deportes e o clube atletismo Beade levou o pasado luns ao noso alumnado de 4º de primaria ás instalacións do IFEVI para compartir unha xornada lúdico deportiva xunto co nenas e nenos de numerosos colexios de Vigo onde o atletismo foi o protagonista.

Galería fotográfica

Os deportes de combate supoñen unha alternativa máis dentro do ámbito da actividade física e o deporte.
Á marxe do que en non poucas ocasións pénsase, este tipo de deportes aglutinan un amplo espectro de valores que se vertebran nos tres lados do triángulo da saúde, a saber, o lado físico, o social e, por suposto, o mental. Todos estes valores facilitan o desenvolvemento motor e psicomotor, que unido á posta en práctica de condutas
sociomotrices favorecen a mellara da autoestima, da capacidade de concentración e esforzo, da forza de vontade, entre outros aspectos que resultan tan importantes cara a consecución da madureza emocional.
Neste sentido,  o proxecto “Descubrindo o norte", contou   o pasado venres coa participación da Sala Viguesa de Esgrima Antiga. Que ademais de transmitir ao noso alumnado de 4º,5º e 6º a súa paixón pola esgrima e a historia, espertaron no noso alumnado novos intereses e curiosidades.
Moitas grazas a Sarai, Aldán e Damián pola súa colaboración e compromiso.

Finalmente agradecemos tamén a D. Carlos Spusch a súa presencia activa nesta actividade. Ademais dun gran divulgador científico tamén é un magnífico deportista que predica co exemplo. Pronto estará novamente connosco.

Galería Fotográfica