Skip to Content

Patrimonio

Ruta científica, artística e literaria por Castela-A Mancha sur e Andalucía centro e sur

Xov, 09/11/2023 - 00:21 — miruca
Este curso participamos no programa "Rutas científicas, artísticas e literarias". A ruta que lle foi asignada ao IES Perdouro foi a que percorre Castela-A Mancha sur e Andalucía centro e sur e que leva por nome "Ruta dos camiños e o mar romano". 

Este programa educativo pretende, ademais de dar continuación aos coñecementos recibidos polo alumnado na aula, mellorar e presentar de forma máis atractiva a formación recibida nos seus respectivos centros, a través dunha contorna máis experimental e visual. Isto favorecerá non só a formación artística, literaria, científica, cultural, histórica, medioambiental e social, senón tamén o seu desenvolvemento integral. 

O IES Perdouro comparte experiencia co IES Clara Campoamor de Valencia e o alumnado participante dos dous centros realizarán a ruta en común. 
 
Na primeira xornada, a do luns, visitaron os muíños de Consuegra, o castelo de La Muela, as lagoas de Ruidera e a cova de Montesinos. O aloxamento tivérono en Manzanares e alí desfrutaron dunha divertida velada. 

 Na segunda xornada, visitaron as Tablas de Daimiel, un corral de comedias en Almagro, onde asistiron a unha representación teatral, e logo dirixíronse a Bailén, localidade onde se aloxaron. 

 
 
Na terceira xornada, o grupo visitou unha almazara en Bailén, na que desfrutaron dunha cata de aceite. Logo, dirixíronse a Córdoba, recibiron unha charla no departamento de Electrónica da Escola Politécnica da Universidade de Córdoba e pasearon por lugares emblemáticos da cidade, entre eles o Zoco. 
 

 Podedes ver máis imaxes AQUÍ. 

  • 71 lecturas

Coñece a túa vila: ruta por Burela

Mér, 01/11/2023 - 01:41 — miruca
Tal e como fixeron as promocións anteriores, no inicio do novo curso o alumnado de 1º ESO do IES Perdouro saímos a coñecer a nosa vila: Burela. 

A organización do centro decidiu que fósemos andando con seis profesores e profesoras: Fernando Losada, Sol Galdo, Fernando Lago, Miguel Rodríguez, Begoña Abad e Carmen Sampedro. 

Ás 8:30 reunímonos, dividíronnos en 2 grupos e saímos do recinto escolar ás 8:45. Nada máis baixar pasamos moi preto do Hospital da Mariña, moi importante para os cidadáns desta comarca. Seguimos a ruta e atopamos outro edificio importante: o Cuartel da Garda Civil. Aproveitando as vistas do alto de Burela, explicáronnos que "o faro non é faro" senón que é unha baliza. Tamén puidemos ver unhas plantas de menta, medicinais, que axudan a calmar a dor das ortigas. 

Dirixímonos á parte vella de Burela: a Vila do Medio. Alí vimos un cruceiro, unha cruz que axuda á orientación, unha casa tradicional galega e un hórreo, sobre o que nos deron información. Aprendemos que son estruturas típicas galegas fundamentais para gardar o millo e outros cereais. 

Entre o máis antigo que ten a nosa vila está a igrexa da Vila do Medio, unha impresionante construción do século X. Os nosos guías mostráronnos as famosas pinturas que contén o seu interior, as 3 campás e ofrecéronnos moitos máis datos que nos deixaron abraiados. Aproveitamos para facer unha foto de grupo nese fermoso monumento. 

Moi preto desa zona atópase un lugar idóneo para ver diferentes tipos de plantas típicas da vila tanto autóctonas como invasoras: alí puidemos ollar un groso castiñeiro centenario, xigantes eucaliptos, un muíño de auga e un río que fai que haxa musgo, fentos e acacias. Os salgueiros, toxos e a herba da pampa (planta invasora) encontrámolos aos poucos metros. 

Deixamos a zona vella de Burela e camiñamos en dirección á Marosa. Alí puidemos escoitar unha curiosa explicación da erosión da auga, que fai que as rochas polo impacto do mar se vaian convertendo nunha peculiar “tableta de chocolate”. 

