O NOSO CENTRO

 

CEIP PLURILINGÜE PROFESOR ALBINO NÚÑEZ

ENDEREZO: Casardomato, Nº 1, O Pino - 32001-Ourense

TELÉFONO: 988 78 88 96

CORREO ELECTRÓNICO: ceip.albino.nunez@edu.xunta.es

PÁXINA WEB:www.edu.xunta.gal/centros/ceipalbinonunez

OFERTA EDUCATIVA: Educación Infantil e Educación Primaria

 

MENÚ - MAIO 2021

Premede na seguinte imaxe para consultar o menú de maio do servizo de comedor:

PLANTAS CARNÍVORAS

O 27 de abril os alumnos e alumnas de 4º de primaria participaron na  actividade "PLANTAS CARNÍVORAS" promovida polo Concello de Ourense e enmarcada dentro das actividades que organizan en relación coa Educación en Medioambiente, co obxectivo de inculcar nos máis pequenos o respecto e interese polo medio natural. 

Ao centro acudiu a monitora Águeda Pérez que lles fixo unha breve explicación, apoiada por unha presentación audiovisual,  das principais características das plantas carnívoras, de como se alimentan, dos coidados que necesitan... tamén visionaron distintos tipos de plantas carnívoras.  

Ademais a monitora levou tres plantas, que deixou como agasallo para o colexio, e cuxos nomes son: DIONAEA Muscipula, SARRACENIA Maroon e DROSERA Capensis, e que os nenos e nenas examinaron con moita atención e interese. 

Remataron a actividade realizando unha actividade plástica que consistiu na elaboración en papel dunha planta carnívora cos seus dentes e lingua.

 

 

 

ADMISIÓN E MATRÍCULA CURSO 2021-2022

Premede na seguinte imaxe para consultar a lista provisional de admitidos para o vindeiro curso 2021-22.

Recordamos:

Prazo de reclamación das listaxes provisionais: cinco días hábiles posteriores á publicación destas listas provisionais.

Publicación definitiva das listaxes de admitidos e excluídos: antes do 15 de maio de 2021.

Prazo de formalización da matrícula: do 20 ao 30 de xuño de 2021. 

DÍA MUNDIAL DO LIBRO 2021

O 23 de abril é unha das datas máis sinaladas no noso calendario de celebracións e o xa tradicional apadriñamento lector vai asociado no noso colexio a esta efeméride.  Premede na imaxe anterior e veredes como celebramos este curso o DÍA MUNDIAL DO LIBRO e a festa da lectura conxunta. 

DÍA INTERNACIONAL DAS RAPAZAS NAS TICS 2021

"O 22 de abril celebrouse o Día Internacional das Rapazas nas TIC. Que que é iso? Pois é unha celebración a nivel internacional, orientada a motivar ás novas xeracións de mozas para que consideren o ámbito das TIC para o seu denvolvemento académico, investigador e profesional. 

"Foi no ano 2010 cando os países membros da UNIÓN INTERNACIONAL DE TELECOMUNICACIÓNS (UIT), organismo adscrito á ONU, decidiron crear esta efeméride, produto da enorme brecha dixital de xénero que se ven evidenciando ao longo dos anos. Brecha que se fai máis profunda cando falamos de xeración de contidos, desenvolvemento de páxinas web, creación de software, aplicacións e demais elementos dixitais, ámbito no que os homes teñen moita máis presenza cás mulleres (sinopse extraída da páxina web diainternacionalde.com)".

Nesta edición os alumnos de 4º e 5º de primaria do CEIP Albino Núñez participaron xunto con máis de 1.100 alumnos de primaria e secundaria de centros de toda Galicia a través da Plataforma Webinar do CESGA (Centro de Supercomputación de Galicia). Este ano colaboraron na multiconferencia web relatoras galegas da talla de: Beatriz Paz Santalla, Ana Freire, Úrsula Matínez Álvarez e Verónica Bolón Canedo. 
O noso alumnado non perdeu detalle de todas as múltiples saídas e aplicacións que teñen as carreiras tecnolóxicas. Ogallá moi pronto algunha delas poida estar do outro lado da pantalla contándonos as súas experiencias profesionais."
 
 
 
 

Deixámosvos os seguintes enlaces para coñecer máis a fondo esta efeméride:

- DÍA INTERNACIONAL DAS RAPAZAS NAS TICS: información da actividade.

- ITU (Unión Internacional de Telecomunicacións)

- DÍA INTERNACIONAL DE ... 

- VÍDEO INFORMATIVO 

VIALÍN: AUTOESCOLA PARA PEQUES

O pasado 19 de abril, os pequenos e pequenas de 6º de Educación Infantil (5 anos) participaron na actividade desenvolvida no centro e promovida polo Concello de Ourense: VIALÍN, AUTOESCOLA PARA PEQUES.

Con esta actividade pretendese que os nenos e nenas coñezan normas básicas de tráfico e tomen conciencia da importancia de respectalas para previr accidentes nas vías públicas.

