Conferencias, Eventos, Indice, Practicas, Prensa

O Instituto de Ensinanza Media de Lugo

Mér, 07/02/2024 - 17:20

Este 7 de febreiro Isabel Fernández García, Profesora Ad Honorem da USC, impartiu a conferencia titulada “O Instituto de Ensinanza Media de Lugo”. Neste caso o público asistente non foi exclusivamente alumnado de STEMbach, senón tamén o alumnado de Ciencias de 1º de BAC do noso IES.

A catedrática deu a coñecer algúns dos traballos que tiveron que pasar estas pioneiras científicas para acadar e exercer as súas profesións científicas. Ademais, expuxo o número de licenciadas en ciencias en Lugo por curso académico, as profesións dos pais destas pioneiras, principais profesións que realizaban e outros datos das primeiras científicas da nosa provincia.

Estes e outros datos foron obtidos, entre outros recursos, no arquivo histórico do noso IES e aparecen publicados no libro “Pioneiras de Ciencias de Lugo”, do que a poñente é autora.

Álbum: Sen categoría -> 23 Mulleres pioneiras

Presentación de proxectos STEMbach 2022-2024

Xov, 01/02/2024 - 00:50

Este mércores, 31 de xaneiro, tivo lugar no salón de actos do noso IES a exposición e defensa dos proxectos de segundo de STEMbach (promoción 2022 – 2024). O tribunal avaliador estivo formado por Xoán Carlos Rodríguez, Carlos Cazón e Miguel Ángel Blanco.

Os sete proxectos, os cales foron expostos e defendidos ante as preguntas do tribunal cun nivel excepcional, foron os seguintes: “BigData en Economía” por Nicolás Pérez Vázquez; “Lógica Difusa” por Iris Comesaña Varela e Idaira Martínez Fernández; “O Cubo de Rubik” por Pablo Pedreira López; “Lei de Benford” por Lucía Pérez Varela; “Criptografía” por Carmen Portela Medraño e Carmen Castro Rodríguez; “Luz+luz=?” por Carla Neira Rodríguez; e “Estudo de parentesco en linguados” por Iria Castro Díaz e Sara Freire Santiso.

O alumnado obtivo a máxima cualificación e recibiu os seus diplomas de asistencia e aproveitamento.

Álbum: Sen categoría -> 23 proxectos

Práctica de impresión 3D II

Mér, 24/01/2024 - 18:31

Este 24 de xaneiro o alumnado Stembach asistiu á segunda sesión da práctica de introdución á impresión 3D. Esta correu a cargo do profesor de Tecnoloxía e director do IES Lucus Augusti, Carlos Cazón.
Deste xeito, despois de ter unha peza creada (un chaveiro personalizado), laminala en capas co programa Ultimaker Cura e xerar un arquivo g-code, imprimírona nunha das impresoras 3D do noso IES. Ademais, viron webs onde atopar pezas prediseñadas e gratuitas listas para a súa laminación.

Álbum: Sen categoría -> 23 Print 3D II

Visita ao Centro de Investigación Aeroportada de Rozas (CIAR).

Mér, 17/01/2024 - 14:12

Este mércores 17 de xaneiro, o alumnado de primeiro curso de STEMbach visitou o Centro de Investigación Aeroportada de Rozas (Castro de Rei, Lugo).

O CIAR é un centro de ensaios pioneiro na integración das Plataformas Aéreas de Investigación tripuladas xunto co desenvolvemento de sistemas remotamente tripulados (RPAS, Remotely Piloted Aircraft Systems). Así mesmo, este centro é o único a nivel europeo que permitirá dado as súas características e equipación, unha vez que se aprobe unha normativa específica para avións non tripulados, o ensaio e certificación deste tipo de aeronaves.

Álbum: Sen categoría -> 23 CIAR

Práctica de impresión 3D I

Mér, 10/01/2024 - 22:34

Este 10 de xaneiro o alumnado Stembach asistiu a unha práctica de introdución á impresión 3D. Esta correu a cargo do profesor de Tecnoloxía e director do IES Lucus Augusti, Carlos Cazón.

O alumnado empezou empregando algúns programas de deseño: TinkerCAD, FreeCAD e OpenSCAD. Concretamente, empregaron o primeiro deles. Deste xeito, despois de ter unha peza creada (un chaveiro personalizado), pasaron a utilizar un programa de laminado (o programa Ultimaker Cura) para, ademais de laminar a figura en capas, definir os distintos parámetros de impresión. Finalmente, aprenderon a recoñecer as distintas partes e os fundamentos de impresión de dúas impresoras 3D do centro. A práctica rematará coa impresión das pezas na impresora 3D outro mércores.

Álbum: Sen categoría -> 23 3Dprint

Prácticas con Arduino II

Ven, 29/12/2023 - 12:42

Este 20 de decembro o graduado en física, Camilo López Castro, continuou coa impartición do seminario sobre placas Arduino para alumnado de primeiro curso de STEMBach.

O alumnado empregou as placas Arduino Uno con pantallas LCD, fixeron as conexións ós Arduinos utilizando placas tipo protoboard, practicaron a instalación de distintas librarías e a sintaxe da programación co IDE de Arduino para ver na pantalla diferentes textos.