Skip to Content

Complementarias

Conversamos con Eva Mejuto arredor da literatura e a vida

Este pasado mércores 19 de febreiro recibimos a visita da escritora Eva Mejuto, que fixo un oco na súa axenda, moi apretada por mor dos preparativos dunha nova edición do Salón do Libro Infantil e Xuvenil de Pontevedra, que ela coordina, para conversar sobre dúas das súas obras, 22 segundos e Memoria do silencio.

E non falamos apenas dun encontro, senón de varios (Galería de imaxes), pois a autora reuniuse en primeiro lugar co alumnado de 2º ESO e, posteriormente, cos membros do Clube de Lecturas pola Igualdade.

Lucía Castrillo e Sabela Magariños conduciron o encontro que Eva Mejuto mantivo co alumnado que leu 22 segundos. Nel, a escritora explicounos como deu o salto da literatura infantil a unha novela coma esta, como foi o seu proceso de creación, das vivencias dos e das adolescentes transexuais e da necesidade de empatizar tanto con este colectivo historicamente silenciado e coas persoas LGTBi como en xeral con todas as persoas que nalgún momento se senten bechos raros nunha sociedade que marca certos patróns de conduta e comportamento que limitan a nosa liberdade para expresármonos tal e como somos e que, en non poucas ocasións, oculta e mesmo persegue a diversidade. O alumnado de 2º ESO, ao que lle encantou a novela, quixo saber máis dos seus personaxes, tanto que Eva case nos anticipa por onde irá a segunda parte desta historia que nos fixo reflexionar sobre a vida e nos emocionou a partes iguais.

A seguir, Laura, Brais, Miguel, Lucía, Abril e a profesora Marta compartiron coa nosa convidada un café, unhas pastas e unha charla moi amena, cercana e enriquecedora sobre Memoria do silencio, unha novela baseada na historia das irmáns Touza, mulleres ourensás que na IIª Guerra Mundial salvaron a vida de centos de xudeus que fuxían da barbarie nazi. Con Eva Mejuto, os nosos lectores e lectoras foron debullando as claves dunha historia que os sorprendeu e atrapou e que xa fora obxecto dunha posta en común na sesión que na tarde anterior mantiveran coa profesora Cristina, a coordinadora do clube, e con Marta.

Dende aquí queremos agradecerlle a Eva a súa xenerosidade e o cariño que mostrou co noso alumnado (grazas pola visita!), así como a Lucía e Sabela pola súa magnífica estrea pública como presentadoras dun coloquio, aos rapaces e rapazas dos clubes de lectura porque nos fan medrar con eles e ás profesoras Merce, Marta e Cris por darlle ao alumnado a oportunidade de achegarse a estas historias. E, como non, á Edicións Xerais por facer posible esta visita.

Obradoiros de Habilidades Sociais

O alumnado de 1º e 2º ESO rematou onte o ciclo de Obradoiros sobre Habilidades Sociais que impartiron durante o mes de febreiro as monitoras de Amaina, Asociación para a Promoción da Saúde, no marco do Programa TI decides!, organizado pola Concellería de Xuventude de Soutomaior.

Estas sesións tiveron como finalidade formar o alumnado en habilidades sociais básicas para mellorar a convivencia e comunicación. Este programa contempla unha segunda parte na que o alumnado que se presente voluntario poderá formarse en Mediación Xuvenil e formar parte do equipo que se vai poñer en marcha no instituto durante este curso.

Esta é unha experiencia piloto promovida pola OMIX en colaboración do Departamento de orientación do centro.

Homenaxe a René Magritte no Club de lectura Petiscos de Arte

Os rapaces e as rapazas que forman parte dos diferentes clubes de lectura do instituto seguen a achegarse aos libros para partillar impresións e vivencias e para gozar, divertirse e aprender coas actividades propostas nas sesións conxuntas. 

Na última reunión do Clube Petiscos de Arte viviron unha sesión un tanto... surrealista. Achegáronse á obra La manzana de Magritte, da colección MOMA, e os resultados do reto proposto, atopar no libro as imaxes inspiradas polos cadros reais do artista, foron sorprendentes e moi creativos.

Non deixedes de visitar o blogue da biblioteca para coñecer o proceso creativo destes grandes artistas do surrealismo.

Soutomaior coa Ciencia

O pasado venres o alumnado de 4º ESO do IES de Soutomaior e o Colexio Apóstolo Santiago participou na presentación do programa “Soutomaior coa Ciencia” no Multiúsos de Arcade. Ademais, asistiu a unha charla impartida de Leticia Costas (Kidcode) sobre o programa de desenvolvemento sostible da ONU.

Esta iniciativa das Concellarías de Igualdade, Xuventude e Educación do Concello de Soutomaior ten como finalidade fomentar a cultura científica entre a cidadanía mediante conferencias e obradoiros talleres interactivos tanto nos centros educativos como en dependencias municipais e desenvolverase ata o 26 de marzo, data na que terá lugar a I Feira da Ciencia. 

Iremos informando das novidades relacionadas con este proxecto, tanto nas actividades que teñan lugar no noso instituto como da programación xeral, que inclúe uns obradoiros para os cales hai que inscribirse en liña.

I Torneo de Xadrez

O Equipo da Biblioteca e o Departamento de Orientación organizan o I Torneo de Xadrez, no que participan 20 alumnos e alumnas dende mediados de xaneiro. As partidas xóganse nos recreos e en breve coñeceremos quen se clasifica para seguir adiante no torneo.

 

Ao teatro co Lazarillo de Tormes

O pasado martes 11 de febreiro o alumno de 1º de Bacharelato e 3º ESO acudiu ao Teatro Provincial de Pontevedra para presenciar a representación teatral do Lazarillo de Tormes, o clásico universal da novela picaresca.

