Despois de moitos meses de organización, planificación e preparación por parte de todo o alumnado de 2º bacharelato, cos seus delegados e delegadas á fronte, o día chegou.
O pasado luns 22 de maio, celebramos a graduación e vimos desenvoltos os discursos e as actuacións. Houbo momentos para as risas e momentos para as emocións, vividas a partes iguais polo alumnado, as súas familias e tamén o profesorado, pois estes mozos e mozas que agora abandonan o noso centro para perseguir os seus soños e facer realidade esas ilusións nas que tanto pensaron, foron unha vez meniños e meniñas que non levantaban dous palmos do chan. Así os coñecemos moitos dos que alí estabamos presentes. Velos medrar durante estes 6 anos foi unha orgullo para todos nós: acompañámolos no seu crecemento académico, pero sobre todo, no seu crecemento persoal, que os levou a este punto de madurez no que agora se atopan, preparados para afrontar as novidades que se achegan. Gustaríanos que conserven o espírito crítico que lles tentamos inculcar e que os convertiu nas persoas solidarias e responsables que son hoxe.
Todo o claustro do IES Sánchez Cantón deséxalles un futuro cheo de ledicia, de aprendizaxes vitais e de felicidade. A nosa ilusión consiste en que, cando lembren a vida no instituto, un sorriso apareza na súa faciana. Entón, saberemos que o noso traballo foi un éxito.
Pica na foto para ver o álbum
Álbum: Actividades -> Graduación 2023