Saltar navegación.


Presentación   |   Horarios   |   Oferta educativa   |   Secretaría   |   Contacto

8 de marzo: Miramos o mundo a través dos lentes violetas.

Hoxe, día 8 de marzo, conmemórase o Día da Muller e na escola fixemos unhas gafas violetas para que, a través dos seus lentes, poidamos ver un mundo no que existe unha igualdade real entre homes e mulleres. Isto é o que se pretende transmitir ao alumnado e no que se incide nas nosas aulas cada día e tamén o que se fomenta coas actividades organizadas desde o programa IguálaT.

  

As rapazas e rapaces de quinto e sexto de primaria fixeron debuxos e traballos sobre esta data e hoxe, durante o acto conmemorativo, as nenas e nenos de sexto leron os seus traballos para todas e todos os que formamos parte da escola.

Miremos sempre o mundo a través dos lentes violetas!

O alumnado de terceiro ciclo asiste á obra What Monster!

O alumnado de 5º e 6º de primaria realizou unha saída para ver unha obra de teatro en inglés. Foi moi divertida e as nosas rapazas e rapaces demostraron as súas dotes como actrices e actores e o seu dominio da lingua inglesa. Look!

 

 

 

CAMIÑO Á FAMA 4ºEI

Ola rapazada, ola familias!

Desta vez ensinámosvos o baile desenvolvido o venres pasado por parte do alumnado de 4º de educación infantil, os máis pequerrechos/as do colexio, polo que se cabe cobra todavía máis mérito. Estiveron algo tímidos pero dentro da súa lóxica fixérono XENIAL!!! Interpretaron a canción titulada... "O pitiño amareliño".

Aí vos vai!

 

VISITA DE ANDREA MACEIRAS

VISITA DE ANDREA MACEIRAS 

O pasado 28 de febreiro veu ao cole Andrea Maceiras autora do libro "Alma de elefante" que limos o alumnado de 3º e 4º EP.

Antes de comezar  fixémoslle entrega dun pequeno agasallo preparado por todos nós: un elefante de "fieltro" e un libro cun pequeno texto e debuxos feitos por nós sobre o libro.

                                                          

Logo pasou a explicarnos as "orixes" do libro cunha presentación dinámica: a historia naceu a partir dunha viaxe que ela fixo por Asia e está dedicada ao neno ou á nena que perdeu un debuxo e que ela atopou preto de Banteay Srei (templo de Angkor, en Camboia). Cando o visitou había un grupo de nenos e nenas correndo polos arredores, alí foi onde atopou unha pequena folla cun debuxo no que aparecía a imaxe do que ela estaba a ver dende o mirador.

                                 

Despois da explicación pediunos que pecharamos os ollos, que  nos relaxaramos e nos viramos sendo auga, terra, aire ou pedra... Unha vez relaxados, leunos con voz mainiña un relato da velliña Champey no que nos pedía que imaxinaramos de que animal tiñamos a nosa alma, coma Suy que tiña alma de bolboreta e Lawen que tiña alma de elefante.

Conseguiu a nosa relaxación e, pouco a pouco, cada un de nós foi dicindo de que animal era a nosa alma: peixe laranxa, puma, serpe... Non vos podedes imaxinar a cantidade de animais que eran as nosas almas!!!

                                 

Respondeu a todas as nosas preguntas e escoitou moi atenta as interpretacións que iamos facendo sobre uen pensabamos que eran Suy e Lawen partindo do debux da cuberta do libro.

Para rematar  asinou os nosos libros facéndoos únicos co noso nome e o da alma do animal que cada un de nós imaxinou.

            

             

 Sóubonos a pouco o tempo que estivemos con ela.

Grazas Andrea Maceiras por compartir con nós un anaquiño do teu tempo.

       

 

Crónicas de Centieiras - Febreiro 2023

Xa temos o seguinte episodio do programa que facemos grazas ós compañeiros e compañeiras de Radio Fene. O alumnado de 6ºA xunto co alumnado de 5ºEI foron onte á radio e aquí tedes o resultado. Podedes escoitalo facendo click no arquivo adxunto!

DIA DE ROSALIA

Celebramos o día de Rosalía cun fotomosaico, creando a imaxe de Rosalía a partir de cada un/unha de nós.