A través de Vialín, aprenderon a recoñecer as principais sinais: stop, ceda o paso, sinalización dun hospital ... o uso dos semáforos para peóns e vehículos, coñeceron os sistemas de retención nos coches (cinturóns de seguridade para adultos, sistemas de retención infantil...), que usar cando imos en moto ou en bici para ir seguros, miramos antes de cruzar nun paso de cebra...

Sobre un mapa que representaba unha cidade, ían colocando sinais a medida que contestaban correctamente ás preguntas sobre seguridade vial. 

Ademais fixeron circuítos desprázandose, ás veces como peóns, e outras coma coches, respectando semáforos e pasos de cebra...

Desta maneira, pasaron unha divertida mañá, xogando e aprendendo como desenvolverse de forma segura ante o tráfico e coñecendo os perigos que presenta a rúa.  

  

SERVIZOS COMPLEMENTARIOS CURSO 2021-22

Do 20 ao 30 de abril está aberto o prazo para presentar a solicitude de servizos complementarios para o vindeiro curso 2021-2022. Podedes solicitar un só dos servizos (comedor ou transporte escolar) ou os dous. De non facer entrega de dita solicitude, enténdese que non solicitades ningún dos servizos. 

Non teñen que facelo o alumnado de 6º de primaria, que se marcha do colexio ao rematar aquí a súa etapa, nin o alumnado que se incorpore por primeira vez ao centro o próximo curso, debido a  que xa o solicita no momento en que formalice a súa matrícula.

Premede na imaxe para descargar o impreso de solicitude. 

 

OBRADOIRO DE COEDUCACIÓN E IGUALDADE

O 12 de abril, os alumnos e alumnas de 4º de primaria, participaron nun obradoiro sobre COEDUCACIÓN E IGUALDADE promovido polo Concello de Ourense co fin de favorecer a coeducación e a promoción da igualdade de oportunidades. O obradoiro foi impartido por Paula Sánchez, psicóloga especialista en igualdade. 

"Existe unha profunda necesidade de iniciar a coeducación nos primeiros anos da vida da infancia e a mocidade,  avaliando como se adquiren os roles e estereotipos de xénero, os factores que inflúen na sua aprendizaxe, así como o papel que para a infancia xogan os modelos de adquisición de valores.
Os obradoiros estarán adaptados a cada idade, traballando conceptos de corresponsabilidade, eliminación de estereotipos, formas de desigualdade, formas de violencias sexistas…
 
Sensibilización e formación na que se abordarán os estereotipos de xénero, sexismo, modelos de convivencia que fomentan a desigualdade e que recibimos tanto no ámbito familiar como dos modelos sociais." (sinopse extraída da páxina de Educación do Concello de Ourense). 
 
Ao longo da hora e media que durou o obradoiro os alumnos e alumnas reflexionaron (por exemplo, que vería un extraterrestre ao chegar ao noso planeta?),  interviñeron coas súas dúbidas, aportacións e comentarios sobre os estereotipos e como se transmiten os valores tradicionais (que pasa cando nace un neno ou unha nena, sen que a familia saiba previamente o seu sexo e llo presenten vestido de rosa ou azul?), chegaron a conclusións interesantes sobre a melloría na inclusión de todo o alumnado durante este curso escolar, coas limitacións sobre o fútbol debido ao Covid e finalmente manifestáronse moi positivos ao respecto. 
 
 

AXUDAS DO CONCELLO DE OURENSE CURSO 2021-22

No Boletín Oficial da Provincia de Ourense do día 12 de abril de 2021 saiu publicado o extracto da convocatoria para a concesión de Axudas para a adquisición de libros de texto, material escolar e para comedores escolares para o curso 2021/2022.             

Convocatoria realizada polo Concello de Ourense e destinada a unidades de convivencia en desvantaxe social e con menor poder adquisitivo do Concello de Ourense, que teñan nenos e nenas ao seu cargo escolarizados en centros públicos ou concertados de educación infantil, educación primaria e educación secundaria obrigatoria do Concello de Ourense, nos que non se segregue aos alumnos/-as por sexo.            

O prazo de presentación das solicitudes abrangue dende o 13 de abril ata o 03 de maio, ambos incluídos.                               

Os requisitos destas axudas ríxense polas bases reguladoras fixadas no Boletín Oficial publicado o 25 de maio de 2019.     

Nos seguintes enlaces podedes acceder a toda a información:

 

 -- Boletín Oficial da Provincia do 25 de maio de 2019                                     (bases reguladoras das convocatorias anuais) 
-- Boletín Oficial da Provincia do 12 de abril de 2021
 - Resumo das bases reguladoras

Na páxina web do Concello, na área de Asuntos Sociais, tedes máis información:

- ÁREA ASUNTOS SOCIAIS (CONCELLO DE OURENSE)

As solicitudes poden presentarse electronicamente:

- SEDE ELECTRÓNICA DO CONCELLO DE OURENSE 

Ou de forma presencial nos seguintes lugares:

- Oficina de Información Cidadá (Praza Maior, 1)

- Oficinas Municipais de Bispo Carrascosa, 8

- En todas as UNIS (Unidade Interdisciplinar de Intervención Social) de Benestar Social

Recordade que as axudas do Concello de Ourense para libros de texto e material escolar son para o alumnado de educación infantil.

Powered by Drupal - Design by artinet