O pasado venres, dous xogadores da SD Compostela visitaron o noso centro e conversaron con nós sobre como foi a súa traxectoria ata chegar ao seu actual equipo, ou como é o día a día no seu traballo. Eles eran Álvaro Casas, natural de Santiago de Compostela, e Aythami Perera, xogador canario que vive en Galicia a súa primeira experiencia fóra das illas.

Con eles, tamén abordamos outras cuestións, como os hábitos de alimentación, as horas de descando ou a violencia no deporte. Para rematar fixemoslles moitas preguntas e convidaronnos a ir velos ao estadio Vero Boquete de San Lázaro no seu partido do domingo contra o Boiro.

Durante esta semana, membros do equipo de béisbol Los Leones, axudáronnos a descubrir e practicar un deporte que para moitos non era moi coñecido. Para outros si, pois no noso cole temos varios alumnos que o practican habitualmente. Puidemos desfrutar dunha bonita experiencia, practicar deporte e moitos coñecer unha modalidade deportiva, que quen se sabe se no futuro a escollemos como práctica habitual para desfrutar do noso tempo de ocio.

Álbum: Curso 2018 - 2019 -> Béisbol

O pasado venres tivemos a visita dos xogadores do Santiago Futsal, e non foi unha visita calquera. Explicáronnos como era o día a día do seu deporte, do que máis e do que menos lles gusta, asinaron autógrafos, agasalláronnos con entradas para ir velos xogar e..falaron da importancia da reciclaxe, dándonos trucos para aforrar auga ou luz, concienciandonos da importancia do mesmo.

.

Álbum: Curso 2018 - 2019 -> Santiago FutSal

Chegou o gran día. Hoxe, ademais de comezar o inverno oficialmente, é o derradeiro día de clase deste trimestre e os nenos e nenas do CEIP Plurilingüe de Sigüeiro están moi emocionados polas actividades da xornada. 

Ás 10h comezaba a recepción de Melgasar, o carteiro real das súas Maxestades de Oriente. E vaia calorosa benvida lle deron os nenos/as de infantil!

Na biblioteca comezaban os primeiros talleres de maquillaxe e perruquería, e no patio cuberto os xogos de Xandobela! Que ben o están a pasar!

Álbum: Curso 2018 - 2019 -> Nadal 2018

Este luns tivo lugar a III Carreira de Mamás e Papás Noeles. Este ano o percorrido iniciouse no pavillón municipal e discorreu pola rúa Pablo Iglesias. Á chegada á meta, fíxose entrega a pequenos/as e maiores dun diploma e dunha merenda para recuperar forzas. Despois, ata houbo quen se animou a botar un baile!

Álbum: Curso 2018 - 2019 -> III Carreira de Mamás e Papás Noeles

O venres 14 de decembro os nenos/as de 1º e 2º foron ao Museo Etnolúdico de Galicia, coñecido como Melga, que está en Ponteceso.

Ricardo, o dono do museo, explicounos moitas cousas sobre os xogos e deportes tradicionais de Galicia, España e o mundo, expostos na sala. Xogamos á silla da reina (agora sabemos colocar ben os brazos), á ra, ao varapau, ao tirafungueiro... Tocamos a trécola, máis coñecida como a carraca ou o tastarabán. Tamén nos ensinou o roncollo, que fai un ruído moi parecido ás rás.

O tempo pasou moi rápido pero pasámolo moi ben. Os nosos pais e avós non tiñan xoguetes coma nós, pero pasábano en grande con todos estes xogos. 

Álbum: Curso 2018 - 2019 -> 1º e 2º en Melga

O venres 5 de outubro durante o recreo, os nenos e nenas do noso cole que practican patinaxe e hóckey no Club Patín Oroso mostráronnos as súas dotes sobre os patíns, facéndonos desfrutar e coñecer un pouquiño máis estes deportes.

Álbum: Curso 2018 - 2019 -> Patinaxe

Nos primeiros días de cole, durante as clases de Educación Física, cada grupo tivo unha sesión de tenis de mesa dirixida polos compeñiros e compañeiras do Club Oroso TM. Foron unhas xornadas distintas, dinámicas e divertidas que nos achegaron á práctica dun deporte que para algúns xa era coñecido pero que para outros era novidoso.

Álbum: Curso 2018 - 2019 -> Tenis de mesa.

E se hai poucos días unha alumna de 6º curso do noso centro, Carla Veiga, se facía merecedora do Recoñecemento Especial á Promesa no eido cultural pola súa habilidade tocando o violín, hoxe tócalle a outra alumna do noso colexio por destacar en varias disciplinas deportivas. Estamos a falar da alumna de 5º curso Laura Ruíz, finalista na fase provincial das carreiras de campo a través do programa Xogade e que practica futbol e hóckey entre outros deportes. Non podemos estar máis orgullosos de que dúas alumnas do noso centro destaquen en ámbalas dúas disciplinas. Parabéns!

O pasado venres, alumnado e profesorado de 5º e 6º de Primaria do noso centro e tamén do CEIP do Camiño Inglés, propuxémonos percorrer o trazado do Camiño Real ou Inglés polo noso concello. Contamos coa presenza de Manuel Pazos, historiador e responsable da biblioteca pública municipal. Desprazámonos en bus ata Carrás, na localidade de Montaos nos límites do veciño concello de Ordes. Dende alí, comezamos a camiñata pola Baxoia cara Deixebre. Tras achegarnos á antiga reitoral para observar o reloxo de sol, paramos a descansar e merendar na milagreira Fonte da Santiña, sempre atentos/as ás explicacións de Manolo. Despois continuamos por Oroso, onde paramos a visitar o Castro de Vilalbarro, un dos mellor conservados do concello coa súa croa e o seu foso. Continuariamos por Oroso Pequeno, e atravesando o Parque do Carboeiro entrariamos en Sigüeiro. A última parada sería a Ponte Medieval de Sigüeiro, que delimita Oroso e Santiago. Baixamos a observar os seus arcos e voltamos ao colexio.

Álbum: Curso 2017 - 2018 -> Tramo do Camiño Inglés