A adaptación teatral da compañía Traseduca tivo moi boa acollida entre o alumnado e o profesorado e serviu para activar, en clave de actualización, a vida de "fortunas e adversidades" de Lázaro, lectura previamente traballada nas aulas.

Presentación das Brigadas ECOlóxicas

No mes de decembro soubemos por primeira vez deste proxecto: as Brigadas ECOlóxicas boataban a andar cunha primeira formación para todo o alumnado de 1º ESO. A alerta verde prendeu nestes mozos e mozas e durante as vacacións de nadal e un grupo de voluntarios e voluntarias seguiu formándose nuns obradoiros específicos que tiveron lugar no Multiúsos de Arcade.

A ansiada presentación dos brigadistas tivo lugar este pasado venres 7 de febreiro durante o recreo. Tras anunciar unha acción sorpresa nos días previos, as Brigadas ECOlóxicas guiaron ata o patio, e ao son da batucada, os seus compañeiros e compañeiras.

Alí deron a coñecer o proxecto e as accións que teñen previsto realizar durante os próximos meses, accións que procuran visualizar o impacto ambiental que os residuos teñen no noso centro educativo e, polo tanto, como pode participar a comunidade educativa para reducir estes refugallos. De momento, xa contamos con bolsas de papel na cafetería para reducir os plásticos dos envoltorios dos bocadillos. Ademais, tamén dispoñemos dunha nova Illa de Reciclaxe, xa instalada xunto ao composteiro, grazas á implicación do Concello. Esta é unha iniciativa promovida pola Concellería de Educación e Medio Ambiente en colaboración co Departamento de Bioloxía e Xeoloxía e o equipo de directivo do centro.

Mais, quen mellor que as propias Brigadas ECOlóxicas para explicarnos o seu labor? Atendede, atendede! Parabéns, brigadistas, e moitas grazas polo traballo que realizades!

 

Galería de imaxes: preme aquí.

Na prensa: Conciencia ecolóxica nas aulas, Faro de Vigo (11-02-2020).

Primeiros pasos do Proxecto París e novidades dos clubes de lectura

Esta semana deu os seus primeiros pasos o Proxecto París, unha iniciativa na que colaboran diversas materias para dotar de contido didáctico a viaxe de fin de etapa de 4 ESO. E fíxoo cun Obradoiro de procura e tratamento de información guiado pola profesora de Lingua Castelá. Neste proxecto voluntario participan 23 alumnos e alumnas que realizarán, entre outros produtos, a Guía de viaxe da cidade visitada.

No blogue da Biblioteca tamén se dá conta das últimas sesións dos Clubes de Lectura. Así, no clube de Igualdade púxose en común a lectura da novela Cabeza de Medusa, de Marilar Aleixandre, mentres que no clube Historias de historia se partillou o cómic de Jaime Martín, Jamás tendré 20 años,

Participación no II Torneo de Debate Académico de Galicia (05-02-2020)

 Máis imaxes aquí.

Un grupo de alumnos e alumnas de 1º de Bacharelato participaron onte na II edición do Torneo de Debate Académico de Galicia, que tivo lugar na Fundación Barrié da Coruña coa presenza de 60 equipos chegados de máis de 30 centros de toda Galicia.

Os equipos formados por Paula, Laura, Anxo, Sabela e Marco e Sofía, Aarón, Daniel, Martina e Gabriel tiveron a oportunidade de debater con outros estudantes sobre unha cuestión complexa mais de grande interese para unha xeración que terá que tomar decisións importantes ante os futuros desafíos que lles tocará vivir: Democracia vs. tecnocracia, que sistema de goberno é máis apropiado para afrontar os retos do século XXI nos países membros da Unión Europea?

Foi unha tarde intensa, esgotadora e de moitos nervios, mais tamén de risos, convivencia e moita aprendizaxe na que debate tras debate foron progresando e atopándose máis seguros e seguras grazas aos encontros cos outros equipos e ás observacións das xuízas e o xuíz que valoraron o seu desenvolvemento. 

Tan só resta estender o noso agradecemento á organización, especialmente a Diego e Alba, así como ao persoal da Fundación, por brindarnos a oportunidade de vivir esta experiencia tan enriquecedora.

E grazas tamén a Rosa, Ania, Nerea, Yaisa e Iria, que arrouparon os seus compañeiros e compañeiras nesta cita.

Pilabot, recicla con enerxía

O programa Pilabot, recicla con enerxía, da Consellería de Medio Ambiente, presentouse onte no noso IES ante o alumnado de 1º ESO, que está participando na campaña de recollida de pilas e alimentadores.

Na charla informouse dos tipos de pilas, as súas partes e compoñentes, as repercusións que teñen sobre o medio, e en que consiste a súa reciclaxe. A nosa convidada concluíu a súa exposición cun xogo de preguntas no que, a traves da aplicación kahoot, se fixeron dous grupos para ver que rapazas e rapaces estiveronmáis atentos. E abofé que o estiveron, porque non erraron nin unha.

Mais esta campaña non é descoñecida para nós porque dende hai dúas semanas temos polo noso centro a Pilabot, un robot que ten que cumprir coa súa misión, protexer o medio ambiente minimizando a contaminación xerada polos residuos de pilas, polo que solicita axuda ás novas xeracións a través dun concurso para centros educativos no que o noso alumnado se está aplicando e moito. Ademais, o centro que máis pilas recolla, terá premio.

Esta iniciativa están sendo organizadas polo Departamento de Bioloxía e Xeoloxía.

Distribuir contido


by Dr. Radut