Hoxe é 8 de Marzo, día da Muller, e Raquel O. Brea e Miguel B. Lesta fixeron unha vídeo-homenaxe coa fin de celebrar o día, recopilando o esforzo de varias persoas por reproducir a situación da muller na sociedade actual.

O mércores 24 de febreiro o alumnado de 4º ESO coa materia de Educación Plástica e Visual desenvolveu un obradoiro intensivo de serigrafía dirixido por Andrea Fernández de La Platanera. Ao longo de dez horas de traballo o alumnado puido aproximarse aos diferentes aspectos desta técnica, elaborando as súas propias imaxes dende a realización de fotolitos e pantallas ata a estampación seriada sobre téxtil cartolina, cartón e madeira.

O alumnado de Lingua Galega de 1º de Bacharelato e o de 2º que cursa Arte ou Literatura Universal, tivo a oportunidade de achegarse á cultura monacal en Galicia in situ coa visita a un dos mosteiros galegos de máis sona: Oseira.
No interior do mosteiro visitamos con guías a igrexa cisterciense, o refectorio, a sala capitular ou sala das palmeiras, a acolledora biblioteca, a famosa escaleira pétrea, os claustros de diferentes estilos e algunhas estancias especializadas en traballos monacais diversos coma a botica, o scriptorium, o museo etnográfico da pedra, etc.
Nunca hai que esquecer un breve paso pola tenda dos monxes para degustar algunha delicatessen irresistible coma o chocolate, as pastas, os queixos ou os licores.
Moit@s picamos!

Estamos de noraboa! A nosa alumna de 4º de ESO Belén Moldes conseguiu o premio accesit de 4º de ESO na VII Olimpíada de Xeoloxía celebrada o mércores 17 na Facultade de Bioloxía en Santiago.

Parabéns Belén!

O martes 23 de febreiro o alumnado de 1º de Bacharelato e de 2º de Bacharelato que cursa Literatura Universal  visitará o Mosteiro de Oseira (igrexa, claustros, sala capitular e biblioteca) na actividade organizada polos departamentos de Lingua Galega e Xeografía e Historia.

A actividade desenvolverase de 8:25 a 14:05 h.

O martes 16 de febreiro de 2016 o alumnado de 3º ESO participou nun obradoiro de serigrafía impartido por Andrea Fernández de La Platanera.

A sesión teórico-práctica desenvolvida introduciu ao alumnado nesta técnica de impresión a trávés dunha demostración das diferentes fases do proceso.

Os/as alumnos/as realizaron cadansúa serigrafía que puideron complementar e personalizar cuns selos tallados en goma con técnicas xilográficas.

O alumnado de Tecnoloxía Industrial e Debuxo Técnico de 1º de Bacharelato obtivo o primeiro premio no concurso "Sensores para todos" organizado por Igaciencia en colaboración coa S. X. de Política Lingüística.

O traballo presentado é un sensor localizador de zonas escuras que combina unha pequena cámara, unha placa Arduino, unha Raspberry Pi, e diversos compoñentes electrónicos; todo montado sobre unha estrutura traccionada con motores de continua.

O alumnado participante ideou, deseñou, construiu e programou o robot no contexto dun proxecto interdisciplinar, no que destaca, á marxe da gran calidade do resultado final, o nivel de implicación e iniciativa persoal e o interese por ampliar coñecementos.

O alumando de 4º ESO que cursa Tecnoloxía, recibiu neste mesmo certame unha mención especial ao conxunto dos seus traballos.

As propostas presentadas regulan o comportamento de sensores e actuadores mediante o uso dunha placa Arduino e diversos programas escritos polo propio alumnado.

A nova no portal da Xunta de Galicia.

El Correo Gallego: "Brión rinde homenaxe ao alumnado do IES polos triunfos nos premios de robótica".

Black Shadow é unha curtametraxe realizada no curso 2014/15 polo alumnado que asistiu ao taller de cine do IES de Brión que dirixe a profesora Ana Cadenas. Este traballo foi concibido e realizado integramente polo alumnado participante (guión, gravación, montaxe, música…) con recursos escasos, pouco tempo, presuposto cero e moita colaboración por parte de alumnado e profesorado.
De que vai? Pois do último día de clase dun profe de inglés . Tedes que vela.

Dentro do programa " A ponte entre o ensino medio e a USC", no que participa o IES de Brión están programadas as seguintes actividades:

Charlas temáticas:

• " Impacto do radón en Galicia", impartida por Dolores Cortina Gil, o 14 de xaneiro de 11:15 a 12:05 para o alumnado de 4º de ESO, 1º de Bacharelato e 2º de Bacharelato.

• "Modelado 3D de obxectos reais por xóvenes escolares", impartida por Juan Ortiz Sanz, o 27 de xaneiro de 10:25 a 11:15, para o alumnado de 4º de ESO.

• " O control da información nos medios de comunicación: a censura e a manipulación", impartida por Xosé Soengas, o 5 de febreiro de 12:25 a 13:15 horas, para o alumnado de 1º e 2º de Bacharelato

• " A ponte entre o ensino medio e a USC", o 11 de febreiro de 11:15 a 12:05, para o alumnado de 1º  e 2º de Bacharelato.

Visita á USC, o día 3 de febreiro de 9:15 a 14:05, para o alumnado de 1º e 2º de Bacharelato.