Na conmemoración do día Internacional da nena e muller na Ciencia dúas excelentes profesionais  impartiron  charlas no IES de Brión achegándonos de forma sinxela á Intelixencia Artificial.

O pasado venres 11 de Febreiro en conmemoración do día da muller e a nena na ciencia Julia González e Valeria Torres acudimos a unha masterclass sobre física de partículas organizada por alumnas de doutorado en distintas ramas da física. Á masterclass acudimos 40 alumnas de 20 centros distintos e 20 profesores/as. 

Ao chegar visitamos as instalacións da Escola Técnica Superior de Enxeñaría, e asistimos a dúas charlas teóricas básicas sobre física de partículas para aprender os fundamentos que posteriormente empregaríamos nos obradoiros prácticos. 

A continuación realizamos a parte práctica na que tiñamos que buscar a traza das partículas que se xeran nos aceleradores de partículas do CERN,  analizamos datos reais!

Tivemos un descanso para xantar dunha hora co resto de alumnas no comedor universitario. 

Nas últimas horas da xornada debatemos sobre os resultados da análise do CERN e principalmente sobre o papel da muller na ciencia e nas carreiras STEM.  Por último sobre as conclusións que sacamos falamos e conversamos nunha videoconferencia en inglés con investigadoras do CERN.

Por último fixemos unha ronda de preguntas coas organizadoras sobre o aprendido na xornada e sobre a súa vida como investigadoras e científicas nun sector dominado por homes. Gustaríanos destacar o xenial que foi vivir unha experiencia coma esta, e máis cando estivo organizada integramente por mulleres investigadoras que queren difundir a súa vida e carreira a rapazas novas para fomentar a ciencia no xénero feminino.

Unha representación do alumnado de 4º de ESO e 1º de Bacharelato participou na XIII Olimpíada de Xeoloxía celebrada o 16 de febreiro na Cidade da Cultura.

Parabéns a todos eles e elas, especialmente a Maruxa Garaboa Penabad polo premio accésit de 4º de ESO e Eirena Souto Pazó polo 1º premio acadando a máxima cualificación na sede provincial de Coruña, formando parte do equipo galego para representar á nosa comunidade na fase nacional que se celebrará  o vindeiro 26 de marzo en Almería.

                  Noraboa

Co gallo da celebración do 14 de febreiro, internacionalmente coñecido coma o Día de San Valentín ou Día dos namorados, o noso alumnado de 4º ESO afondou sobre os mitos do amor romántico e participou, en colaboración coa área de Igualdade do Concello de Brión e Psiconova, nesta Contracampaña ao 14F en ton humorístico.

Aquí vos deixamos diferentes TikTok co noso alumnado como protagonista. Esperamos que os desfrutedes e que vos sumedes tamén a rachar con estes mitos! ♥︎

Marta e Fernando (4º ESO C)

Álex e Álvaro (4º ESO C)

Antela (4º ESO B)

Marta e Candela (4º ESO C)

Paula e Sahínza (4º ESO C)

Candela e María (4º ESO C)

E grazas a todxs polo voso traballazo!!

Este pasado venres 21 de xaneiro o alumnado de Ciencias de 1°Bacharelato visitamos a Aula aberta á Tecnociencia na escola de Enxeñaría de Minas e Enerxía, en Vigo. Asistimos a un obradoiro no que falamos da percepción das cores e a luz, e outro sobre realidade aumentada.

No primeiro aprendemos sobre as ondas e como segundo a súa lonxitude percibimos distintas cores. Falamos do cor rgb (vermello, verde, azul) e da formación do resto das cores en base a estas.
No segundo obradoiro puidemos manipular un simulador de relevo que permitía observar como afectaría unha inundación a unha que ti mesma modelas. 

Martina Sambade Formoso, Eirena Souto Pazó, alumnas de 1º A Bacharelato

O xoves 20 de xaneiro o alumnado de 3º de ESO recibiu formación no Obradoiro Pilabot: recicla con enerxía sobre a importancia da recollida selectiva, a reciclaxe de pilas e sobre a participación nos concursos de recollida de pilas e acumuladores e o concurso artístico #EuSonPilabot.

Animamos á comunidade escolar a colaborar na recollida de pilas e baterías gastadas, depositándoas no contenedor da entrada ata o 24 de febreiro.

O programa Tecnólog@ por un día ofrece a oportunidade a alumnado galego de visitar instalacións de empresas relacionadas co sector TIC de Galicia para que poidan experimentar en primeira persoa unha xornada laboral con profesionais deste campo.

O pasado 3  de Decembro Carlos M. e Valeria, alumnos de 1º de Bacharelato do IES de Brión, pasamos un día nas instalacións de Televés Corporation e coñecimos unha empresa multinacional moderna e automatizada que produce desde cero todo o produto e subproduto co que traballa. Na primeira metade do día visitamos Gsertel, que é unha empresa pertencente ao grupo Televés que monta, revisa e programa unha ampla variedade de produtos cos cales  miden, analizan e diagnostican sinais de radio e televisión de forma portátil. Nas súas instalacións visitamos as diferentes estancias nas que Gsertel leva a cabo o seu cometido dentro do grupo Televés. Posteriormente unímonos a alumnos de  outros centros na fábrica de Televés na que se leva a cabo a elaboración da totalidade dos produtos comercializados pola multinacional. Alí puidemos observar a fabricación de forma parcialmente automatizada de todos os compoñentes cos que conta o produto final.

Ambos animaríamos a todo o que tivera a oportunidade de presentarse a algún programa deste tipo xa que é unha experiencia inesquecible que persoalmente recomendamos e se tiveramos oportunidade repetiriamos.             

Valeria Torres Lago Carlos M. Domínguez Carballo, 1º Bacharelato A

BACHARELATO (SEMANA DO 7-11 DE FEBREIRO)

E.S.O. (SEMANA DO 21- 25 DE FEBREIRO)

O pasado 16 de decembro o alumnado de Tecnoloxía de 4º de ESO asistiu ao Obradoiro "A tarifa da luz" impartido polo Instituto Galego de Consumo e da Competencia, onde recibiron formación básica sobre a factura eléctrica e medidas para un consumo responsable, como a consulta da páxina web: https://tarifaluzhora.es/ para coñecer o prezo da luz por horas no día seguinte.