De regreso vimos a "uña-de-gato" (outra planta invasora) e as Tetas da Vinculeira, emblema da riqueza arqueolóxica da Mariña. Para rematar a nosa andaina, vimos o antigo castro habitado polos galaicos onde se atopou o Torques de Burela tan famoso da nosa vila. Obviamente, non puidemos evitar estar uns intres parados desfrutando das vistas que nos ofrece Cabo Burela. 

Case sen darnos conta, xa era hora de voltar para o instituto e dar por terminada a xornada educativa.

Pódese acceder ás imaxes AQUÍ.

Gabriel Marrube Mendaña - 1º ESO A

  • 98 lecturas

Concurso Aulas Limpas 2023-24

Ven, 06/10/2023 - 13:51 — miruca

Comezamos no mes de outubro co concurso Aulas Limpas, o que quere dicir que nos grupos da ESO e Bacharelato o alumnado debe ter en conta unha serie de medidas para manter a súa aula limpa e ordenada.

Achegamos a rúbrica que utiliza o xurado do concurso polo que é recomendable repartir entre o alumnado as tarefas de vixilancia para que todos os puntos da rúbrica se cumpran. 
 
As ventás e persianas dos extremos da clase deben quedar cerradas e as do medio, abertas, para ventilar antes de proceder á limpeza da aula. É importante tamén subir as cadeiras enriba das mesas para facilitar o labor das limpadoras. Se na última hora de clase o grupo que queda é pequeno, o alumnado anterior debe deixar subidas as súas cadeiras. 
 
Cada un de nós debe poñer o seu gran de area para que se manteña a limpeza e a orde nas aulas. 
 
Consultade a rúbrica do concurso para ver qué puntos debedes ter en conta.
 
  • 180 lecturas

Actividades no Castro de Viladonga e no Museo Provincial de Lugo

Ven, 09/06/2023 - 21:50 — karina
O venres 09 de xuño, o alumnado de 1º de ESO viaxou xunto ás súas profesores Eva, Sonia e Karina ata o Castro de Viladonga. Alí realizaron un obradoiro sobre o lume, unha visita guiada á croa e unha actividade para descubrir e coñecer a valiosa colección do museo. Foi unha mañá onde o alumnado se mostrou moi participativo e interesado.
 
A tarde, pasámola no Museo Provincial de Lugo facendo dúas actividades dinamizadoras: "Diversigualdade" e "Rutas literarias". A primeira estivo enfocada a reflexionar sobre a diversidade sexual tomando como referencia distintas obras do museo como retratos, reloxos ou abanos. Na segunda, o alumnado participou nun xogo semellante a unha busca do tesouro, para o cal días antes houbo que realizar a lectura de catro relatos vencellados argumentalmente ao museo. Divididos en catro equipos - un por relatos, o alumnado tivo que resolver una serie de preguntas relacionadas coa historia dun dos catro relatos. Algunhas xa as podían responder cos coñecementos adquiridos coa lectura que fixeran, pero para resolver outras tiveron que visitar distintas salas do museo. Para isto contaron con 40 min ao final dos cales se reuniron todos os equipos para facer unha posta en común e deliberar o podio gañador.

Tratouse de dúas actividades moi distintas coas que sen dúbidas traballamos aspectos como o respecto e a comprensión da diversidade de orientación sexual, o traballo en equipo, o compañeirismo ou a resolución de retos. Finalizamos a xornada, por suposto, coa visita á sala do ouro onde se garda o noso Torques de Burela, un broche perfecto para este día de clase fóra dos muros do centro.

Accede a reportaxe fotográfica AQUÍ. 

Sonia Rey, profesora de Lingua Castelá

  • 182 lecturas

Ruta "Coñece a túa vila" con podcast incluído

Lun, 14/11/2022 - 20:09 — miruca
O pasado venres día 4, o alumnado de 1º da ESO do IES Perdouro fomos de andaina por Burela. Saímos do instituto ás 9:20, acompañados polos profesores Fernando, Begoña, Eva e Carmen, ademais da profesora xubilada de Xeografía e Historia Maribel Crecente, que fixo de guía durante o camiño.
Primeiro, organizámonos en grupos de 5, nos que tiña que haber rapaces e rapazas, para responder ás preguntas que Maribel nos ía facendo en cada parada. Por cada acerto recibiamos unha bóliña e, ao final, o equipo que tivese máis boliñas gañaba unha bolsa de bombóns. Comezamos o paseo pola zona vella de Burela, a Vila do Medio, onde Maribel nos falou das primeiras capturas que se fixeron en Burela: balea, sardiña e bonito, nesa orde; ademais de falarnos do río de Burela, o Rodil. 
 
