Skip to Content

CURSO 1ºA 1ºB

LETRAS GALEGAS 2023

Dom, 21/05/2023 - 19:59

SEMANA DAS LETRAS GALEGAS

Durante este mes de maio o alumnado de 1º anda a participar nun concurso de preguntas co gallo de coñecer ao autor homenaxeado polas letras galegas, este ano Francisco Fernández del Riego, e os gañadores terán un agasallo. Ademais, para  despertar o amor pola nosa lingua aprenderon o poema GALICIA de Manuel María e gravárono por equipos na radio da escola, foi a súa primeira experiencia cos micros e gustoulles. Quedou así!

 Tamén o podedes escoitar no canal de podcast IVOOX do CEIP A PEDRA.

 

Tamén se pode escoitar e ver as ilustracións que fixeron os nenos e nenas do poema no seguinte vídeo, hai que clicar na imaxe de Manuel María.

 

VISITA AO MERCADO

Mér, 12/04/2023 - 20:13

O martes 21 de marzo o alumnado de 1º e 2º xunto coas súas mestras visitou o mercado de Bueu. Resultou ser unha visita moi didáctica e interesante porque os nenos e as nenas estiveron en contacto con produtos de cercanía e comprobaron de preto o delicado que é traballar cos alimentos. Os profesionais da praza atenderon moi ben todo o alumnado e lles ensinaron moitas cousas dos produtos que vendían e responderon amablemente as súas preguntas. Aquí quedan algunhas fotos da visita. Dende aquí queremos agradecerlle o seu esforzo e dedicación.

 

  

 

GAMIFICANDO CO LOBO LUPAS

Lun, 10/04/2023 - 20:59

No 2º trimestre, o alumnado de 1º de primaria levou a cabo un proxecto sobre os lobos. E como este curso estamos aprendendo xogando, fixemos unha gamificación guiada polo Lobo Lupas, o protagonista do noso libro de lecturas.

Podedes ver este vídeo que resume o proxecto, premendo na imaxe.

Logo de superar o reto colocámonos para que a profe nos retratara diante do traballo realizado en equipo xunto coa lupa ESPECIAL.

 

CHARLA ILLAS ATLÁNTICAS

Ven, 17/03/2023 - 01:00

Hoxe viñeron á escola dous guías do Parque Nacional Marítimo Terrestre das Illas Atlánticas de Galicia: Suso e Ana.

A xornada foi moi diversa pois comezaron cunha presentación na que nos amosaron As Illas Atlánticas e descubrimos que a nosa Illa de Ons é unha delas! Ao longo da charla, o corvo Martiño, que é un corvo mariño, foinos falando da fauna, flora e o ecosistema deste Parque Nacional. Seguidamente contáronnos un conto sobre a súa vida e rematamos cuns obradoiros para descubrir obxectos de cada lugar da Illa: duna, bosque, rochas...

Foi unha xornada divertida na que, unha vez máis, aprendemos xogando.

Moitas grazas!

OBSERVANDO O TEMPO

Mér, 01/03/2023 - 01:00

No mes de febreiro, tocounos ao alumnado de 1º observar o tempo. Descubrimos que somos unha Meteoescola e que é moi importante que recollamos ben os datos para poderllos enviar a Meteogalicia.

Realizamos moitas actividades relacionadas co tempo, ademais da observación anotabamos diariamente os resultados no panel da Biblioteca, e incluso fixemos unha lectura sobre o nome dos aparellos Meteorolóxicos. Tamén observamos e tratamos de comprender o calendario de luadas de febreiro.

O alumnado comezou a percatarse de que sucedían cousas arredor relacionadas coa meteoroloxía e rapidamente informan as mestras dos achados... Como o día no que as rodas apareceron conxeladas!!!

O que máis nos gustou foi recoller a chuvia, pero tivemos mala sorte pois non choveu apenas... Esperamos que a seguinte vez que volvamos podamos atopar auga no pluviómetro!

UN ENTROIDO DE XOGO

Mar, 28/02/2023 - 22:00

Durante estas últimas semanas vimos preparando o Entroido na escola, esta vez baixo a temática do xogo. Comezamos a semana co Mandadiño, cada día tiñamos que traer algo distinto...O alumnado de 1º elixiu disfrazarse de TRES EN RAIA, pero para non malgastar nada, fixérono con materiais reciclados. Así que trouxeron cartóns e tapóns de botellas da casa e na escola coloreamos os cartóns para facer os taboleiros.

