O pasado martes 14 de marzo, o alumnado de 4º ESO e da materia de Bioloxía, Xeoloxía e Ciencias Ambientais de 1º de Bacharelato visitamos o Parque Natural de Baixa Limia-Serra do Xurés, incluído na Reserva da Biosfera Transfronteiriza Gerês-Xurés.
Encadrada dentro do Proxecto Shelter, que ten como obxectivo o desenvolvemento de ferramentas para a adaptación ao cambio climático e unha mellor resiliencia do patrimonio natural e cultural do Parque, a actividade comezou cunha viaxe ata Lobios, en Ourense, para coñecer de primeira man esta iniciativa.
Recibíronnos no centro de interpretación de Lobios, onde as guías ambientais fixeron unha pequena exposición das liñas de traballo e das estratexias ambientais trazadas neste proxecto, ademais de explicar a información das maquetas e dos paneis (algúns deles interactivos) do centro.
A continuación, fixemos unha andaina de dificultade media-baixa: o sendeiro do Río Vilameá. Acompañounos unha das guías, que nos ía explicando detalles do lugar a medida que avanzabamos no camiño. Ao longo desta sinxela ruta circular que percorre un tramo do río, puidemos coñecer a beleza da paisaxe e os valores naturais da zona, así como os 12 muíños repartidos neste intinerario.
Sen dúbida, quedamos con ganas de adentrarnos no corazón do parque para apreciar toda a diversidade que ofrece, tanto na súa fauna e flora como nos elementos da modelaxe xeolóxica que o debuxan.
