Actividades

Alumnado de 4º ESO, 1º e 2º Bacharelato asiste á charla do profesor da USC José Edelstein

Sáb, 25/03/2023 - 20:57 — IES de Valga

Na mañá do venres 24 de marzo e, no espazo da Biblioteca, tivo lugar unha interesante charla de José Edelstein, investigador, divulgador científico e profesor de Física Teórica da USC. Durante máis dunha hora, o alumnado de Física de 4º ESO, 1º e 2º Bacharelato puido coñecer de xeito didáctico e ameno aspectos sobre "O Universo" relacionados coa Teoría da Relatividade, a partícula de Higgs, "os buratos negros"...a cosmoloxía en xeral. Lembrar que José Edelstein é autor, xunto con Andrés Gomberoff, do libro «Einstein para perplejos», que obtivo o premio Prismas 2019, ademais dun recoñecido investigador no IGFAE (Instituto Galego de Físicas de Altas Enerxías). A actividade foi organizada polo departamento de Física e Química.

Charla da profesora da USC Marta Lores sobre economía circular e química para alumnado de 4º ESO e 1º Bacharelato

Xov, 01/12/2022 - 19:19 — IES de Valga

O mércores 30 de novembro, o alumnado de Ciencias de 4º ESO e de 1º Bacharelato asistiu, na Biblioteca do noso centro, a unha conferencia da profesora do CRETUS do departamento de Química Analítica da USC Marta Lores. Na súa charla titulada “A economía circular e a química” abordou o desenvolvemento de novos produtos baseados en extractos naturais, contribuíndo á implementación de accións de economía circular en diferentes sectores como o vitivinícola. Así mesmo visibilizou distintos aspectos do papel da muller na Ciencia.

A actividade foi organizada polo departamento de Física e Química. Tamén colaborou a Biblioteca dentro da actividade do mes de novembro como MES DA CIENCIA EN GALEGO NAS BIBLIOTECAS.

'AstrónomAs', unha exposición que divulga a investigación das mulleres astrónomas

Xov, 05/05/2022 - 01:05 — IES de Valga

Este mes de maio, tivemos no corredor da planta baixa do noso centro a exposición: 'AstrónomAs'. Unha exposición patrocinada pola FECYT (Fundación Española para a Ciencia e a Tecnoloxía) e a SEA (Sociedade Española de Astronomía) que busca destacar o papel e o traballo das mulleres na Astronomía, ademais de facilitar a divulgación das investigacións realizadas por mulleres científicas na astronomía e astrofísica, as innovacións afíns e as perspectivas futuras nestes campos. Alumnado de diferentes cursos tiveron ocasión de ollar os paneis desta exposición. A actividade foi organizada polo departamento de Física e Química.

Alumnas de 1º Bacharelato asisten a unha Masterclass sobre física de partículas

Mar, 15/02/2022 - 21:13 — IES de Valga

As alumnas de 1º Bacharelato, Miriam Fontáns e Sheila Piñeiro, asistiron o pasado venres 11 de febreiro a unha Masterclass sobre física de partículas. A actividade consistiu nunha identificación de muons, neutrinos,..., traballando cun simulador dun dos detectores de experimentos do laboratorio do CERN. As alumnas estiveron, en xornada de mañá e tarde, na Escola Técnica Superior de Enxeñería, no Campus Sur da Universidade de Santiago. Esta actividade estaba enmarcada na celebración do "Día da muller e da nena na Ciencia". Foron acompañadas pola profesora do departamento de Física e Química, Teresa Sumay.

Exposición "Modelos atómicos" realizada polo alumnado de Física e Química de 4º ESO

Xov, 02/12/2021 - 13:17 — IES de Valga

O alumnado de 4º ESO da materia de Física e Química elaborou, coa súa profesora Teresa Sumay, unha exposición sobre modelos atómicos que se pode contemplar nos expositores do corredor da planta baixa do noso centro. A actividade estivo enmarcada dentro da conmemoración do "Mes da Ciencia en Galego", que tivo lugar no pasado mes de novembro.