Cando abrimos un libro abrimos unha fiestra ao mundo, porque grazas a el temos nas nosas mans a ocasión de viaxar, de coñecer, de aprender, de imaxinar e de comprender a realidade que nos rodea.

Durante a infancia, a familia é o principal referente en todos os ámbitos polo que debe selo tamén no exercicio da lectura; por este motivo, este curso iniciamos unha nova actividade de Fomento da Lectura, dentro do Proxecto Lector do Centro. Trátase das “MOCHILAS VIAXEIRAS”, que irán de casa en casa con lecturas para compartir con ilusión pais, fillos, avós... “Se ti les, eles tamén”

Os materiais incluídos están pensados para que sexan do agrado de todos vós e confiamos en poder acadar os obxectivos para os que foi deseñada esta campaña.

Inclúense:   1 CD interactivo, 1 CD de música, 1 libro de literatura para adultos, 1 revista para adultos, 1 revista en inglés, 1 libro de literatura infantil en galego, 1 libro de literatura infantil en castelán, 1 libro de banda deseñada e 1 revista infantil. (A selección irá máis detallada no interior das MOCHILAS)

Como veredes xunto cos materiais mandamos tamen o “CADERNO VIAXEIRO”  para que cada familia aporte as súas impresións e suxerencias sobre a actividade, os materiais, o libro que máis lle gustou... incluso algún debuxo que ilustre unha sensación, un pensamento. En fin, o que queirades (dúas páxinas por neno/a).

Para levar a cabo esta actividade NECESITAMOS QUE NON O VEXADES COMO DEBERES,  senón como un xeito de compartir e gozar cos libros en FAMILIA.

As mochilas entregaranse os mércores e terán que ser devoltas os martes da seguinte semana para pasarllas aos seguintes alumnos/as. Establecerase unha quenda en cada aula e o mestre/a comprobará o bo estado do material cando a mochila sexa entregada. O alumno/a debe coidar estes materiais posto que todos os lectores queren desfrutar do perfecto estado das obras, SON DE TODOS E DE TODAS. CÓIDAOS E RESPONSABILÍZATE!!

            Esperamos a vosa colaboración, convencidos de que o esforzo incidirá moi positivamente na educación dos vosos fillos/as.