Informática

O pasado venres 21 de xaneiro tivemos a visita de Iria Iglesias, deseñadora gráfica publicitaria e ilustradora, cofundadora de Estudio Gnomo e coilustradora de libros como O raposo Rufo, Pelo de Nube ou o derradeiro libro de Xosé Neira Vilas, Galicia, nosa ledicia.

Impartiu un obradoiro de introdución ao deseño gráfico orientado á web para o alumnado de 2º do CS de Desenvolvemento de Aplicacións Web, en dúas quendas, para que puidese asistir o alumnado de ordinario e de persoas adultas.

Onte tivo lugar no noso centro o concurso anual de Montaxe de Ordenadores. Neste concurso, o alumnado dos ciclos da familia de Informática clasificado nas roldas preliminares compite para demostrar que é quen de montar un equipo informático no menor tempo e da mellor maneira posible.

O campión da quenda de réxime ordinario Juan Fernando Veiga Costas do CM de Sistemas Microinformáticos e Redes enfrontouse na fase final ao campión da quenda de réxime de persoas adultas José Manuel González Rosende, do CS de Administración de Sistemas en Rede, quedando campión absoluto o primeiro. Noraboa!

Hoxe luns 27 de xaneiro recibimos de novo no noso instituto a Jairo Chapela Martínez, que nesta ocasión impartiu un obradoiro ao alumnado de 2º do CS de Despregamento de Aplicacións Web do réxime ordinario.

Neste obradoiro coñecemos as vantaxes de desenvolver aplicacións con tecnoloxías web facendo uso da nube cunha arquitectura serverless. Falamos da evolución dende as aplicacións monolíticas aos servizos baseados en funcións, pasando polos microservizos.