Vostede está aquíAnimación á lectura
Animación á lectura
Mochilas Viaxeiras
As mochilas viaxeiras levan unha selección de libros, audicións e películas para toda a familia que esperamos que vos gusten. A idea é COMPARTIR en familia o pracer da lectura e do mundo audiovisual.
Vós decidides como, cando, onde… pero sempre intentando que sexa unha actividade CONXUNTA.
En cada mochila vai unha relación do material que contén. É importante que a revisedes antes de entregala para asegurarvos que volve preparada para a seguinte saída.
A mochila chegará un venres a vosa casa e volverá 10 días despois ao colexio. En cada mochila aparecerá a data de volta.
Facédenos saber calquera dificultade ou defecto dos materiais, de xeito que a seguinte familia poida disfrutar da mochila.
GRAZAS por participar e esperamos que gocedes desta actividade.
Club de lectura - Coller as rendas (Yolanda Castaño)
No primeiro trimestre comezamos o club de lectura co alumnado de 1º e 2º curso. O libro que limos foi Coller as rendas, de Yolanda Castaño. Este libro de poemas conta como o ourizo, a carracha, o teixo, o sapo, a cascuda e moitos animaliños máis teñen un camiño por trazar. Cada un ten unha historia, cada un ten un camiño e todos son especiais por ser eles mesmos.
Nós fomos lendo na casa e facendo reunións na biblioteca. Nesas reunións fixemos lectura en voz alta e subidas á cadeira ou á mesa. Ler é un acto de rebeldía, de contracorrente, de incomodidade, por iso decidimos romper os moldes e deixar que a lectura nos mova a facer realidade o que nos parece imposible.
Ademais, fixemos un xogo de mesa que consistía en atopar as parellas entre o animaliño e o seu poema. Nas derradeiras reunións quixemos meternos de cheo nos poemas de Yolanda Castaño e decidimos recrear os animaliños cunhas máscaras.
Yolanda Castaño é unha poeta galega que foi galardoada no ano 2023 co Premio Nacional de Poesía pola súa obra Materia. Dicía a autora que "o mesmo mar fai cada día unha distinta praia". Os poemas de Yolanda Castaño seguen abrindo horizontes, e estas lectoras son as que van construír as praias que xa están vindo.
Coller as rendas - Yolanda Castaño de JULIÁN MONTOUTO LÓPEZ
"Bajo las sombras"
O venres 1 de marzo tivo lugar na biblioteca do centro a presentación do libro "Bajo las sombras" do autor Paco (3º de EP). Presentou o acto a súa compañeira de curso, Milena, quen lle fixo algunhas preguntas relativas á obra. Finalizou a presentación, que tivo bastante asistencia, co autor asinando os exemplares que quedarán na biblioteca do centro. Para ver fotos, preme aquí.
Padriños Lectores 2023
Unha semana de abril temos a nosa habitual actividade de APADRIÑAMENTO LECTOR. Os alumnos maiores, despois de practicar moito, lenlle aos máis pequenos diversos contos.
Comezamos o mércores 19 pola tarde. Aproveitando o bo tempo destes días, esta actividade será ao aire libre, gozando dos contos, do sol e da herba.
Para ver fotos, premede na imaxe.
Padriños lectores 2022
O luns 25 e o martes 26 de abril tivemos as nosas xornadas de apadriñamento lector. Os alumnos veteranos de 3º, 4º, 5º e 6º léronlle contos (algúns en inglés) aos seus compañeiros máis pequenos, para que estes gozaran da emoción da lectura.
O tempo foi excelente o primeiro día, así que celebramos a xornada no exterior.
O martes comezamos tamén no exterior pero unhas gotas traidoras obrigaronnos a gorecernos no interior dos cubertos. Premede na imaxe para ver as fotos.
- 1
- 2
- 3
- 4
- seguinte ›
- última »