Se queres seguir lendo a crónica de Sofía Ben Martínez, accede ao blog Perdourando.
 
Podedes acceder ao álbum AQUÍ. 
 
E temos unha novidade: as impresións sobre a ruta nun podcast emitido no programa Proxecto Neo de Radio Burela do mércores 9 de novembro. 
 
Sofía Ben Martínez, 1º ESO B
  • 226 lecturas

Visita a Samos e ao Cebreiro

Lun, 14/11/2022 - 19:50 — miruca
Saímos do instituto sobre as 8:25h cara á abadía de Samos (igrexa de San Xillao e Santa Basilisa), na provincia de Lugo, a unhas dúas horas de Burela. O primeiro que fixemos ao chegar foi ir tomar a merenda de media mañá e logo fomos ata o mosteiro. Alí recibiunos un monxe e empezounos a explicar un pouco toda a historia da abadía, pero moi brevemente xa que só durou corenta minutos.

Contounos que o mosteiro era beneditino e que os monxes viven dentro e saen moi pouco. O estilo da fachada é fundamentalmente barroco. Ten columnas pareadas e simétricas e un óculo xusto encima de San Bieito (figura situada enriba, no medio da fachada). O fundador foi San Martiño de Dumio.  

O irmán Lorenzo, que así se chamaba a persoa que nos fixo de guía, explicounos por que partes estaba formado o edificio.

Se queres seguir lendo a crónica, podes ir ao blog Perdourando. 

Podes acceder ao álbum de imaxes AQUÍ.

Alba Fernández Quelle - 3º ESO A

  • 101 lecturas

Visita de Camilo Díaz Arias á exposición sobre Ediciós do Castro

Sáb, 01/10/2022 - 18:34 — miruca
A figura polifacética de Isaac Díaz Pardo na voz do seu fillo
 

O pasado xoves 22 de setembro do 2022, o alumnado de 4º da ESO e de Ciclo Medio de Xestión Administrativa, acudimos ao encontro con Camilo Díaz Arias, un dos fillos de Isaac Díaz Pardo.

A súa visita foi ligada á exposición “O Castro tamén na orixe da literatura infantil e xuvenil”, instalada estes días na nosa biblioteca, a cal nos conta o nacemento de Ediciós do Castro en Sada, no ano 1963. Esta editorial sacou á luz 1500 volumes entre os que destaca Memorias dun neno labrego de Xosé Neira Vilas, o máis vendido con 24 edicións tiradas. 
 
Camilo comezou falándonos da importancia que tivo o seu avó, Camilo Díaz Baliño, na traxectoria profesional de Isaac, ata chegar a converterse nunha figura polifacética: pintor, ceramista, deseñador, editor, escritor, empresario, político... 
 
Durante a Guerra Civil Española, Camilo Díaz Baliño fora fusilado polo réxime franquista o que marcou moito a Isaac, quen tamén uns anos máis tarde, tivo que fuxir a Madrid, onde estudou Belas Artes. Anos máis tarde abandona as artes plásticas, e volta a Galicia onde fundou, en 1949, a fábrica de porcelana, Cerámicas do Castro, en Sada. 
 
En 1963 constituíu en Arxentina, xunto con outros destacados galeguistas, como Luis Seoane, o Laboratorio de Formas. Nese país, en concreto na cidade de Magdalena, funda e dirixe a fábrica Porcelanas Celtia. 
 
Dende 1968, funda o Grupo Sargadelos, sendo a dirección e administración do mesmo o seu labor máis coñecido, ao cal destina gran parte dos beneficios para recuperar a cultura galega e a memoria histórica. No centenario do seu nacemento, Sargadelos foi declarado Ben de Interese Cultural, ademais de celebrarse unha exposición na Cidade da Cultura de Galicia titulada “As miradas de Isaac”. 
 
Finalmente, Camilo falounos de Isaac como pai, o cal xogaba con el e os seus irmáns, ideaba papaventos e construía camións de madeira para que puidesen montar neles. 
 
Podedes acceder ás imaxes AQUÍ. 
 
