Skip to Content

Actividades

Actividade De bo rollo!

O martes 7 de xuño o alumnado de 4º ESO recibiu unha charla sobre sexualidade, diversidade e xestión saudable das relacións, impartida por dúas educadoras sociais do centro de sexoloxía Con mucho gusto!: Lucía Álvarez e Sabela Maceira.

Puede ser una imagen de 2 personas y personas de pie

Os eixes transversais nos que se centrou a xornada foron:

- O autocoñecemento do corpo

- A xestión das emocións

- O bo trato e a autoestima

Traballouse a comunicación asertiva, a posta de límites e a negociación para garantir as relacións desexadas libres de coacción e violencias.

 Moi contentos/as e satisfeitos/as con esta actividade, organizada por Vicedirección e o departamento de Orientación.

Charla Forzas Armadas

Rematamos as actividades antes de Pascua cunha charla das Forzas Armadas, celebrada o venres 8 de abril e dirixida a alumnado de 4º ESO curso de FP Básica, tanto de Administración e Xestión como de Electricidade e Electrónica.

Esta xornada, organizada polo departamento de Orientación, pretendía achegar a estas rapazas e rapaces o oficio militar como unha posible saída profesional a ter en conta.

Obradoiros de Educación afectivo-sexual

O pasado mércores 6 e xoves 7 de abril impartíronse no noso IES os obradoiros de Educación afectivo-sexual de QUÉROTE+, Centro de Información e Asesoramento para a Mocidade, promovidos polo departamento da Dirección Xeral de Xuventude, Participación e Voluntariado da Xunta de Galicia, e dirixidos ao alumnado de FP Básica e de 3º ESO.

Os OBXECTIVOS acadados co desenvolvemento deste programa foron os seguintes:

  • Desmantelar mitos, estereotipos e falsas crenzas presentes na sexualidade
  • Estimular a valoración crítica dos mozos e mozas no acceso e análise da información sobre sexualidade
  • Impulsar a perspectiva da diversidade
  • Favorecer a autonomía reflexiva e construtiva de rapaces e rapazas na construción da súa identidade

Esta actividade foi organizada polo departamento de Orientación.

Encontros virtuais da USC

Anunciamos os Encontros Virtuais da USC, que terán lugar do 7 ao 13 de abril, dirixidos moi especialmente ao estudantado de 4º de ESO, Bacharelato e Ciclos Formativos de Grao Superior, co obxectivo de que poida conectarse por videoconferencia cos responsables e estudantes das titulacións para resolver as súas dúbidas sobre a oferta de titulacións da Universidade de Santiago de Compostela.

Máis información premendo aquí.

Charla GenTech

O pasado venres 25 de marzo, a empresa Altia impartiu unha interesantísima charla organizada polo departamento de Orientación e dirixida ao noso alumnado de 4º ESO e 1º Bacharelato, na que se trataron, a través da experiencia persoal das persoas ponentes, os seguintes aspectos:

  • A capacitación dixital como ferramenta de traballo.
  • As saídas profesionais das carreiras STEM.
  • O traballo en equipo.

Sen dúbida, temas importantes nun futuro cada vez máis próximo para esta rapazada.

Charlas Garda Civil

O pasado xoves 24 de marzo o alumnado de 1º ESO, 2º ESO e 1º curso de FPB recibiu unha charla sobre Uso das Tecnoloxías, impartida pola Garda Civil. Esta actividade está enmarcada dentro do Plan Director da Mellora da Convivencia e Mellora da Seguridade nos centros educativos e as súas contornas.

Ás rapazas e rapaces explicáronselles, entre outros aspectos, a importancia das normas de ciberseguridade ou do emprego correcto das redes sociais (ex.: como actuar ante casos de ciberacoso).

Esta actividade foi organizada polo departamento de Orientación.

Comando Igualdade

Encadrado dentro do programa do 8M, este xoves 17 de marzo o alumnado de 1º Bacharelato asistiu, no Auditorio de Padrón, a unha actividade organizada pola asociación feminista Mulleres en Padrón, en colaboración co CIM Terras de Iria, o Concello de Padrón, a Vicedirección e o departamento de Orientación.

A xornada consistiu na presentación do proxecto por parte da filósofa Chis Oliveira, tras a cal se deu paso á intervención da rapazada do Comando Igualdade formada no IES Alexandre Bóveda de Vigo. O obxectivo era achegarlle o traballo desenvolvido polo Comando ao noso alumnado a través da súas propias experiencias, e abrir un debate entre a mocidade sobre cuestións relacionadas coa igualdade: estereotipos, relacións tóxicas, machismo, feminismo, etc.

Charla sobre as probas ABAU

Onte o alumnado de 2º Bacharelato asistiu a unha charla informativa sobre as probas ABAU, organizada polo departamento de Orientación e impartida polo profesor emérito da facultade de Matemáticas da USC, Luis Hervella Torrón, quen resolveu todas as dúbidas das nosas alumnas e alumnos de xeito ameno e didáctico.

O noso máximo agradecemento ao profesor Hervella por axudar ao noso alumnado a achegarse a estas probas de forma tranquila, serena e sobre todo moi positiva!

8M, Día Internacional da Muller

Hoxe, 8 DE MARZO, celebramos no noso IES o DíA INTERNACIONAL DA MULLER:

  • Repartíronse MÁSCARAS MORADAS ao alumnado, profesorado e persoal non docente.

  • Elaborouse un MANIFESTO, cuxa lectura, megáfono en man, correu a cargo de varias alumnas de 2º Bacharelato e Ciclo Superior durante o 2º recreo na explanada do centro. Parabéns para elas, e o noso máximo agradecemento por participaren na iniciativa. Podedes ler este manifesto aquí.

Agradecemos tamén a todo o profesorado, alumnado e persoal non docente a súa colaboración e participación neste acto para visibilizar a necesidade dun mundo máis igualitario, xusto e libre, tal e como dixeron as rapazas na súa lectura.

Para pechar a efeméride, o vindeiro xoves 17 de marzo, o alumnado de 1º Bacharelato asistirá á actividade Comando Igualdade, no Auditorio de Padrón, xunto a alumnado doutros centros da zona.

Visita ás facultades da USC

Como parte do programa "A Ponte entre o ensino medio e a USC", o alumnado de 1º Bacharelato tivo a oportunidade de visitar as facultades da Universidade de Santiago de Compostela na actividade "ENCONTROS na zona USC".

As alumnas e os alumnos fixeron un percorrido por ambos campus, para achegarse á formación académica universitaria que moitos delas e deles comezarán nun ano. Esta saída foi organizada polo departamento de Orientación, e os titores de cada grupo foron os profesores acompañantes.

Distribuir contido