Complementarias

Comprácenos anunciar a posta en marcha do "Clube de lectura en galego para persoas adultas". E para estrear esta nova proposta do instituto contaremos coa presenza da autora da primeira lectura escollida, a novela Flores de ferro (Premio García Barros 2020), de María Rei Vilas.

O encontro terá lugar o venres 22 de abril ás 19h no Centro Municipal de Maiores de Talo Río, coincidindo coa I Feira do Libro de Soutomaior. 

Para participar e recoller o voso exemplar no instituto, tedes que enviar un correo a landin@edu.xunta.gal. O Clube está aberto ás familias, ao ex-alumnado e á veciñanza de Soutomaior en xeral.

Nesta última semana o alumnado de 1º e 2º da ESO rematou unha nova quenda de charlas formativas sobre habilidades sociais e sexualidade enmarcadas no programa de intervención socioeducativa xuvenil Ti Decides!, que organizan as concellarías de Educación, Xuventude e a OMIX de Soutomaior dende hai anos en colaboración cos centros educativos do municipio tras analizar a comezos de curso as problemáticas e necesidades detectadas entre o alumnado en áreas tan sensibles como a seguridade sexual, a educación para a diversidade, o consumo de drogas ou o desenvolvemento persoal.

Este xoves visitou o centro a  concelleira de  Xuventude, Noelia Ocampo, para facer o seguimento das charlas que as expertas e especialistas de Amaina, Asociación para a Promoción da Saúde, imparten para uns mozos e mozas que demostran coas súas continuas preguntas e reflexións a necesidade deste tipo de intervencións que procuran derrubar os tabús que aínda envolven o sexo e a afectividade e unha formación responsable e consciente da sexualidade, vivida sen medos e en igualdade desde a tolerancia e o repecto.

Nesta vindeira semana terá continuidade en 1º e 3º ESO o Programa Divulgaciencia, que se estenderá a outros niveis á volta das vacacións xunto con novos obradoiros Ti Decides! centrados na prevención dos riscos das novas tecnoloxías e das drogas, na educación sexualidade, na orientación profesional e aínda máis actividades centradas no coñecemento da nosa contorna ambiental e na divulgación científica.

Cómprenos a todos e a todas miradas e xeitos de estar no mundo que nin sequera imaxinamos.

Ese foi o ollar que onte partillou con nós Isaac Xubín, poeta, narrador, tradutor que teceu o relato autobiográfico Son o fillo do fillo do rei de Grecia para o alumnado do Obradoiro de Habilidades Comunicativas de 1º de Bacharelato.

A ollada dunha "nación andante" cunha identidade que se vai construíndo e mutando ante cada encrucillada, na que saen ao encontro Homero, Rosalía, Brendan Behan, Méndez Ferrín, Chus Pato e Kirmen Uribe; onde se mesturan o galego, o euskara, o castelán, o gaélico, o inglés, o catalán...; de Sheffield a  Bilbo pasando pola Coruña, Pontevedra, Gasteiz ou Cork, e sempre o Xubín das raíces familiares; entre os sabores da cociña popular que remite ás nais e ás avoas...

A ollada inconformista, unha vontade nómade que, coma o xogador de rugby, non fica quieta cando se recibe a pelota e dá un pase atrás para avanzar sempre.    

Galería de imaxes

Esta pasado martes 23 de marzo pechouse un novo ciclo de obradoiros e charlas de formación con Antón e Nuria, de Teixugo Scoop, que deron a coñecer as aplicacións do compost entre o alumnado de Ciencias da Terra de 2º BACH e o alumnado de Ciencias Aplicadas ás Actividades Profesionais de 4º ESO. 

Esta actividade desenvólvese no marco do Programa Revitaliza que ofrece a Deputación de Pontevedra aos centros escolares para concienciar a comunidade educativa da problemática dos residuos, acadar un cambio de actitudes e responsabilidade na separación dos residuos orgánicos domésticos, procurar o compromiso persoal ante a súa redución e co uso dos composteiros comunitarios e individuais e informar sobre a importancia da compostaxe como alternativa necesaria, ao ser máis económica e ecolóxica que os tratamentos actuais.

Estes obxectivos acompáñanse, ademais, das actuacións do alumnado nos terreos do centro e na súa contorna, pois da man do Departamento de Bioloxía e Xeoloxía contamos cun composteiro comunitario, de horta, de xardín e de diversas plantacións de árbores dentro e fóra do recinto.

Revitaliza tamén chegou neste 2º trimestre ao alumnado de 1º de Bach. (22 de febreiro) e 1º ESO (17 de marzo) cos obradoiros "Quen vive aí (identificación de invertebrados)" e de 4º ESO (18 de marzo) coa actividade "Intrusos no composteiro (microplásticos)" no que é xa un dos programas formativos máis veteranos do noso instituto. 

O venres 4 de marzo o alumnado de 4º ESO asistiu á derradeira charla do programa RELEVO2. A mocidade Abordo, promovido polo GALP (Grupo de Acción Local do sector pesqueiro) de Vigo co obxectivo de valorizar todos os tramos do proceso da pesca, marisqueo e acuicultura, e promover unha nova cultura medioambiental para posibilitar que os mozos e mozas poidan diversificar en función da súa creatividade, formación académica e espíritu emprendedor e poidan xerar novas e modernas actividades económicas.

Foron 6 sesións ao longo do primeiro (a primeira en decembro) e o segundo trimestre nas que, de xeito transversal, sempre estiveron presentes a sostibilidade e os modelos de crecemento sostible, e as políticas de igualdade de xénero.

Estas actividades foron organizadas polos Departamentos de Bioloxía e Xeoloxía e Economía.