Skip to Content

Listaxes provisionais das axudas de material e fondo libros para o curso 2024/2025

Dende hoxe están publicadas as listaxes provisionais das axudas de material e fondo libros para o curso 2024/2025. Pódense consultar na seguinte ligazón: https://www.edu.xunta.gal/fondolibros/  (é necesario ter certificado dixital) ou ben no centro educativo en horario de 10 a 13 horas.

O período de reclamacións será ata o vindeiro venres, día 5 de xullo.

Autorización uso do transporte escolar curso 2024/2025

Adxúntase o formulario para solicitar o uso dunha praza de autobús polo alumnado que non cumpre os requisitos de usuario lexítimo, Considérase usuario NON lexítimo e, polo tanto, debe entregar esta autorización, aquel alumnado con domicilio de residencia ou laboral a menos de 2 km ou aquel que resida fóra da zona de influencia do centro, é dicir fóra dos límites das parroquias de Cea e Rubiáns.

A parroquia de Cea remata á altura do número 46 de Avda. das Carolinas. Ante calquera dúbida poden poñerse en contacto co centro.

O prazo para entregar a documentacion remata o xoves, 5 de setembro de 2024.

O horario de entrega da documentación será:

Do 2 ao 12 de xullo: de 10 a 13 horas.

Do 2 ao 5 de setembro: de 10 a 14 horas.

Libros de texto curso 2024/2025

Faise pública a listaxe de libros de texto para o curso 2024-25 (ver adxunto). O alumnado de 5º e 6º de primaria non precisará libros por pertencer ao programa Edixgal.

Autodeclaración comedor curso 2024/2025

As familias do alumnado usuario do servizo de comedor no curso 2024-25 deberán entregar o formulario de autoliquidación cuberto ata o 12 de xullo. 

O horario de entrega da documentación será de 10:00 a 13:00h. Tamén se pode entregar por correo electrónico enviando a solicitude cuberta ao correo do centro (ceip.rubians@edu.xunta.gal).

Aqueles usuarios que non teñan formalizada a documentación no prazo indicado non poderán empregar o servizo ata que estea regularizada.

No documento adxunto pódese consultar a información relativa á unidade familiar e á renta per cápita. Pódese empregar a calculadora de simulación de prezos de comedores escolares para realizar o cálculo.

Este formulario téñeno que entregar obrigatoriamente todos os usuarios de comedor. Non é o mesmo documento que se enviou en maio.

Telexornal 2024

Para finalizar o curso, que mellor que un resumo deste ano olímpico realizado polo alumnado de 6º. Que argallarían este ano? Sorpresa, sorpresa...

 

 

Ponte forte,fai deporte

E chegou o noso éxito do verán. Despois dun ano olímpico, tiñamos que rematar ao grande, con música. Así que, dentro vídeo.

 

 

Xogos Olímpicos no Estadio Municipal de Atletismo

Hoxe rematamos o proxecto deste curso no Estadio Municipal de Atletismo de Fontecarmoa.
Tras un desfile inicial, na que ata unha mascota tivemos, todo o alumnado participou en diferentes probas distribuídas segundo as idades: carreiras de velicidade, de obstáculos, de relevos; saltos de lonxitude e altura e lanzamentos de peso, xavelina e martelo. Unha morea de novas experiencias.
Foi unha xornada deportiva fantástica, na que ademais de convivir e coñecer diferentes modalidades deportivas, aprendemos a gañar e perder, pois o importante sempre é pasalo ben e respectar aos demais.

Cal será o proxecto do vindeiro curso? Sabela xa anda cavilando nalgo...

Grazas á Consellería de Deportes e ao persoal que nos facilitou a organización.

Sofía Brea e Carmen Martínez dannos a coñecer a disciplina de doma clásica

No día de hoxe tamén tivemos a derradeira visita dunha deportista. Nesta ocasión a nosa exalumna Sofía Brea Tobío e campioa galega de doma e con numerosos logros no seu palmarés, pese á súa curta idade, veu acompañada do seu cabalo e a tamén exalumna Carmen Martínez Rey, monitora na Hípica Ares.
Entre as dúas explicáronnos unha morea de cousas, como que cada día comen 11kg de comida e beben 25 litros de auga. Sabiades que Sofía precisou 2 anos para compenetrarse co seu compañeiro? A amizade non segure un proceso tan rápido coma nas persoas!
Moitas grazas, Sofía e Carmen. Que gusto dá ver ao noso alumnado conseguindo os seus soños!

 

Visita a Baiona

Un ano máis rematamos o curso cunha xornada de convivencia. Nesta ocasión visitamos a vila de Baiona, onde puidemos pasear polas súas rúas e paseos, visitar a Casa da Navegación e a réplica da Carabela Pinta. 

Finalizamos o día comendo en Chan da Lagoa. Tivemos moita sorte porque a chuvia permitiunos comer e xogar; iso si, sen quitarlle ollo ao ceo. 

Distribuir contido


by Dr. Radut