Educación Física

O alumnado de 4º de primaria participou onte, 20 de abril, no pavillón Coto Ferreiro, nunha xornada de bádminton organizada pola Agrupación Deportiva Escola da Estrada, dentro do Proxecto de Vida Activa e Deportiva (PVDA).

O alumnado de 5º de primaria colaborou na organización e arbitraxe do evento.

En total participaron uns 180 nenos e nenas de diferentes colexios do municipio, que utilizaron sete pistas de xogo. 

Ademais, agasalláronos con cadansúa camiseta de recordo deste animada mañá, na que o pasaron fenomenal.

- Galerías de fotos.

No mes de decembro tivemos as sorte de contar no noso centro con Edu, o profesor de baile tradicional da Asociación Tamparrantám de San Andrés de Vea. Desde infantil ata 6º de primaria, nas sesións de Educación Física, achegámonos ao folclore galego con puntos, picados, paseos, rodas e filas. O resultado foi unha pequena coreografía que poñeremos en escena o luns 30 para conmemorar o Día da Paz.

A rapazada pasouno de marabilla e moitos descubriron un novo talento. Lembrade que o queira apuntarse a bailar e/ou tocar pode contactar coa Asociación, que ten aulas abertas os martes e os venres pola tarde (626879456).

Ollade que ben o pasaron picando nas fotos.

- Faro de Vigo.

Dentro da modalidade XOGADE dos Proxectos de Vida Activa e Deportiva (PVAD) nos que participa o noso centro, o alumnado de 2º a 6º de primaria acudirá este xoves 12 de xaneiro, se as condicións meteorolóxicas o permiten, ao espazo das piscinas municipais da Estrada para correr no campionato zonal de campo a través que celebran cada ano todos os centros educativos da Estrada.

O alumnado participante levará unha muda de roupa (calzado, calcetíns e pantalón) para cambiarse se se mollan e tamén unha mochila pequena co taco para tomar a media mañá.

No seguinte enlace tedes máis información (normativa, horarios e percorridos), por se queredes achegarvos a ver as carreiras.

- Campionato campo a través.

Dentro da modalidade XOGADE dos Proxectos de Vida Activa e Deportiva (PVAD) nos que participa o noso centro, o alumnado de 2º a 6º de primaria ían viaxar o xoves 17 de novembro ao espazo das piscinas municipais da Estrada para correr no campionato zonal de campo a través que celebran cada ano todos os centros educativos da Estrada. Como as condicións meteorolóxicas non o permiten, queda aprazada a actividade ata novo aviso.

O alumnado participante levará unha muda de roupa (calzado, calcetíns e pantalón) para cambiarse se se mollan e tamén unha mochila pequena co taco para tomar a media mañá.

No seguinte enlace tedes máis información (normativa, horarios e percorridos), por se queredes achegarvos a ver as carreiras.

- Campionato campo a través.

Este luns, 26 de setembro, recibimos no centro a visita, organizada polas escolas deportivas da Estrada, de técnicos da federación de balonmán, que lle ofreceron ao alumnado de primaria unha sesión de media hora por grupo de iniciación a este deporte.

Esperamos que lles gustase e que máis de un e de unha se animen a practicar este deporte.

Podedes ver na web do Concello da Estrada información sobre a oferta das escolas deportivas municipais, que darán comezo en outubro.

E, ademais, aquí vos deixamos un cartel informativo.

Na nosa Galería publicamos fotos da visita dos monitores de balonmán.