Presentación | Horarios | Oferta educativa | Secretaría | Contacto
Infantil
Érase unha vez...
Érase unha vez un lugar especial. Moi especial... Era un lugar marabilloso no que as nenas e os nenos atopaban a maxia de ser e de vivir. Que lugar cheo de soños !!!!!...e de ciencia e de experiencias, de risas e de coñecementos. De choros e de apertas, de enfados, de amores, de alicerces... Era un lugar de mancharse co barro e bailar baixo a chuvia, de pintar e cantar, de bailar e xogar. Un lugar cálido e fermoso no que nenos e nenas observan, tocan, discuten, falan, crean. Aprenden e ensinan. Onde cada día é novo e diferente e que mostra todos os camiños para crecer e para percorrer a vida. Un lugar que acolle e ofrece oportunidades. Onde caben todas, todos, coas súas diferenzas e as súas peculiaridades, con moita alegría e unha pizca de travesura. Un lugar que xera enerxía e benestar. Ese lugar é o noso lugar, onde queremos estar e compartir. Ese lugar está en Fene, é a nosa escola. O colexio Centieiras. |
DESFRUTAMOS DO NOSO PATIO
Chega a primavera e con ela o desfrute do noso patio: as merendas ao aire libre, os xogos no campo e o estreno da parede musical e da goma de equilibrios.
Que ben o pasamos!
Cultivamos o noso horto
Estas últimas semanas estivemos traballando no noso horto para comezar a plantar as primeiras colleitas: cebolas e leitugas. As primeiras parece que xa empezan a asomar así que iremos vendo como medran.
Todo isto queremos enmarcalo no noso proxecto Pegadas Verdes, relacionado co coidado do medio ambiente e a sostenibilidade. É por isto que non só nos dispuxemos a plantar, como unha forma de obter alimentos saudables de xeito sostible e tendo en conta as características da nosa zona xeográfica e as necesidades das plantas, senón que tamén aproveitamos obxectos reciclados, como as botellas de plástico, para crear unhas condicións óptimas para o crecemento das plantas e como medida de protección ante algunhas visitas, como as dos caracois, sen facerlles ningún dano.
Queremos agradecer infinitamente ás familias por axudarnos e colaborar con nós.
Veremos cal é o resultado, vos iremos contando!
AMBIENTE DE NATUREZA:ABRIL I
Para estas semanas as propostas seguiron traballando moito a motricidade fina,a creatividade,o conteo e a investigación sen esquecer a vida práctica que é moi importante.Adoitan responsabilidades nas diferentes actividades e adquiren conceptos matemáticos .
-Vida práctica :pelar e lavar patacas
-Trasvase de líquidos.
-Motricidade fina con argollas encaixables.
-Taller de arranxos:abrimos un ordenador e investigamos.
-Taller de carpintería co torno e a polea.
-Reto Lego:creamos un portalapis.
-Plantilla de orientación espacial para trasladar.
-Conteo de números e asociación coa grafía .
-Caixa de perlas Montessori.
-Popit para buscar e marcar números dados.
-Pezas imantadas:creamos un castelo
-Mesa de area:tubos de goma.
-Manipulación con precisión do pincel e a cola para crear cadros de boliñas de papel pinocho.
-Minimundo:obras con excavadoras, camións,pedriñas e area.
A AUGA É UN TESOURO
Con motivo do PDI sobre sostenibilidade e coidado do medio ambiente, en Educación Infantil estivemos a traballar un aspecto moi importante: o aforro e coidado da auga, un ben que cada vez é máis escaso.
Por este motivo, decidimos levar a cabo un decálogo de boas prácticas sobre o que fomos aprendendo ao longo deste trimestre sobre o consumo responsable de auga co fin de garantir que o seu uso sexa adecuado e evitar a seca, un problema que medra día a día.