Adriana Polo González 
Damaris Gabriela Popovici 
2º Ciclo Medio de Xestión Administrativa
  • 198 lecturas

Coñecemos a nosa vila

Xov, 20/01/2022 - 22:17 — miruca
O martes 14 de decembro o alumnado de 1º ESO tivemos unha saída para coñecer mellor o noso pobo. Os nosos guías nesta visita foron Antón Niñe e Maribel Crecente, antigos profesores do IES Perdouro.

 A reunión comezou no aparcamento do instituto. Alí o profesor Niñe contounos que o noso centro foi inaugurado no ano 1978, que nos seus comezos só había cinco profesores e que máis tarde foron construídos o instituto Monte Castelo e tamén o pavillón Vista Alegre. 

As miradas de Isaac

Mar, 01/06/2021 - 09:06 — karina
Centenario de Isaac Díaz Pardo (1920-2020) - Exposición As miradas de Isaac

O día 16 de marzo tivemos unha videoconferencia a raíz dunha exposición sobre a vida de Isaac Díaz Pardo, xa que é unha figura moi importante en Galiza. Isaac Díaz Pardo foi un gran impulsor da fábrica de Sargadelos, entre outras. 

Ao comezo da videoconferencia a guía, Paula Toimil, contounos a vida da súa familia e a súa infancia. O seu pai chamábase Camilo, era de Ferrol. No ano 1920 trasladouse a Compostela, no mesmo ano naceu Isaac. Dende moi novo, Camilo introduciu ao seu fillo na realización de cartaces. O pai de Isaac traballaba nun taller onde elaboraba os seus carteis para as festas, propaganda… .. seguir lendo a crónica de Beatriz Botelho Melo – 1º BAC B no blogue de Perdourando.
  • 110 lecturas

Os celtas e a materia de Bretaña

Sáb, 29/05/2021 - 13:52 — karina
A mañá do 24 de maio, os alumnos de 2º da ESO, 3º da ESO e 1º de Bacharelato asistimos a unha representación levada a cabo por Suso Martínez e Daniel Linde. Quixéronnos explicar a historia dos celtas en Galicia e a importancia da lingua galego-portuguesa na Idade Media , e para facer a actividade máis dinámica, escenificáronnola en forma de obra de teatro. Para facela máis realista trouxeron roupa da época para poñernos en situación (por exemplo, unha saia de tea de tartán, capas da época ou unha réplica exacta duns zapatos da Idade de Bronce).
 
Comezaron falando de Andrade e Pardo de Cela, señores da Idade Media. Despois presentáronnos personaxes e sucesos importantes, como poden ser: a historia do Rei Artur e os cabaleiros da Táboa Redonda; a materia de Bretaña, .. seguir lendo a crónica de Daniela Enríquez Canoura 1ºBAC-B no blogue de Perdourando.
  • 151 lecturas

Visita virtual ao castro de San Cibrao de Las

Ven, 23/04/2021 - 17:18 — karina

“FACEMOS AS MALETAS” PARA VISITAR VIRTUALMENTE O CASTRO DE SAN CIBRAO DE LAS.

O día 13 de abril visitáronos dous técnicos do castro de San Cibrao de Las, Jota e Jorge,  e con eles fixemos o alumnado de 1º e 2º de ESO unha viaxe virtual.

San Cibrao de Las é un dos castros máis grandes de Galicia, de feito tamén se coñece como “ a cidade”, do cal só está escavado unha pequena parte.  Atópase na provincia de Ourense, entre os concellos de Punxín e San Amaro, no cume dunha montaña e próximo ao río Miño. Estivo ocupado arredor duns 400 anos, entre os séculos II a.c e II d.c. e nel  chegaron a vivir unhas 3.000 persoas.

Viaxe a Sargadelos e San Cibrao (17-01-2020)

Lun, 03/02/2020 - 22:33 — karina
A primeira parada na nosa viaxe foi en Sargadelos onde visitamos o antigo complexo industrial, o cal albergaba unha fábrica de siderurxia e outra de cerámica. Dúas fabricas máis, unha de productos téxtiles e outra de vidro completaban o proxecto de Antonio Raimundo Ibáñez, dono do complexo, aínda que estas últimas non chegaron a materializarse polo asasinato do seu dono. Ibáñez, nacido en Asturias, traballaba durante a súa mocidade na casa comercial Guimarán en Ribadeo. Ali comezou a forxar a súa fortuna investindo os cartos do amo en aceite, o cal tamén o levaría ó despido, por realizar este acto sen consentimento dos seus superiores. Durante os seguintes anos casou e seguiu aumentando o seu capital ata 1796 cando abriu a súa primerira fábrica, a siderúrxica, á que lle seguiría a de céramica uns anos despois.