O día do Entroido, as mestras sorprendéronnos coas fichas para xogar. Tres delas eran da cara de Rosalía de Castro e as outras tres da nosa cara. Ademais, veñen pegadas con velcro para que nós podamos xogar con elas. Gustáronnos moito!

Unha vez que estivemos vestidos, fixemos un pequeno pasarrúas ata o cole de Infantil, onde desfilamos ao son de Paco Nogueiras co seu Brinca Vai. Rematou a festa a comparsa Os Mulos, cos que cantamos de viva voz o seu FALEMOS GALEGO (NA RÚA E NA ESCOLA)

Ao chegar de volta á clase compartimos unha merenda chea de doces típicos de Entroido. Comemos filloas, orellas, flores... todos xuntos e gozamos moito das lambetadas e dun rato de xogos entre amigos!

O venres 24 aínda tiñamos ganas de Entroido así que fomos disfrazados á escola e despois do recreo tivemos unha festa todos os cursos de Primaria xuntos na que xogamos e bailamos moito. Foi un Entroido que deu moito xogo!!!

DÍA DA PAZ

Lun, 06/02/2023 - 17:58

O pasado luns 30 de xaneiro celebramos o DÍA ESCOLAR DA PAZ.

Nos días anteriores estivemos traballando nas aulas este tema e fixemos uns propósitos por equipos que despois plasmamos nun pergamino para poñer no mural cooperativo, dentro dunha pomba.

O luns, despois do recreo, xuntámonos no patio dos maiores todo o alumnado do colexio, incluído os peques de infantil.

Unha vez reunidos, saímos por clases a manifestar os nosos propósitos pola Paz e seguidamente cantamos acompañados de lingua de signos as cancións elixidas para esta data:

- Convivindo, de María Fumaça.

- All you need is love, de The Beatles.

Esperamos que pouco a pouco o mundo se convirta nun lugar onde reine a Paz.

REUNIÓN FAMILIAS 2º TRIMESTRE

Mar, 31/01/2023 - 19:44

REUNIÓN FAMILIAS 31/01/2023

Queda aquí nesta presentación a información compartida coas familias esta tarde na escola, para acceder ao contido premede na imaxe. 

NADAL 2022

Dom, 08/01/2023 - 21:33

Para conmemorar o Nadal realizamos na última semana de decembro, antes das vacacións, unha chea de actividades:

Participamos na postal colaborativa da escola para adornar a entrada, fixémoslle unha visita as nosas profes do curso pasado no cole de infantil e tamén nas agasallamos cunha postal que creamos entre todos os nenos e nenas  da clase…

Para rematar, o día 22 fíxemos uns obradoiros nos que participamos moi contentos porque esperabamos a visita dos Reis Magos. Realizamos unha paisaxe de inverno con plastilina na que nos axudaron papás e mamás de 1º e 2º, coa profe Marta coñecemos moitas cousas da lotería e xogamos a probar sorte, con Rosa a profe de lingua de signos aprendemos a signar moitos nomes de xogos e coa profe Marina practicamos un pouco de inglés…

Logo, moi cansos enchemos os bandullos cunha merenda compartida de sobremesas do Nadal, estaban boiiiisimas!

A continuación,  no ximnasio e todos xuntos recibimos cantando panxoliñas as SSMM os Reis Magos que moi agarimosos nos agasallaron con lambetadas.

Así empezaron as vacacións do Nadal!

CONMEMORANDO O 25 DE NOVEMBRO

Mér, 30/11/2022 - 21:48

Para conmemorar o 25 de novembro, o alumnado de 1º decorou a entrada do colexio con lazos morados que representan a melena dunha muller e escribiron dentro do cartel o nome do día que se conmemora: DÍA MUNDIAL DA ELIMINACIÓN DA VIOLENCIA CONTRA A MULLER.

Ademais lemos contos relacionados coa temática, como O LIBRO DOS PORCOS e vimos a película MARUXA.

Esperemos que estes pequenos actos conciencien ao alumnado e sirvan para eliminar definitivamente este tipo de violencia.

Distribuir contido


by Dr. Radut