Skip to Content

Complementarias

Charla sobre ABAU e Universidade (05/02/2020)

O alumnado de 2º de Bacharelato do IES asistiu a unha charla sobre a Universidade e a ABAU impartida por María Teresa Flores Arias, docente da Universidade de Compostela (USC).

Esta actividade forma parte do Programa “A Ponte entre o Ensino Medio e a USC” e ten o obxectivo de  informar e orientar o alumnado, como posible futuro/a estudante universitario, para que poida coñecer e elixir os estudos que máis se adapten ás súas preferencias.

O fío condutor da charla foron as probas de acceso á Universidade (ABAU) e a difusión do que é a Universidade de Santiago de Compostela (titulacións, investigación, residencias, servizos académicos, culturais, deportivos, asociativos, etc).

Resoltas algunhas dúbidas sobre a ABAU, proba que terá lugar os días 9,10 e 11 de xuño, queremos seguir animando ao alumnado de 2º de Bacharelato, dende a certeza de que esforzo e a constancia no traballo ao longo deste curso serán as claves que lles facilitarán o éxito.

Visitamos o Castelo de Soutomaior para achegármonos á figura de María Vinyals

Máis imaxes clicando aquí

Esta mañá o alumnado de 1º de Bacharelato deu continuidade aos seus traballos sobre a figura de María Vinyals cunha visita ao Castelo de Soutomaior no marco do Proxecto Interdisciplinar de Centro Miña casiña, meu lar, que procura darlle a coñecer ao alumnado o patrimonio do municipio, establecendo vínculos cos bens patrimoniais e promovendo procesos para a súa protección. 

Tras se achegaren nas aulas á vida desta precursora do feminismo coa lectura de María Vinyals, un talento rebelde, de Isabel Castro, e de comezar a traballar no xogo teatralizado que desenvolverán en maio, hoxe tocaba coñecer o castelo. Así, repartidos en dous grupos, os alumnos e as alumnas coñeceron, conducidos por Anxo, que realizou para nós unha completa e moi didáctica visita guiada, as épocas máis importantes da fortificación, os elementos arquitéctonicos representativos de cada momento, os usos do castelo e as figuras sobranceiras que o habitaron e lle dan relevancia histórica, como Pedro Madruga e María Vinyals, á que se lle dedica unha sala e que é obxecto nestes momentos dunha exposición sobre a súa traxectoria que reflicte o seu carácter pioneiro no campo da igualdade e da xustiza social.

Aproveitamos a ocasión para agradecer a atención prestada polo persoal do Castelo de Soutomaior así como as facilidades que nos están a dar para xestionar o desenvolvemento do noso proxecto neste espazo.

Ademais de aprender algo máis do noso contorno e destas figuras históricas grazas á visita guiada e á interesante e atractiva musealización do castelo, o alumnado tamén visitou os seus magníficos xardíns, onde coñeceron os espazos e visualizaron os espazos en que vai ter lugar o xogo teatralizado que representarán para os seus compañeiros e compañeiras do instituto.

Visita aos Museos Coruñeses (30-01-2020)

Museos Coruñeses

Accede á álbum de imaxes premendo aquí.

Perto de 100 alumnos e alumnas de 3º ESO e das materias científicas de 1º de Bacharelato  visitaron no día de onte os Museos Científicos da Coruña. As diferentes exposicións, proxeccións e propostas interactivas da Casa das Ciencias, o Domus e o Aquarium Finisterrae atraeron a curiosidade do alumnado, que gozou dunha intensa xornada de aprendizaxe e convivencia na cidade herculina nesta saída que organizou o Departamento de Bioloxía e Xeoloxía. 

Pombas contra valados

Para ver máis imaxes, premede aquí.

Durante estes días o alumnado estivo traballando na conmemoración do Día da Paz e a Non Violencia desenvolvendo diferentes actividades nas titorías e en diferentes materias. A proposta do centro centrouse en visibilizar a permanencia dos valados que hai no mundo, muros da vergoña que separan pobos, xentes, países, etc. mais tamén os muros mentais, fronteiras ideolóxicas que semellan invisibles mais que nos afastan socialmente e limitan as liberdades e os dereitos das persoas e que, en moitas ocasións, derivan en manifestacións violentas e de exclusión social que non deberían ter cabida nunha sociedade democrática.

