IES Sánchez Cantón

A mañá do luns 30 de outubro, o alumnado do club de lectura de 1º de ESO e o alumnado de 1º ESO B participamos na inauguración da biblioteca do IES Campolongo (centro adscrito ao noso IES) cunha sesión de contacontos de medo realizada pola nosa rapazada e dirixida ao alumnado de 4º de primaria.

Unha pequena versión de Un ollo de vidro de Castelao e unha lenda xaponesa sobre os Gunnis constituíron a parte central da nosa posta en escea, ademais de pequenos relatos e microrrelatos que foron o deleite dun marabilloso público nun espazo terrorífico maxistralmente ambientado.

Tralos nervios iniciais, o noso alumnado non decepcionou ao auditorio. Eles e elas mesmos desfrutaron de poder compartir historias cos mociños e mociñas de 4º na súa antiga escola.

Apertas e abrazos, sorrisos e emotivos saúdos ao seu anterior profesorado completaron a sesión.

Pica na foto para ver o álbum

Álbum: Actividades -> Lectura de contos de terror en Campolongo

O luns 16 de outubro, o alumnado de 4º ESO asistiu a una charla no Teatro Principal sobre José Gil.  A través da presentación denominada José Gil. Pontevedra, provincia de cine, na orixe galega, iniciativa de Vía Láctea Films en colaboura con Cine na Rúa e Editorial Galaxia, e co apoio da Deputación Provincial de Pontevedra, achégase a figura deste persoeiro ao gran público.

Así enterámonos, entre otras moitas cousas, de que José Gil naceu en Rubiós (As Neves) en 1870 e morreu en Vigo no ano 1937. Foi un rapaz de aldea que a finais do século XIX, sen saír de Galicia, destacou como fotógrafo, director, operador de cámara, realizador, productor e exhibidor de cine. Realizou a primeira ficción do cinema galego: Miss Leyda (1916), con Castelao no reparto de actores, e percorreu Galicia proxectando películas e documentais nun camión artellado por él: O CINEMÓBIL reclame nº2.

O alumnado escoitou con moita atención e sorprendeuse coa proxección de varias películas de Charlot e Harold Lloyd, coetáneos do noso cineasta. Ademáis visionou unha película de 5 minutos realizada con secuencias obtidas de varios filmes de José Gil, os cales foron atopados tras moitos anos de investigación.

Álbum: Actividades -> José Gil, pioneiro do cine galego

O pasado venres 29 de setembro, o alumnado de Economía de 2º bacharelato, acudiu acompañado polo profesorado desta materia,  á feira Pont UP Store situada na Praza de España, co fin de realizar unha actividade de contacto coa realidade empresarial máis innovadora.

O Pont-Up Store é unha iniciativa aberta a toda a cidadanía cuxo obxectivo é o apoio ao emprendemento e o incremento da cultura emprendedora na sociedade. No marco do Campus Crea da Universidade de Vigo este encontro é unha decidida aposta pola creatividade e o emprendemento para o desenvolvemento persoal e da sociedade en xeral.

 Pica na foto para ver o álbum

Álbum: Actividades -> Pont Up Store