Ola, familias!

Un novo vídeo de Camiño á Fama elaborado polos dous sextos de educación primaria o anterior venres, día 2 de xuño. Desta vez coreografían o tema "Don´t you worry". O derradeiro dos derradeiros pois este ano acaban a súa etapa no Ceip Centieiras. Amizades... a seguir bailando e desfrutando da vidaaaaa! Un pracer enorme!!!

Ola, familias!

Deixámosovos por eiquí un nova coreografía de Camiño á Fama que fixemos este pasado venres (26 de maio de 2023). Desta vez tocoulle aos máis pequerrechos/as do colexio e unha vez máis... ARRASARON!!! Bailaron unha canción de "Uxía Lambona e a Banda Molona".

Durante 3 sesións, o alumnado de 5° de Educación Primaria gozou dun obradoiro de resolución de conflitos da man de Andrea Bechlian.

Aprenderon diferentes técnicas e os pasos que hai que seguir para resolver conflitos e o puxeron en práctica. No obradoiro o alumnado foi moi participativo e gozaron das diferentes sesións. Grazas Andrea por todo o que nos ensinaches!

O día 23 de maio o alumnado do centro participou no Correlingua, que consistiu nun paseo desde o peirao de Caranza ata o Auditorio de Ferrol, onde desfrutamos da actuación de Brais da Hortas e Peter Punk, que xuntos forman o grupo As Monchas. Foi un concerto moi divertido, pasámolo xenial bailando e cantando as súas cancións na nosa lingua.

NA CASA, NA ESCOLA, BOTA A LINGUA FÓRA!

ORDE do 10 de maio de 2023  pola que se regula a participación no fondo solidario de libros de texto e se convocan axudas para adquirir libros de texto e material escolar destinadas ao alumnado matriculado en educación primaria, educación secundaria obrigatoria e educación especial en centros docentes sostidos con fondos públicos para o curso escolar 2023/24

PRAZO DE PRESENTACIÓN DE SOLICITUDES: Do 20 de maio ao 21 de xuño do 2023

A PRESENTACIÓN DE SOLICITUDES REALIZARASE PREFERENTEMENTE POR VÍA TELEMÁTICA NO SEGUINTE ENDEREZO (coa chave365):

ENLACE

Opcionalmente, no centro educativo, no horario de atención ás familias: 

Luns - mércores - xoves 9:00-10:30

BENEFICIARIOS: Alumnado de educación primaria matriculado no curso 2022 /2023 en centros sostidos con fondos públicos.

MODALIDADES:

• Participación no fondo solidario de libros de texto : Alumnado de 3º e 4º de educación primaria.

O alumnado de 5º e 6º do noso centro participa no programa EDIXGAL (ordenadores alumnado), polo que non debe participar neste apartado.

• Axudas para adquirir libros de texto en 1ºe 2º de educación primaria; e para adquirir material escolar destinadas ao alumnado matriculado en educación primaria de 1º a 6º e educación especial.  

DOCUMENTACIÓN A PRESENTAR:

• Solicitude segundo o Anexo I.
• Anexo II (comprobación de datos dos membros computables da unidade familiar).
• Copia do libro de familia ou documento equivalente onde figuren o alumno e os demais membros computables da unidade familiar. En caso de separación ou divorcio, ademais deberán achegar a sentenza xudicial de separación ou divorcio e/ou convenio regulador onde conste a custodia do menor.

Excepcionalmente, poderase acreditar o número de membros computables utilizando algún dos seguintes medios:

• Certificado ou volante de convivencia.
• Informe dos servizos sociais ou do órgano equivalente do concello onde resida a familia.
• Certificado de discapacidade do/da alumno/a ou de calquera membro da familia non expedido pola Administración autonómica.
• Documentación xustificativa da situación de violencia de xénero no ámbito familiar.
• Resolución xudicial de incapacitación con patria potestade prorrogada ou rehabilitada.
• Resolución administrativa ou xudicial acreditativa da situación de acollemento ou certificado do centro de menores, para alumnado en situación de tutela ou garda da Xunta de Galicia.
• Certificado de convivencia, volante de convivencia ou informe dos servizos sociais ou do órgano equivalente do concello onde resida a familia, no caso de que o pai ou a nai ou o/a titor/a ou titores/as carezan de DNI ou NIE.

Comprobación de datos . 

Os documentos relacionados serán obxecto de consulta ás administracións públicas. No caso de que as persoas interesadas se opoñan a esta consulta, deberán indicalo no recadro correspondente do Anexo I e achegar unha copia dos documentos.

• DNI ou NIE da persoa solicitante.
• DNI ou NIE da persoa representante.

Marque o recadro correspondente no Anexo I para sinalar as circunstancias que lle sexa de aplicación : 

• Certificado de discapacidade expedido pola Administración autonómica.
• Percepción de pensión por incapacidade permanente total, absoluta ou grande invalidez ou equivalente de clase pasivas.

Consentimento para a comprobación de datos . 