Fronte aos valados, os rapaces e as rapazas elaboraron pombas de papel que fixeron voar mensaxes pola paz e a non violencia e por un mundo mellor, máis xusto e igualitario. 

Visita ao composteiro comunitario, horta urbana e EDAR de Arcade (23-01-2020)

O alumnado de 1º ESO saíu a coñecer un pouco máis do noso concello da man do Dpto. de Bioloxía e Xeoloxía. En primeiro lugar, coñeceron dúas iniciativas que se están levando a cabo en Arcade dende hai poucos anos como son a compostaxe comunitaria e a horta urbana. Explicóuselles o funcionamento da illa de compostaxe comunitaria, os seus beneficios e a importancia da reciclaxe da materia orgánica. Na horta urbana explicóuselles a estrutura, organizada en bancais, os métodos de plantación, abonado, rega e loita contra pragas baseados na agricultura ecolóxica. Mesmo puideron ver o hotel para insectos que realizaron os rapaces nun taller de nadal no Multiúsos e que se instalou na horta para axudar na loita biolóxica de pragas e atraer os polinizadores.

Xa no peirao, os rapaces e rapazas visitaron a EDAR, onde puideron observar in situ as diferentes fases da depuración das augas residuais, e onde viron tamén os problemas que causan as toalliñas, bastonciños e outros obxectos que se botan polo WC.

Roteiro polas Salinas do Ulló (22-01-2020)

Para ver máis imaxes da actividade preme aquí

O alumnado de 1º Bacharelato, acompañado por Tania e Montse, profesoras de Bioloxía e por Jacobo e Nerea, guías especializados, realizou un roteiro interpretativo por unha zona de especial interese natural e patrimonial da nosa contorna: as Salinas do Ulló, situadas na cabeceira norte da Enseada de San Simón, espazo incluído na Rede Natura 2000 como ZEC (zona de especial conservación).

Os obxectivos didácticos do percorrido foron:

  • Coñecer a historia e os antigos usos tradicionais dos hábitats intermareais, tales como as salinas, a extracción de áridos, os muíños de mareas, o marisqueo ou a pesca típicos da enseada de San Simón.
  • Valorar a zona como refuxio de aves acuáticas migratorias: aves limícolas, zancudas e anátidas procedentes de Europa que atopan na enseada de San Simón un importante lugar de invernada e parada durante as súas migracións.
  • Coñecer a flora e a fauna dos hábitats intermareais, as súas características principais para distinguilas e a súa función ecolóxica na enseada de San Simón.
  • Valorar o hábitat da desembocadura do río Verdugo e a súa función dentro da dinámica dos ríos na formación do hábitat intermareal da Enseada de San Simón.

Esta saída desenvolveuse no marco do Programa Municipal “Roteiros Medio ambientais: coñece o teu Concello e arredores” organizado pola Concellería de Educación e a OMIX de Soutomaior en colaboración co Departamento de Bioloxía e Xeoloxía do IES.

Préstamo de álbums ilustrados para as familias

A Biblioteca do IES conta cunha nova sección de álbum ilustrado aberta ao préstamo ás familias, alumnado e profesorado. Os álbumes foron escollidos de xeito que as temáticas fosen diversas, e así, hai sitio para a arte, a igualdade de xénero, os conflitos, os valores que queremos na nosa sociedade ou a diversidade.

Botádelle un ollo, especialmente os que teñades cativos na casa.

Ademais, os clubs de lectura "Historias de historia" e "Petiscos de arte" retomaron as súas reunións coa posta en común das obras Persépole e Sonia Delaunay, una vida de color, respectivamente.

Proxecto Miña casiña, meu lar

Durante este curso académico 2019-2020, o IES de Soutomaior desenvolverá o proxecto sobre valoración do patrimonio natural, artístico, cultural e inmaterial da contorna que leva por título Miña casiña, meu lar. O proxecto vén de ser incluído no programa Plan Proxecta da Consellería de Educación e conta coa colaboración do Concello a través da área de Xuventude e a OMIX e doutras asociacións, colectivos e persoas a título individual que se irán sumando ao longo dos vindeiros meses.
 