Presentación do libro "Navegando a bordo do San Lorenzo de Foz"

Mar, 21/01/2020 - 18:38 — karina
Antón Niñe naceu no concello de Barreiros en 1958. Foi durante moitos anos profesor de Relixión no IES Perdouro de Burela, tamén é autor de libros e foi presidente da A.C. Os Matos de Burela.
En outubro publicou un libro titulado Navegando a bordo do San Lorenzo de Foz. O seu libro ten 5 capítulos e conta a historia dun barco de cabotaxe. Dedicou varios anos a investigar nos arquivos do barco, nas bibliotecas e a falar cos tripulantes. Escribiu este libro para gardar a memoria do barco, de seu pai (que foi patrón do mesmo) e dar a coñecer desta embarcación.
O barco foi construído en 1944 nun estaleiro de Asturias e despezárono en 1965. Navegou 21 anos, 19 deles seu pai estivo a bordo, 4 de mariñeiro e 15 de patrón. Como era un barco de cabotaxe transportaba moitos tipos de mercadorías como madeira ou cemento. O barco levaba 9 tripulantes entre o patrón, o fogoneiro, o cociñeiro e os mariñeiros.

Obradoiro sobre escritura medieval

Mér, 22/05/2019 - 18:26 — karina
O pasado luns 29 de abril ás 16:00 horas, realizamos un obradoiro sobre escritura medieval a cargo de GaliPat Servizos Culturais.
Comezamos esta actividade, recibindo unha pequena explicación. Logo, fixemos o obradoiro, no cal, tivemos que realizar un selo. Primeiro, pensamos o que queriamos debuxar, e para elo, os profesores déronnos unha folla con exemplos. Unha vez ideado plasmámola no papel, ademais tivemos que escribir as nosas iniciais e poñer ex-libris, que era unha marca de propiedade.
Seguidamente, tivemos que punzar unha especie de goma. Para eso, démoslle a volta ao noso debuxo, para que ao colocar o selo, quedara axeitado. Finalmente, mollamos a goma nunha pintura vermella e pousámola nunha folla. Todo o material empregado por nós, levámolo para a casa.
Outra parte da actividade, consistiu en ver como era a primeira imprenta. Explicáronnos como funcionaba esta máquina, ideada por Gutenberg (século XV), e un compañeiro de 2º ESO B fixo unha demostración de como funcionaba.

Accede ao albúm de fotografías aquí.
Álvaro Mesa, Santiago Casal e Álvaro Fernández.- 2º ESO A
  • 810 lecturas

Ruta polas Terras de Miranda

Mér, 22/05/2019 - 18:24 — karina
O martes 30 de abril, ás oito e media, os alumnos/as de 2° ESO realizamos unha viaxe programada polo departamento de Xeografía e Historia e Relixión. 

Ao comezar o día fomos ao castro de Saa, na Pastoriza, onde nos contaron os datos máis importantes deste: que era un dos máis grandes, que está romanizado e que aínda se está a estudar. Logo fomos ao mosteiro de Lourenzá. Despois estivemos na fraga de Riotorto. Alí fixéronnos unha demostración de como traballaban o ferro. Poidemos ver o funcionamento dun mazo de auga e como os ferreiros fabrican os coitelos de forma artesanal. Deseguido, completamos unhas fichas sobre esta fraga e a charla sobre o traballo do metal, e mais tarde unha búsqueda sobre a flora da fraga. Ao rematar estas actividades, xantamos. 

Pola tarde visitamos en Meira os restos do mosteiro de Santa María: a igrexa, o claustro, etc, e ensináronnos una maqueta do mosteiro cando estaba completo. En último lugar tivemos que lembrar todo isto cubrindo unhas fichas.
 
Accede a reportaxe fotográfica aquí. 
 
Dámari Carballo , Lucía Ciria e Jessica Villamizar - 2º ESO B
  • 796 lecturas
Distribuir contido


by Dr. Radut