O pasado xoves 30 de marzo o alumnado de Educación Infantil asistiu a plantación de acivros, carballos, abelairas, capudres e pradairos co obxectivo de crear conciencia ecolóxica entre o noso alumnado e a poboación sobre a acción destrutiva dos incendios forestais.
Participamos con esta iniciativa no reto do mes de marzo enmarcada no Proxecto Voz Natura. Esta proposta, foi dirixida a plantar especies adecuadas para protexer os nosos ecosistemas, reducir o cambio climático e frear o deterioro do planeta.
As árbores plantadas polos nosos nenos e nenas están situadas nun espazo cedido polo Concello de Riós xunto á piscina e o Centro de Desenvolvemento Agroforestal. Un espazo que ata o momento estaba despoboado de árbores.Tanto o Concello coma a Consellería de Medio Rural colaboraron con persoal e ferramentas para facilitar a plantación.
A protección do medio ambiente é unha das principais liñas transversais que tentamos impulsar dende o noso centro. Ademais os nosos nenos e nenas tiveron a oportunidade de subir na motobomba e poder regar as árbores. E que ben o pasaron! Ademais agasalláronos cunha botelliña reutilizábel e unha fermosa camiseta.
Queremos manifestar o noso agradecemento para a Brigada de Pazos, ao condutor da motobomba da Pica, a Juan Arcos e ao Axente Ares. Tamén ao Concello de Riós pola colaboración que sempre nos ofrece e a Laura que estivo en representación do mesmo.
#AccionVozNatura, #RetoPlantamos, @voznatura