A idea do proxecto é dar a coñecer ao alumnado o patrimonio de Soutomaior, establecendo vínculos cos bens patrimoniais e promovendo procesos para a súa protección. Se ben os eixos do proxecto Miña casiña, meu lar son o Camiño de Santiago portugués ao seu paso polo concello e o Castelo de Soutomaior como símbolo da vila, o alumnado traballará tamén outros puntos de interese turístico e, sobre todo, a valoración, coidado e respecto polo entorno.
 
Así, os obxectivos xerais do proxecto son:
  • Levar a cabo un proxecto a nivel de centro cun enfoque colaborativo e práctico.
  • Favorecer actitudes de respecto e valoración do patrimonio natural, cultural, artístico e inmaterial a través do seu coñecemento.
  • Concienciar ao alumnado do valor do patrimonio lingüístico, histórico, artístico e cultural do Camiño de Santiago.
  • Difundir o valor do patrimonio cultural existente na contorna do centro.
  • Potenciar o traballo en equipo e fomentar o uso da lingua galega.
Estará implicado no proxecto todo o alumnado e profesorado do centro e se traballará por niveis a partir de eixos temáticos concretos:
  • 1º ESO: Contorna inmediata. O espazo do centro e o seu coidado.
  • 2º ESO: Patrimonio natural do Concello de Soutomaior.
  • 3º ESO: Patrimonio inmaterial do Concello de Soutomaior.
  • 4º ESO: O Camiño de Santiago.
  • 1º Bacharelato: O Castelo de Soutomaior e María Vinyals, pioneira do feminismo.

Miña casiña, meu lar xa deu comezo en 1º da ESO e 1º de Bacharelato e podedes seguir todas as novidades a través do blog do proxecto.

Arrincamos!

Presentación do Proxecto París 2020

Este martes 14 tivo lugar a reunión informativa do Proxecto París, unha proposta que, seguindo a metodoloxía de traballo por proxectos que xa iniciamos nos cursos pasados con motivo da excursión de 4º ESO (París 2018: Guía de viaxe e vídeo; e Roma 2019), procura dotar de contido didáctico á saída de fin de etapa traballando dentro e fóra das aulas sobre os monumentos, a historia, a arte, a literatura e o cine como forma de achegamento á realidade.

O Proxecto París 2020 arranca coa implicación de 23 alumnos e alumnas que participarán nestas actividades que se realizarán no calendario que, en horario de tarde e fóra da xornada lectiva, se describe neste tríptico.

O equipo de docentes está coordinado por Cristina Méndez (Lingua Castelá) e está formado por Beatriz González e María Sánchez (Xeografía e Historia), Marta Mosquera (Linguas Clásicas), Román Cerqueiro (Lingua Galega) e Sandra Silva, coordinadora do Equipo de Normalización Lingüística.

Lembrámoslle a todo o alumnado participante que deberá entregar asinada a autorización de asistencia ás xornadas fóra do horario lectivo.

  • Mércores 5 de febreiro, de 15:00 a 17:00.
  • Mércores 12 de febreiro, de 15:00 a 17:00.
  • Mércores 19 de febreiro, de 15:00 a 17:00.
  • Martes 3 de marzo, 15:00 a 16:15.
  • Mércores 4 de marzo, de 15:00 a 17:00.
  • Martes 10 de marzo, de 15:00 a 16:15.

París agarda por nós entre o 27 de marzo e o 1 de abril, mais o alumnado do proxecto comeza dende xa a súa viaxe. Imos aló!

Teatro interactivo en inglés

Para acceder ao álbum de fotos, premede aquí.

O alumnado do IES asistiu no propio centro a dúas representacións teatrais organizadas polo Departamento de Inglés. O pasado mércores 15 de xaneiro a compañía Interacting representou a obra A Fisherman’s Tale​ para o alumnado de 1º e 2º ESO, mentres que o luns 20 foi a quenda do alumnado do resto dos cursos e da peza Crime in Miami.

O alumnado gozou dunha experiencia teatral intensa e divertida, na que os personaxes interactuaron constantemente co alumnado para traballar as súas destrezas comunicativas, tanto a expresión como a comprensión oral.

Distribuir contido


by Dr. Radut