Neste mes, con motivo da celebración do Día da Muller Traballadora (8 de Marzo), no noso centro leváronse a cabo diversas actividades relacionadas coa IGUALDADE DE XÉNERO.

Elaborouse desde o Equipo de Biblioteca un panel no que se representa informacion sobre diversas mulleres que foron o referente para outras moitas mulleres no mundo. Para dito panel, e relacionando a conmemoración coa tematica central deste curso, escolleuse unha frase de Virginia Woolf:

"Non hai barreira, fechadura nin ferrollo que poidas impoñer á liberdade da miña mente"

Tamén na propia Biblioteca do centro creouse o Rincón da Igualdade, onde os alumnos e alumnas podían ler e consultar información sobre todas estas mulleres que marcaron a historia.

O alumnado de 3º de E.P, na clase de Plástica, plasmou o traballo realizado arredor deste tema nuns carteis.

E o alumnado de 6º de E.P, coa axuda do seu titor Javier, elaborou este conto, onde se representa unha historia familiar sobre a igualdade de xénero, a diversidade de familias e o acoso escolar.

Xa chegou o Entroido!!!!!

O panel da entrada foi feito polos nenos e nenas de 5º A, con refráns e coplas do Entroido.

O tema, como sempre, foi marcado polos equipos de Biblioteca e Normalización, que cun traballo moi coordinado con Actividades extarescolares e toda a Comunidade Educativa deste centro conseguiu tan bos resultados.

FRASES DO NOSO ENTROIDO

Cada grupo elixiu unha frase, que colocou nunha cartolina decorada polos nosos nenos e nenas, e elaborouse un disfrace relacionado con esta temática. Quedou fantástico!!!!

Con motivo da conmemoración da data de nacemento da nosa escritora, Rosalía de Castro; no noso centro fixéronse moitas actividades na semana do 20 e o 24 de febreiro:

• Mural na entrada do colexio e móbiles con carteis de Rosalía, que conteñen poemas da escritora, elaborados por todas as titorías do centro. 
• Recuncho na nosa Biblioteca dedicado á escritora.

• Decoración do salón de actos do centro.  

• Máscaras de Rosalía de Castro coas que se fixo unha foto colectiva no salón de actos, a tarde do 21 de febreiro, durante o acto de homenaxe. No mesmo acto recitaron poemas todas as clases e rematouse cantando todos xuntos "Adiós ríos, adiós fontes".

• Sumámonos á iniciativa da Asociación de escritores/as en lingua galega (AELG) e ademais de facer as máscaras de Rosalía, algúns nenos e nenas do colexio fixéronse unha foto con persoas maiores,  portando algún verso rosaliano ou poema. 

• Participamos na mañá do 23 de febreiro nun programa emitido por Radio Arzúa para recordar a figura da escritora galega.

 PREME NA IMAXE SE QUERES ESCOITAR QUE BEN FALARON

Foi unha semana moi rosaliana!!

O 30 de xaneiro celebramos o Día da Paz xuntándonos todos e todas no salón de actos do colexio. A frase que se escolleu para colocar no mural da entrada do centro pertence a Gandhi: "Se queres cambiar o mundo, cámbiate a ti mesmo". O alumnado de 4º E. Primaria encargouse esta vez de preparalo. Quedoulles moi ben!

O 16 de xaneiro todo o alumnado do centro asistiu a unha exposición de xogos tradicionais organizada polo concello de Arzúa.  Aquí tedes algunhas fotos dese día. 

Este curso estanse promocionando desde o noso colexio produtos típicos de Galicia, como o mel e o queixo. En xaneiro  tocoulle aos nenos e nenas de 3º de E. Primaria participar nunha cata de queixo presentada por Óscar Pérez, secretario xerente do Consello Regulador da DOP Arzúa-Ulloa.

Este ano é o de Carlos Casares.

Tocoulle agora ao alumnado de 4º E. Primaria preparar o mural da entrada do centro. Escolleron para esta ocasión a frase: "Por Nadal un quilo de..." e eles encargáronse de meter dentro de cada saquiño aquilo que todos desexamos levar ás casas dos nosos amig@s e familiares por estas datas. 

 O Equipo de Dinamización da Lingua Galega, xunto co Equipo de Biblioteca, elaborou este díptico para repartir ás familias.  Na contraportada quixemos rendirlle unha pequena homenaxe a Agustín Fernández Paz, e escollemos estas verbas tan fermosas deste escritor galego falecido no 2016.

Para conmemorar esta data, o alumnado de 3º E. Primaria preparou este mural. A frase escollida para o mural é de Malala: "Un neno, un mestre, un libro, un lapis, poden cambiar o mundo". Escribiron ao pé dos debuxos de distintos nenos e nenas do mundo un dereito. No mural da dereita participou todo o alumnado do centro. 

Para conmemorar o Día do nen@ 2016, o Concello de Arzúa ofreceunos unha serie de actuacións na Casa da Cultura. O alumnado de E. Infantil foi o 21 de novembro a ver a representación "Contos para un caldiño", o de  4º, 5º e 6º asistiu o día 23 ao espectáculo musical "O ritmo do Camiño" e o de 1º, 2º e 3º foi o 22 a ver a obra teatral "Espantallo amigo" de Xosé Neira Vilas. 

O alumnado de 3º E. Primaria fixo na clase de Plástica estes espantallos.