A persoa interesada autoriza a consulta a outras administracións públicas dos seguintes datos. De non autorizar a consulta, deberá achegar o documento correspondente: 

• Declaración do imposto sobre a renda das persoas físicas ou certificado tributario de imputacións do exercicio 2021.

Ola, familias!

Envíovos información que me pasaron sobre o campamento de verán que organiza a escola de tenis "JUSTO AL REVÉS". Desexo que sexa do voso interese.

Apertas varias.

Abel

O día 16 de maio celebramos na escola a festa dos Maios e o Día das Letras Galegas.

Tivemos a sorte de contar coa axuda dunha chea de familias moi implicadas en todas as actividades que se propoñen desde a escola, así da gusto! Estiveron traballando arreo desde ben cedo para axudarnos a confeccionar os nosos tres maios. Mirade que ben acompañadas e acompañados estivemos nesa xornada:

Traballamos moito e tamén desfrutamos xuntas e xuntos. Ao final, entre todas e todos creamos tres maios preciosos e cheos de cor que levamos para a pista de area da escola para continuar alí coa celebración.

Tamén decoramos o patio con bandeiras de Galicia e cos carteis informativos sobre a vida e obra de Francisco Fernández del Riego, don Paco, o autor homenaxeado este ano nas Letras Galegas. Ademais, o equipo artístico da ANPA sorprendeunos unha vez máis co seu fantástico traballo creando un precioso mural de Fernández del Riego.

Xa na pista, o alumnado agasallou ás familias asistentes cuns bailes arredor dos maios. Primeiro foi a quenda do alumnado de infantil, que bailou "Indo Eu" e, a continuación, o alumnado de primaria bailou a Muiñeira de Lugo. Pechamos a festa coa canción "Seresín, Seresán", que cantou todo o alumnado da escola xunto.

Foi unha xornada preciosa, festexando a primavera e a nosa literatura!

Desde o Equipo de Dinamización da Lingua Galega queremos dar as

grazas a todas as familias que se implicaron e colaboraron con nós,

facendo este día tan bonito e especial.

Que vivan os Maios e as Letras Galegas!!!

Ola, familias!

Este pasado venres, 12 de maio de 2023, levouse a cabo unha nova coreografía de CAMIÑO Á FAMA. Desta vez tocoulle ao grupo dos maiores de educación infantil  e que o vindeiro ano estrearanse na educación primaria. Como non podía ser doutro xeito, fixérono xenial! Non mo creedes? Ollade, ollade...

A pasada semana levamos  a cabo unhas sesións  ao redor do deporte do tenis. Isto é debido, entre outras cousas, ao acollemento ao comezo do curso dun programa educativo que promove a FGT (Federación Galega de Tenis) chamado, "Tenis na escola". Ceden temporalmente  material deportivo,  raquetas e pelotas, para poñer en práctica unhas sesións e dar a coñecer e promover este deporte entre o alumnado. Xa levamos catro anos acolléndonos a el, e coma os últimos anos, tivémola ocasión de que viñera a impartir as clases de xeito voluntario  o noso veciño, Justo, entrenador e fundador da Escola de Tenis, JUSTO AL REVÉS.

Moitísimas grazas polo teu interese e pola túa sabiduría.  Esperámoste para o vindeiro curso.

Mañá, día 16 de maio, estaremos festexando na escola os Maios, para o que crearemos tres maios coa colaboración de alumnado profesorado e familias. Remataremos a celebración cantando e bailando xuntas e xuntos.

Ademais, ao longo de toda a mañá, conmemoraremos as Letras Galegas e homenaxearemos ao autor Francisco Fernández del Riego. Aproveitamos para deixarvos por aquí este Genial.ly con enlaces a un montón de contidos e actividades sobre Don Paco. Esperamos que as desfrutedes!

E, lembrade, agardámosvos mañá na escola vestidas e vestidos para a ocasión, con camiseta de Centieiras ou outra parte de arriba branca, pantalón vaqueiro e sombreiro de flores. Ata mañá!

Ola, alumnado e familias!

Infórmovos da celebración da viséxima oitava edición da Milla Escolar organizada polo concello de Fene e que terá lugar o vindeiro domingo, día 14 de maio de 2023. As distancias a percorrer varían segundo as idades dos participantes pero oscilan entre os 50 metros e os 900 metros. 

A realización da mesma virá marcada polo tempo atmosférico previsto para esa data. No caso de ser bo levarase a cabo na Avda do Mar de San Valentín, e no caso contrario, no interior do pavillón polideportivo da Xunqueira, en San Valentín.

O desenvolvemento da xornada comezará aí das 11:00 horas e calcúlase que teña unha duración aproximada de hora e media, polo que remataría ao redor das 12:30 horas remataría. Comezarase coas carreiras das categorías máis superiores (cadetes) e rematando pola máis pequecha, categoría de Prebiberón 1.

