”O comezo é máis da mitade da totalidade.”
Aristóteles.
Non fixo falta que nos convenceran, temos espazo, material e ganas. Así que imos comezar un club de programación e robótica no noso instituto, funcionará como unha actividade complementaria. A ver que tal nos sae, os comezos son duros.
Somos un grupo de alumnos e profes do IES A Basella en Vilanova de Arousa interesados en robótica, programación, impresión 3D e as tecnoloxías disruptivas, por iso creamos este club.
A nosa primeira idea é dividirnos en grupos por intereses, constituír unha xunta directiva e xuntarnos polo menos dous recreos á semana. Depende da cantidade de xente que mobilicemos imos ir especializándonos en diferentes temas, os nosos intereses son moitos. Queremos presentarnos á Competición de robótica da Escola de Enxeñería Industrial da Universidade de Vigo; tamén mellorar e facer programas en Scratch e en Python; o profe de tecno quere facer un mClon; a profe de física quere desenvolver simulacións en Scratch; mólanos a Intelixencia Artificial e non sabemos cantas cousas máis.
Hoxe fixemos a nosa primeira reunión e tratamos os seguintes temas:
- Estrutura do club.
- División en grupos de traballo
Rubén e Julián presentáronnos a estrutura do club e os campos de traballo que podemos elixir:
- Desenvolvemento de algoritmos a probar nos mBots para a competición de robótica da EEI (Escola de Enxeñaría Industrial) de Vigo. O prazo de matriculación para a competición comeza hoxe.
- Coder Dojo: Desenvolvemento de programas para aprender Scratch e Python. Xa temos toda a documentación ultimada para entrar na rede da Raspberry Pi Foundation, se consolidamos as sesións e somos capaces de avanzar en proxectos, igual abrimos o noso Dojo a máis persoas da nosa comunidade educativa.
- mClon. Poderemos tentar desenvolver un mClon, aínda que igual é un proxecto a medio prazo. Os frikis do hardware e a impresión 3D teñen un bo campo para explorar.
- IA. A intelixencia artificial é un tema que nos interesa, dedicaremos unhas horas para ver como implementar algoritmos en Scratch que a usen.
- Charlas con expertos. Convidaremos a expertos da nosa zona para que nos axuden e poidamos aprender cousas novas.
O noso primeiro paso será crear unha canle de discord para manter discusións e axudarnos en liña.
