A NOSA RENOVADA BIBLIOTECA ESCOLAR    

De onde vimos? 

No verán de 2020 acometéronse importantes obras de reforma no noso centro. En relación á biblioteca uníronse dúas aulas, cambiáronse as ventás e púxose un chan de tarima. Mercáronse novos estantes, un mesado para colocar os ordenadores e comezou o proceso colocación do mobiliario e traslado de fondos tras un primeiro expurgo dos mesmos.    

Como é a nosa biblioteca?  

Situada no primeiro andar do edificio principal, conta cunha superficie de 100 m2 onde se atopan diferentes espazos dedicados á consulta e lectura equipados con mobiliario cómodo e versátil que permite a realización de diferentes actividades (contacontos, lectura individual e lecturas compartidas, asembleas...). Contamos cun mesado longo para 10 ordenadores con conexión a internet e outros dous portátiles, ademais de 4 tablets. Dispoñemos dun recanto creativo onde dispoñemos de zona de construcións con legos, zona sensorial con mesa de luz e múltiples xogos para desenvolver capacidades lóxicas e creativas.    

Que servizos ten a nosa biblioteca? 

• Préstamo de fondos (nestes dous últimos cursos especialmente a través das bibliotecas de aula que adquiriron especial relevancia neste período de pandemia).

• Apoio e promoción dos proxectos de centro e de aula.

• Promoción e organización de diferentes actividades en datas especiais e conmemoracións.

• Posta a disposición do alumnado e profesorado de recursos tecnolóxicos (ordenadores, tablets) con conexión a internet.

• Emprego das instalacións para impartir determinadas materias, para claustros, titorías e reunións, para actividades puntuais, e establecemento dun horario específico de emprego para cada grupo-aula.

• Apertura da biblioteca fóra do horario lectivo, os martes de 16:30 a 17:30 h. (Dará comezo en función da situación sanitaria existente).

   Cara onde imos?  

A nosa biblioteca está en proceso de continuo cambio e adaptación. No actual curso 2021 – 2022 entramos a formar parte do PLAMBE (Plan de Mellora de Bibliotecas Escolares). Constituíuse un equipo de biblioteca estable que constituíu un grupo de traballo para a mellora da nosa biblioteca.Grazas ao PLAMBE contamos cunha importante dotación orzamentaria que nos permitiu unha renovación e actualización de fondos e outros recursos así como comezar o proceso de renovación do mobiliario e redistribución dos espazos.   

 Queremos seguir con esta liña de traballo para o vindeiro curso: 

 - Continuar adaptando os espazos ás características e necesidades do alumnado tendo en conta os seus intereses, ideas e suxestións.

- Seguir apoiando e promovendo o desenvolvemento de proxectos no centro.

- Conformar un calendario de actividades periódicas de animación á lectura e conmemoracións.

- Seguir a promover a implicación de toda a comunidade educativa no proceso de ensino – aprendizaxe a través das actividades da biblioteca; especialmente das familias.

- Continuar traballando en coordinación coa Biblioteca Municipal implicando ademais a outros axentes sociais como asociacións, residencia Domus VI e o propio Concello.