Skip to Content

Complementarias

Educación en valores con Uma, Trufa, Goofy e Eco

Máis fotografías nesta Galería de Imaxes

Por segundo ano consecutivo, os cans Uma, Trufa, Goofy e Eco foron, xunto coas súas monitoras da Asociación Yaracán, os encargados de guiar o alumnado de 1º ESO nos obradoiros que tiveron lugar este pasado xoves 19 de decembro coa finalidade de mellorar as habilidades sociais dos máis novos coa axuda de cans. A iniciativa, enmarcada no programa xuvenil de intervención social nos centros educativos do Concello, procura a axuda dos animais para incidir na aceptación das diferenzas, a mellora da autoestima e potenciar a empatía.

Mediante sinxelos exercicios e xogos cos cans, os alumnos e as alumnas traballaron conceptos básicos para as relacións sociais como a paciencia, o traballo e a dedicación que conleva todo proceso de aprendizaxe ou como tolerar a frustración, por exemplo, para comunicarse cos cans.

O alumnado moveuse no terreo ao redor do can, buscando contacto e proximidade para ter un encontro relaxado. Tanto na entrada como na despedida fixéronse en silencio, empregando a linguaxe de signos previamente explicada, e en cada estación (guiada por cada un dos catro cans) se traballou un valor: a solidariedade, o traballo en equipo, o respecto e os seres únicos (para mellorar as diferenzas que nos fan únicas e especiais).

Con accións e xogos deste tipo, as profesionais de Yaracán procuraron que o alumnado empatizase cos cans e que, a través dese vínculo, puidese entender como sente. Deste modo, os mozos e as mozas de 1º ESO aprenderon como ir mellorando as súas relacións, creando actitudes e hábitos que favorecerán as súas relacións interpersoais durante toda a súa vida.

Taller de Eco-Percusión

Este mércores 18 de decembro celebrouse un Taller de Percusión na Aula de Usos Múltiples do IES de Soutomaior. O obradoiro consistiu en realizar unhas batucadas improvisadas, dirixidas por Didier, con material de refugallo. O alumnado gozou percutindo cubos, tixolas e bidóns de reciclaxe, ao mesmo tempo que sentiu o ritmo e alcanzou un bo nivel de coordinación.

Visita á Facultade de Belas Artes e á Exposición “Picasso. A Viaxe do Guernica"

Para acceder á galería de imaxes da actividade, preme aquí.

 

O pasado xoves 12 de decembro o alumnado de 4º de ESO e Debuxo Artístico de Bacharelato I e II visitou a Facultade de Belas Artes e a exposición “Picasso. A viaxe do Guernica” en Pontevedra.

 

Na facultade foron recibidos polo decano, Xosé Manuel Buxán, quen lles ensinou as diferentes aulas: pintura, deseño de moda, audiovisuais..., e os talleres onde o alumnado, dependendo do proxecto que estea desenvolvendo, pode traballar co material elixido (madeira, metal, plástico...).

 

Na exposición itinerante sobre o cadro “Guernica”, de Pablo Picasso, puideron coñecer a historia dunha das obras más emblemáticas da arte do século XX, dende a súa creación en París en 1937 ata o seu emprazamento permanente no Museo Nacional Centro de Arte Raíña Sofía en 1992.

Alerta verde! Chegan as Brigadas ECOlóxicas

O pasado venres 13 de decembro o alumnado de 1º ESO participou na primeira fase do programa educativo Brigadas ECOlóxicas, que organizan a Concellería de Educación e a OMIX do Concello de Soutomaior en colaboración co Departamento de Bioloxía do IES Soutomaior.

Esta iniciativa ten como obxectivo fomentar a concienciación ambiental entre o alumnado do centro a través diversas accións e iniciativas. Esta 1ª sesión alternou contidos e dinámicas que achegaron o alumnado á problemática do cambio climático, ás súas causas e ás accións que se poden levar a cabo para combatelo. Ao finalizar, explicáronse as seguintes fases do proxecto e animouse aos alumnos para participar nas seguintes actividades: 

  • 2ª fase: os xoves 26 de decembro e 2 de xaneiro terá lugar un taller creativo no Multiúsos de Arcade. Nel, o alumnado dará vida aos residuos máis habituais nun centro educativo confeccionando traxes e disfraces, humanizando os restos e reforzando a reflexión sobre a orixe e o uso que as persoas damos a eses desperdicios
  • 3ª fase: a partir do 20 de xaneiro, os brigadistas ecolóxicos comezarán a actuar no IES de Soutomaior. A través de campañas de concienciación entre os seus compañeiros, da repartición de bolsas de papel na cafetaría e doutras actividades, o alumnado visualizará o impacto ambiental que temos no noso centro educativo e fomentará medidas para reducilo.

Por último, cabe destacar que o programa se completa coa achega de novos materiais por parte do Concello. Ademais do composteiro instalado recentemente no IES, en breve contaremos cunha illa completa de recollida selectiva de residuos para o uso exclusivo do centro.

Sorteo das dúas Cestas de Nadal Pro-Excursión 4º ESO

No recreo de hoxe celebrouse o sorteo das dúas cestas de nadal que axudan a sufragar a viaxe a París do alumnado de 4º ESO. Actuando como secretario Joel, como mans inocentes Nikol e María e baixo a supervisión de Román, estes foron os dous números premiados:

  • Cesta nº 2 (doazón do Asador A Serra & Cafetería do IES): nº 612. A agraciada foi Graciela Comesaña Sanromán.
  • Cesta nº 1 (doazón anónima): nº 2059, vendido polo alumno Adán Piñeiro. A agraciada foi Marisa Vilán.

