Cartaz do Programa Somos Artistas
No mes de abril desenvolveuse un intenso programa de actividades extraescolares e complementarias que marcou o paso do segundo ao terceiro trimestre no noso instituto. Organizadas por diferentes departamentos, alcanzaron a todos os cursos e serviron para traballar diferentes contidos curriculares, temas transversais e a educación en valores.
Para coñecelas máis polo miúdo, premede nos diferentes títulos das charlas, saídas e programas realizados neste mes:
- Ti decides. Obradoiros de prevención de condutas de risco, organizados pola Concellería de Xuventude, a OMIX e o Departamento de Orientación para 3º e 4º da ESO.
- Programa Ciencia e Tecnoloxía, que nesta edición contemplou uns obradoiros de robótica e natureza organizados pola Concellería de Educación, a OMIX e o Departamento de Tecnoloxía en 3º ESO.
- Charlas de divulgación científica no ámbito das matemáticas organizados polos Departamentos de Orientación e Matemáticas para 3º e 4º ESO en colaboración coa Universidade da Coruña.
- Charla de divulgación científica Ondas, cores e interferencias na ciencia, na enxeñería e a na vida cotiá, organizada polo Departamento de Física e Química en colaboración coa Universidade de Vigo para 1º Bacharelato A.
- Programa Katorce18 de prevención de condutas infractoras, organizado polo Departamento de Orientación coa Asociación Arela e financiado pola Fundación Barrié para 3º e 4º ESO.
- (Tamén) falamos co corpo: a cara, os brazos e as mans na comunicación verbal, charla organizada polo Departamento de Lingua Galega á que asistiu o alumnado da materia Obradoiro de Habilidades Comunicativas e 1º Bacharelato B.
- Asistencia do alumnado de 2º ESO ao VII Festival de Curtametraxes Andaina (Redondela) baixo a coordinación do Departamento de Orientación.
Así mesmo, desenvolveuse o proxecto Somos Artistas para o alumnado de Educación Plástica e Visual de 4º ESO e de Debuxo Artístico de 1º de Bacharelato. Os obradoiros, promovidos pola OMIX en colaboración co Departamento de Educación Plástica e impartidos por Itziar Ezquieta e Begoña Paz, decana e vicedecana da Facultade de Belas Artes de Pontevedra (UVigo), teñen agora a súa continuación nas aulas e en breve coñeceremos as intervencións artísticas do noso alumnado.