Os participantes das categorías máis baixas (Educación Infantil: 3 anos - Prebiberón 1; 4 anos - Prebiberón 2; 5 anos - Biberón) sairán en quendas de 10 - 12 persoas para evitar aglomeracións e posibles caídas. Nestas categorías non haberá trofeos pero sí medalla para tódolos participantes. 

Ao remate de cada proba terá lugar a entrega de medallas a tódolos participantes e unha vez finalizadas todas as carreiras, entregaranse os trofeos aos tres primeiros clasificados de cada categoría, agás, como comentei anteriormente, as categorías pertencentes a Educación Infantil (Prebiberón 1, Prebiberón 2 e Biberón).

Diferenciaranse as categorías por anos de nacemento e aulas, así como por xénero masculino e feminino.

No caso de organizar as carreiras na Avda do Mar, adaptarase a saída de cada categoría á lonxitude da recta en franxas de 50 - 100 - 150 metros.

No caso de organizarse no interior do pavillón da Xunqueira, realizarase un circuíto en redondo de aproximadamente 125 metros, no que o percorrido determinarase por voltas.

• INSCRICIÓNS!!! 

a) EMAIL: cultura.deportes@fene.gal ou mercedes.justo@fene.gal

b) CONCELLO: Departamento de Cultura e Deportes (Prazo máximo de entrega ata as 13:00 horas do 10/05/2023).

c) MESMO DÍA DA CARREIRA: só se recollerán inscricións de última hora o mesmo día da carreira de 9:30h a 10:30h. 

Para calquera dúbida podedes chamar aos seguintes números de teléfonos: 607 615 962 // 981 340 366 

• RECOLLIDA DE DORSAIS

Os centros de ensino poderemos recoller os dorsais para posteriormente repartirllos ao alumnado para a celebración da carreira.

•  CATEGORÍAS

ALEVÍN: 5º e 6º EP. Nados en 2011 e 2012.

BENXAMÍN: 3º e 4º EP. Nados en 2013 e 2014.

PREBENXAMÍN: 1º e 2º EP. Nados en 2015 e 2016.

BIBERÓN: Infantil 5 anos. Nados no 2017.

PREBIBERÓN 2: Infantil 4 anos. Nados no 2018.

PREBIBERÓN 1: Infantil 3 anos. Nados no 2019.

Anímovos a que os rapaces e rapazas participen pois non deixa de ser unha verdadeira festa do deporte. Un xeito máis de que collan moitos valores positivos que transmite o deporte e que claramente nos axuda a ser millores persoas.

Todos aqueles que estedes interesados podedes comunicarllo directamente aos titores/as dos vosos fillos/as. Xa me informarán dos interesados/as e posteriormente xa cubro as follas de inscricións. (Agora facede caso da nota física que vos enviei no caso de anotarvos eu persoalmente). 

Desexo de corazón que sexa do voso interese.

Abel

Ola, familias!

Presentámosvos unha nova edición de CAMIÑO Á FAMA que realizamos este pasado venres, 5 de maio de 2023. Desta vez tocoulle aos pequenos e pequenas de 5º de educación infantil versionando un tema moi coñecido de Sebastian Yatra (Tacones Rojos). Un puro espectáculo destes/as artistas!!!

Hoxe venres, 5 de maio de 2023, tivemos a ocasión de desfrutar dunha visita teórico - práctica por parte do Clube de Atletismo Ría Ferrol. Formaban parte da expedición, ademais de dúas directivas máis un entrenador, a atleta da comarca, Campiona de España e internacional Sub-20, Diaou Diallo, na súa especialidade o triple salto.

Explicáronlle ao alumnado de sexto de educación primaria a importancia do deporte como medio do fomento da actividade física saudable, como medio de socialización e cohesión social e como ferramenta para a loita pola tolerancia, a igualdade e a non violencia de xénero no só no deporte, senón tamén na vida.

Posteriormente puxeron en práctica diversos xogos e actividades enfocadas cara a práctica de diferentes disciplinas ao redor do atletismo.

O alumnado quedou moi satisfeito coa xornada desenvolvida e invitáronnos a pór en práctica este deporte nas súas instalacións deportivas. A continuación sacáronse fotos e solicitáronlle autógrafos á verdadeira protagonista da xornada, Diaou Diallo.

Queremos agradecer ao Clube Ría de Ferrol a súa visita emplazándoos a volver a vernos en vindeiras ocasións.

Co bullying, tolerancia cero. Así nolo conta e explica o alumnado de 6ºEP como proxecto da materia de valores sociais e cívicos.

No Día Internacional Contra o Acoso Escolar, berramos ben alto STOP AO BULLYING. Non te cales, cóntao.

O xoves 27 de abril o alumnado de 3º EP, xunto co de 1º EP, acudiu a Radio Fene, gravar o programa "Crónicas de Centieiras" correspondente a este mes.

Deixámosvos o enlace para que o escoitedes, asi como algunhas fotos dos nenos e das nenas dentro do local de gravación, e agardando nas escaleiras a súa entrada para gravar.

http://173.255.131.18/audio/270423CRONICAS.mp3