Material homenaxe a Manuel Murguía elaborado por CEIPS da Coruña

O IES Sánchez Cantón recibe ao escritor Manuel Portas 

O IES Sánchez Cantón abriu as portas esta mañá para recibir o escritor Manuel Portas, que falou sobre a súa novela Unha cervexa Chang co alumnado do club de lectura de 2º de bacharelato, e mais o profesor Anxo González Guerra, quen explicou polo miúdo o funcionamento da Galipedia ante os estudantes da materia de Investigación e tratamento da información (2º da ESO).

Por unha banda, a reunión con Manuel Portas, que tivo lugar na biblioteca escolar do centro, non só serviu para coñecer en profundidade a novela do escritor e docente, senón tamén o seu proceso de escrita. Daquela, os e as discentes aprenderon máis sobre a investigación e o deseño dos personaxes, os lugares, as tramas e as pezas do crebacabezas que acabaron por conformar Unha cervexa Chang. Non obstante, tamén souberon que o maior referente de Manuel Portas no terreo da novela negra é Pepe Carvalho, creado por Vázquez Montalbán.

Por outra banda, Anxo González Guerra reuniuse co alumnado da materia Investigación e tratamento da información de segundo da ESO para falar da edición en galego da Wikipedia, a Galipedia. Desta forma, o docente contou que esta fonte dixital posúe unhas 800 entradas editadas sobre persoas e libros e que todas elas poden ser modificadas por outros usuarios. Ademais, González Guerra fixo especial fincapé nas imaxes e no respecto polos dereitos de autor, así como tamén na gratuidade do traballo da Galipedia.

ACTOS CON SABOR A ROSCA E CHOCOLATE. En ambas as dúas reunións, os asistentes puideron degustar chocolate quente e rosca. Isto débese a que o IES Sánchez Cantón ten moito que celebrar este ano. Á parte das datas sinaladas en que se atopan, próximas xa ás vacacións do Nadal, o centro pontevedrés tiña que festexar o segundo premio (2.500 euros) que recibiu no certame nacional “Premios Clubs de Lectura Escolares”, convocado polo Ministerio de Educación para premiar os proxectos de promoción de lectura que se desenvolveron ó longo do curso 2021/2022. Desta forma, foi recoñecido o mérito de “Nube de palabras”, o nome do proxecto que englobou no curso pasado 15 grupos lectores e 170 alumnos e alumnas de todas as idades.

Pica na foto para ver o álbum

 

 

Os EDLG de varios centros santiagueses implicados na organización da Mostra do Entroido Lamas de Abade decidiron ampliar esta iniciativa a todo o ensino público non universitario. A proposta consiste en compartir materiais e publicacións sobre o Entroido que se homenaxeará este ano ("madamitas e madamitos" de Entrimo) e realizar actuacións conxuntas co alumnado: confección de traxes e indumentaria, actividades sobre a tradición oral, gastronómica, musical etc. Proximamente farémosvos chegar máis información.

Por outra banda, lembrámosvos que está convocada unha nova edición dos Premios Mil Primaveras, que organiza a Coordinadora de Traballadores/as de Normalización da Lingua (CTNL) co fin de recoñecer e difundir proxectos, campañas e accións de normalización lingüística. O último día para presentardes as vosas candidaturas é o 31 de xaneiro de 2023. Tedes todos os datos aquí:  https://www.milprimaveras.gal/convocatoria/gl.

A páxina web do Consello da Cultura Galega (http://consellodacultura.gal/) ofrece excelentes materiais que vos poden ser útiles para a docencia, entre outros, libros dixitais de banda deseñada (http://consellodacultura.gal/libros-tipo.php?tipo=Banda%20dese%F1ada) ou a webserie Sophias que divulga a figura e as ideas de mulleres filósofas ao longo da historia (http://consellodacultura.gal/especiais/sophias/).

RECORDATORIO DOUTROS CONCURSOS

A Secretaría Xeral de Política Lingüística (SXPL) acaba de publicar 
a convocatoria do CONCURSO-EXPOSICIóN SOBRE FRANCISCO FERNáNDEZ DEL  RIEGO, o autor que homenaxeará a Real Academia Galega (RAG) o Día das  Letras Galegas de 2023. Os centros participantes terán que elaborar 10  carteis e mais unha guía didáctica sobre a súa biografía, obra e  época. Concederanse dous premios, un para infantil e primaria e outro  para secundaria, bacharelato, formación profesional e ensinanzas de  réxime especial. O profesorado responsable das exposicións gañadoras  recibirá unha certificación de 20 horas de formación permanente (30  para a persoa coordinadora). O prazo para enviar os traballos remata o  día 20 DE XANEIRO. Podedes consultar as bases  aquí: https://www.lingua.gal/a-secretaria-xeral/convocatorias/_/Premios/convocatoria_0159/convocatoria-doconcurso-paraelaborara-exposicion-sobrefrancisco-fernandez-del.

Concurso escolar de recitado de poesía Rosalía sempre viva.

Este certame, que convoca a Casa-Museo Manuel María, está dirixido para o alumnado de Primaria, Secundaria, Bacharelato e Ciclos Formativos de todos os centros educativos de Galiza.

O prazo de preinscrición dos centros que desexen tomar parte finaliza o 24 de xaneiro. 

Clickando aquí,  tedes as bases.

http://www.edu.xunta.gal/centros/iessanchezcanton/node/521

O martes 15 de novembro, recibimos a visita da escritora Ledicia Costas que nos falou   da súa vida e a súa obra. Moi amablemente, respostou a todas as preguntas que o noso alumnado lle fixo, e empregou moito do seu bo facer en asinar todos os libros que os rapaces e rapazas trouxeron. E damos fe de que foron moitos! Porque resulta ser a escritora favorita de moitos deles.

Asombrounos a súa cercanía, a súa amabilidade e a súa capacidade para facer unha dedicatoria personalizada a cada un deles. Para nós, foi un  placer. Esperamos que para ela, tamén.

E como o noso alumnado quedou encantado coa súa presenza, pedíronme que ao final do vídeo a invitara a volver cando quixera. 

O acto foi organizado polo departamento de LCelit coa colaboración do EDLG e o departamento de LGeLit.