CEP Plurilingüe Pedro Caselles Beltrán
O portal do Colexio Pedro Caselles Beltrán, antes Colexio do Mosteiro

Actividades Complementarias

ENTROIDO 2020

Hoxe día de xogos e diversión no CEP Pedro Caselles. Celebramos un entroido que xiraba arredor do proxecto E-comedor. Camareiros, cociñeiros, plantas, ratiños, queixos, deportistas e oficios de sempre encheron as rúas de Tomiño neste día primaveral.

E logo seguimos coa diversión, primeiro degustación dos doces do Certame Gastronómico aportados polas familias e logo xogo e máis xogo, non en van, temos o mellor patio de xogos do mundo!

Para ver tódalas fotos preme na imaxe.

ACTO POLA PAZ 2020

O 30 de xaneiro conmemoramos o día da Paz, e cada ano no CEP Pedro Caselles facemos un acto pola paz. Este ano o mal tempo obrigounos a aprazar a actividade ao luns 3 de febreiro.

Nenas e nenos saíron ao patio armados con desexos de paz para conmemorar este día. O alumnado situouse facendo un gran semicírculo arredor dun burato feito no patio para plantar unha árbore.

Primeiro cada nena e neno depositou un desexo de paz nunhas caixiñas metálicas, que foron enterradas a carón da árbore que se plantou.

Logo membros do grupo ecolóxico procederon a plantar un carballo, unha emblemática árbore da que non temos ningún exemplar no noso recinto. Esta árbore foi plantada en homenaxe a Puri, unha profe do noso cole que nos deixou para sempre o ano pasado.

E como remate Nadim, Unay e Alfredo tocaron o himno da alegría coas súas frautas.

Dende o CEP Plurilingüe Pedro Caselles Beltrán queremos agradecer a Comunidade de Montes da Parroquia de Tomiño a súa colaboración neste acto, pois puxeron a nosa disposición persoal para preparar o terreo e fixeron a donación do carballo.

Para ver máis imaxes, preme na foto.

FESTIVAL DE NADAL 2019

Xa rematou o noso primeiro trimestre de traballo, xa vai chegando o Nadal e as vacacións, ben merecidas, por certo, e como despedida de trimestre o noso Festival de Nadal.

Festival cheo de música, baile, teatro e humor. Nenas e nenos de tódolos cursos subiron ao escenario e deron o mellor de si mesmos.

Por certo, sorpresa antes do Festival, pois recibimos a visita de Papa Noel, foron as mamás da directiva da ANPA Mosteiro as que o deron convencido de que viñera ata o Caselles a saudarnos e a recoller persoalmente as nosas cartas. Moitas grazas ANPA Mosteiro, que sorte temos de tervos!

E para rematar, chocolate e rosca para todos e todas.

Se queres ver tódalas fotos do día, preme na imaxe.

 

MAGOSTO 2109...POR FIN!!!

Por fin demos celebrado o Magosto no Caselles. Un magosto un tanto deslucido, pois despois de tanto aprazamento decidimos facer só o asado de castañas, deixando para outro curso os cross de outono e os xogos tradicionais. O tempo deste outono non permitiu outra cousa.

Se queredes ver as fotos deste magosto, premede en fotos, e accederedes a reportaxe do evento, feita polo alumnado de 5º e 6º curso.

FOTOS

SAMAÍN 2019

Hoxe no CEP Pedro Caselles foi un día terrorífico, bruxas, vampiros, mortos viventes... encheron as nosas aulas.

Nenas e nenos, coa axuda das súa familias, ademais de vir terroríficamente disfrazados, trouxeron cabazas para a xa habitual exposición que facemos tódolos anos.

As profes de inglés tamén fixeron actividades para a ocasión, solo que elas lle chaman Halloween...

Os máis pequenos do centro foron os máis implicados, pois ao longo da semana estiveron preparando o mural e facendo debuxos de medo. Tamén estiveron na biblioteca escoitando historias de medo, pero sen vampiros, momias, homes lobo... eran historias de medo de Tomiño: A Santa Compaña, o Tardo e a Mariamanta...

Para ver tódalas fotos, preme na imaxe.

Móllate polo río!

 

O 27 de setembro adiantámonos á iniciativa global de Galicia, e No Caselles realizamos a nosa tarefa de recoller todo o lixo que poidera haber na marxe do río Pego, dende a ponte do cruce para Vilachán ata 500 metros río arriba.

Non quedou máis que natureza, logo do noso paso.

Pero, sabedes que?     Case non había nada que recoller!!

Este treito do río está moi limpo, grazas ao esforzo continuado dos nosos voluntarios que todos os anos revisan, controlan e coidan.

Lixo recollido (plásticos e papeis):  8 Kg.

Mollámonos polo río!!

FESTIVAL FIN DE CURSO 2019

E xa chegamos ao remate deste curso 2018/2019. Xornada de alegría pola proximidade das vacacións e do descanso, pero tamén xornada triste porque nos deixa un grupo de nenas e nenos que leva connosco uns anos e aos que lles desexamos a mellor das sortes na súa nova etapa.

Coma sempre tivemos o nosos festival para dar a benvida ao verán e para despedir como se merecen aos nosos compañeiros e compañeiras. Música e baile de tódolos países do noso Uncastour, baile moderno, chistes, teatro e regueifas. Variedade e diversión.

En setembro novos comezos e novas ilusións.

Para ver tódalas fotos do día preme AQUÍ

 

QUEN VIVE AÍ?

No CEP Pedro Caselles seguimos as voltas coa compostaxe. Este ano anotámonos no programa "Revitaliza" da Deputación de Pontevedra. Levamos participado en moitas charlas e actividades, temos unha composteira e caldeiros de recollida de restos orgánicos...

Esta semana nenas e nenos desde terceiro a sexto participaron na actividade "Quen vive aí?", na que uns monitores nos ensinaron a buscar e observar a gran cantidade de invertebrados que viven no compost:  ácaros, colémbola, larvas de mosca- soldado negras, ovos de miñoca, candelas de frade,  insectos bola...unha actividade a mar de interesante na que se aproveitou para usar as lupas binoculares e microscopios que temos no centro.

Para ver máis fotos peme AQUÍ

UN PLANETARIO NO XIMNASIO!

Ao longo desta semana as nenas e nenos do CEP Pedro Caselles  participan nunha actividade moi especial.

Por iniciativa e xestión da nosa ANPA, temos instalado no ximnasio un pequeno planetario aportado pola Fundación La Caixa(Educaixa). Nenas e nenos aprenden sobre nocións básicas de astronomía dunha forma activa e intuitiva. O planetario conta con varias proxeccións adaptadas aos diferentes niveis do  alumnado.

Tamén o  CRA Mestre Manuel Garcés visitará o venres o centro para disfrutar desta actividade.

 

 

 

Distribuir contido