Parabéns ás persoas premiadas e grazas a todas e a todos os que colaborastes mercando rifas, así como ás empresas colaboradoras.

Sorteo de dúas fantásticas Cestas de Nadal

O alumnado de 4º ESO segue adiante coas actividades de autofinanciamento da Viaxe de Fin de Curso a París. Dende hai semanas están a vender rifas para o sorteo de dúas completísimas Cestas de Nadal, que terá lugar o luns 16 de decembro durante o recreo. O resultado darase a coñecer a través desta páxina web e do Facebook do Instituto. 

Dende o centro queremos agradecerlles a doazón das cestas a Mónica e Manuel (Cafetería do IES & Asador Lugar da Serra) e a outra empresa que desexa permanecer no anonimato. Moitas grazas por axudar o noso alumnado unha vez máis e por vos implicar na vida do instituto.

Así que xa sabedes, se non tedes as vosas rifas, a que agardades? Buscade o alumnado de 4º ESO ou comprádeas directamente na Conserxería. 

Participamos no XVIII Certame de Narración Oral Tíralle da Lingua

David Alján, Sabela Lorenzo e Isaac Abegonza representaron o noso instituto no Certame de Narración Oral Tíralle da Lingua, que se desenvolvou no Pazo de Congresos de Santiago o pasado 28 de novembro. David levou á escena o monólogo "Gastroinfluencers", no que lle deu unha volta á moda de colgar titoriais de gastronomía nas redes sociais,  mentres que Sabela e Isaac lle deron vida aos diferentes modelos típicos de estudantes que pululan polos centros escolares en "A clase". A resolución do xurado estivo ben reñida e, aínda que o noso alumnado nons e alzou con algún dos dous premios en liza, hai que destacar que o fixeron moi ben.

Á fase final acudiron centos de rapaces e rapazas que demostraron que a narración oral conta cunha boa canteira no noso país. A actividade contou na fase previa desenvolvida no noso centro coa participación de Federico Pérez Rei, quen durante dúas sesións desenvolvidas en outubro e novembro nos deu unhas pautas para nos introducir na arte da narración oral.

Unha vez rematado o Tíralle da Lingua 2019, o alumnado do Obradoiro de Habilidades Comunicativas visitou aexposición Galicia, un relato no mundo na Cidade da Cultura. Esta mostra explora os intercambios habidos Galicia e o resto do mundo nun percorrido que nos levaou desde a prehistoria ata a actualidade.

Nesta ligazón podedes ver unha selección de imaxes desta saída a Santiago de Compostela. 

"O uso das novas tecnoloxías", primeira actividade formativa para as familias do Proxecto intercentros

 

O noso centro acolleu onte, xoves 21 de novembro, unha charla sobre os usos e perigos das novas tecnoloxías na infancia e na mocidade aberto ás familias dos colexios Manuel Padín Truiteiro e Pontesampaio e mais o instituto  de Soutomaior.

A charla “Uso responsable das novas tecnoloxías” foi impartida por Ana Salorio Fernández, profesora de Tecnoloxía no ensino secundario especializada nos usos das novas tecnoloxías por parte da xente nova. A exposición da docente tivo continuidade nun coloquio aberto ás nais e aos pais asistentes e abordou o gran potencial educativo, comunicativo e de lecer das novas tecnoloxías, pero tamén o seu uso inadecuado ou abusivo, que pode ter consecuencias moi negativas nas mozas e nos mozos.

Para acceder aos materiais que mostrou a profesora Ana Salorio, tedes que entrar en Curso Seguridade TIC na Aula Virtual do IES Chan do Monte de Marín. Logo, introducir o contrasinal CDM-arcade. Paga a pena que as nais e os pais lle botedes unha ollada.

Con este acto, apoiado polo Centro de Formación e Recursos da Consellería de Educación en Pontevedra, presentouse publicamente o Proxecto Intercentros, unha rede de colaboración que terá continuidade ao longo do curso con diferentes iniciativas orientadas ao alumnado, ás familias e ao profesorado dos tres centros. Para o curso 2019-2020, esta iniciativa ten como obxectivos organizar actividades formativas para as familias dos tres centros como base para unha Escola de Nais e Pais estable no futuro; fomentar a integración do alumnado de 6º de Primaria no IES a través de actividades conxuntas; e elaborar un plan de traballo común que fomente o intercambio de experiencias entre o alumnado e o profesorado dos tres centros.

Alimentámonos ben con froita fresca e de tempada

froita
 
O programa Froita na escola, promovido pola Consellería de Medio Rural e do Mar, remata este venres logo de dúas semanas nas que se repartiu froita entre todo o alumnado durante os recreos. No próximo trimestre, volveremos contar con outras dúas semanas de reparto.
 
Esta iniciativa ten como obxectivo mellorar os hábitos alimenticios dos mozos e das mozas a través do fomento do consumo de froita fresca e de tempada (peras, mazás, mandarinas, plátanos...).

Unha vez máis, hai que lle agradecer ao alumnado de 4º ESO a súa colaboración nas tarefas de reparto.

Distribuir contido


by Dr. Radut