E ademáis, saimos ás prazas do noso Concello para recitar poemas.

O ENTROIDO DE CENTIEIRAS!!!

Ola rapazada, ola familias!

Un ano máis volta o Entroido ao noso colexio e como non somos de pouca troula... festexámolo a tope!!!

Por aquí deixámosvos un extracto de como fomos disfrazados todos e todas, alumnado e profesorado. Cada ciclo ou cada curso foron do que lles pareceu oportuno, pero todos cunha temática que estamos a traballar no centro este ano, O XOGO. Así atopámonos con MARIO BROS, pezas de LEGO, roles de ELFOS, do xogo de CLUEDO... Despois de facer un pasarrúas ata a Praza do Concello e vir de volta cantando unhas regueifas elaboradas polo alumnado, foi a quenda das merendas nas aulas cos doces típicos do Entroido para posteriormente, desfrutar dun recreo amplo ata a hora de irse para a casiña a desfrutar das vacacións. Picade na imaxe para visualizalas fotos e o vídeo máis abaixo.

Ata a vindeira entroidada!!!

 

 

Día internacional do cancro infantil

Dende Centieiras, queremos lembrarnos dos nenos e nenas que teñen un desafío maior por diante. Por iso hoxe paramos as clases e reunímonos cos nosos panos da cabeza. 

CAMIÑO Á FAMA 5º EI

Ola rapazada, ola familias!

Desta vez é o grupo de 5º de educación infantil os encargados de deleitarnos con esta coreografía tan marabillosa. Para elo empregaron a canción chamada... "O baile da formiga". Puro espectáculo!!! PARABÉNS a todos e todas, ao igual que a súa mestra polo traballo previo realizado.

 

Autorización 2 maio 2023 como día non lectivo

A Xefatura Territorial da Coruña resolveu autorizar como día non lectivo o martes 2 de maio de 2023, polo que este día non haberá clase nin actividades extraescolares. 

Chega o Entroido!

O Entroido está moi preto,

así que pon atención

a todos estes mandados

pola Bruxa Encarnación:

LUNS 13:

O luns, para comezar,

a cabeza engalanada

teremos que levar.

 

MARTES 14:

Martes, con alegría,

en mandil todo o día!

 

MÉRCORES 15:

O mércores é un día moi especial

polo que todos xuntos temos que loitar,

apoiando aos nosos compañeiros

un pano na cabeza todos levaremos.

 

XOVES 16:

O xoves o mandado estará cumprido

cun pixama ben atrevido.

 

VENRES 17:

O venres chegou a festa:

Ao Concello cantando regueifas!

Mentres xogamos, aprendemos,

os nosos disfraces dan proba delo.

CAMIÑO Á FAMA 6 EI

Ola rapazada e familias!

Hoxe presentámosvos a coreografía realizada o venres pasado polo alumnado de sexto de educación infantil versionando o tema de "FAME" de Uxía Lambona e a Banda Molona. Puro espectáculo!!!

Ata a vindeira coreografía...

 

Día da Paz

O 30 de xaneiro celebramos o Día da Paz. Para iso, cociñamos a mellor sopa do mundo para a paz de Centieiras. Por grupos cooperativos, levando a cabo a dinámica de lapis ao centro, preparamos as receitas para botar na pota e así cociñar unha sopa chea de agarimo, axuda e respecto.

 

CAMIÑO Á FAMA 1º EP

Ola, nenos/as e familias!

Deixámosvos un novo vídeo da actividade "Camiño á fama" dentro do programa educativo EduSaúde. Desta vez son o alumnado de 1º de educación primaria os verdadeiros artistas desta actividade que tanto lles gusta.

 

 

 

CRÓNICAS DE CENTIEIRAS

Como cada ano, e este non ía ser menos, comenzamos unha nova tempada de "Crónicas de Centieiras" grazas aos compañeiros e compañeiras de Radio Fene. Desta vez son o alumnado de 5º de EP máis o alumnado de 6º de EI os que se achegaron, o pasado xoves 26 de xaneiro, aos estudos radiofónicos.

Picade no ficheiro adxunto para poder escoitar as cousas tan divertidas e orixinais que nos comentan estes pícaros e pícaras.

Distribuir contido