Un total de 742 docentes de 39 centros de ensino de Galicia participarán este curso 2011/2012 nos plans de autoavaliación e mellora da calidade impulsados pola Consellería de Educación e Ordenación Universitaria, unhas axudas cuxo importe ascende a 125.000 euros.

O obxectivo desta iniciativa convocada pola Consellería é fomentar prácticas de avaliación interna, identificar puntos fortes e débiles do centro e pór en marcha medidas conducentes á súa optimización. A resolución definitiva de centros e profesorado participantes será publicada no Diario Oficial de Galicia (DOG) nos vindeiros días. Dos centros participantes, 17 pertencen á provincia da Coruña, 6 á de Lugo, 5 á de Ourense e 11 á de Pontevedra. O listado pódese consultar no enlace web /portal/plansdeautoavaliacion.

Con esta convocatoria o departamento educativo da Xunta de Galicia reafirma a súa aposta pola cultura da autoavaliación e o establecemento de proxectos propios xestionados de maneira autónoma por cada centro como medio de traballo para a mellora da calidade educativa.

Proceso

Para pór en marcha estes plans os centros identifican primeiro, a través dunha avaliación interna, as áreas de traballo relativas ao desenvolvemento das competencias básicas do alumnado, nomeadamente as competencias en comunicación lingüística, matemática, social e cidadá, cultura e artística, en autonomía e iniciativa persoal, aprender a aprender, no coñecemento e a interacción co mundo físico, e no tratamento da información e competencia dixital.

Tras esta análise cada centro proporá a posta en marcha dun plan de mellora das devanditas competencias contextualizado á realidade observada, que será coordinado por un profesor encargado de dinamizar e impulsar estas accións, servir de interlocutor coa administración educativa e redactar a memoria final do proxecto.

A Consellería de Educación contribúe ao desenvolvemento dos plans con achegas de ata 4.000 euros para cada centro, que conta ademais co asesoramento dos centros de formación e recursos e da inspección educativa.

Cada colexio e instituto recibe un certificado de ter participado no proxecto. Ademais, a efectos de recoñecemento, os plans de autoavaliación considéranse programas de innovación educativa.

Éxito da convocatoria

A convocatoria destes plans é moi ben acollida entre os centros educativos de Galicia, e reuniu un total de 42 solicitudes. Cómpre ademais resaltar que os centros que participaron o ano pasado acadaron un alto grao de satisfacción tras esta experiencia. De feito un dato que o corrobora é que arredor dun 70% dos centros participantes solicitan permanecer nesta iniciativa para o curso seguinte.

A Consellería de Educación e Ordenación Universitaria vén de comunicar que o seu Boletín Informativo convértese en dixital e intégrase no portal educativo.

Cómpre sinalar que desde o primeiro número que o Boletín Informativo editou no presente curso académico xa cambiou de soporte e quedou integrado no Portal Educativo da Consellería, na seguinte dirección web; /portal/boletin. A actualización dos contidos e a incorporación ao Portal melloran a accesibilidade e a facilidade de uso por parte dos usuarios.

Esta nova versión reparte a información en varias seccións: Plans, Programas e Convocatorias, Actividades Formativas, Formación, Lexislación e Enlaces de Interese. Ademais, conta tamén cunha hemeroteca, un Histórico que ofrece as informacións publicadas durante os últimos meses. Por outra banda, mantense a sección fixa de Publicacións da Consellería nun apartado localizado ao final da Portada.

Por último, a súa integración no Portal Educativo permite utilizar o buscador dun xeito máis eficaz, ofrecendo tamén a posibilidade de realizar unha Busca avanzada por criterios de “palabra”, “frase” ou “sección” do sitio web da Consellería.

Este cambio forma parte do proxecto de integración dos Sitios temáticos no Portal Educativo, que irá incorporando paulatinamente os xa existentes e ofrecerá novos espazos de Innovación Educativa, Lexislación e Atención á Diversidade e Orientación.

Deste xeito todos estes sitios web formarán parte da mesma estrutura, mellorando considerablemente a accesibilidade e facilitando a utilización eficaz dos recursos e da información ofrecida á comunidade educativa galega.

A Consellería de Educación e Ordenación Universitaria instalará en vindeiras datas máis de seiscentos equipos de aulas dixitais nos centros educativos galegos. Unha acción que ven derivada dun convenio asinado entre a Consellería, a Secretaría Xeral de Modernización e a entidade Red.es, dependente do Ministerio de Industria.

Dito convenio permitira que se distribúa e instalen máis de seiscentos equipos compostos por un ordenador portátil, un encerado dixital interactivo e proxector, todos eles valorados en 2.600.000 euros. Para o reparto deste equipamento teranse en conta distintas variables, priorizando a aqueles centros de educación infantil e primaria que nestes momentos conten cun menor equipamento das características antes nomeadas e aqueles que asinen contratos programa.

Os destinatarios

Para poder optar a ter estes ordenadores e encerados serán os centros os que deberán solicitar a súa adxudicación. Así a partir da semana do 12 de setembro a Consellería de Educación enviará unha comunicación aos centros, para que os interesados soliciten aqueles equipos que precisen. Na mesma solicitude deberán precisar os usos concretos para os que irán destinados.

Cómpre sinalar que todo o equipamento será instalado no centro educativo no momento da súa entrega, con cargo ao proxecto, polos técnicos e equipos que envían o material aos colexios.

Con esta nova acción a Consellería volve a demostrar o seu interese pola innovación e da un paso máis complementando as distintas accións que xa se están a desenvolver dentro do programa Abalar. Asemade volve a dar conta da súa aposta pola dotación de novas tecnoloxías á escola pública. Compre sinalar que o Abalar continúa este curso incrementando o número de usuarios e chegando a estudantes de 5º e 6º de primaria así como aos de 1º e 2º da ESO, chegando a 77 centros máis que o ano pasado.

Máis de 40.800 estudantes e profesores galegos poderán mellorar as súas competencias en linguas estranxeiras no curso 2011/2012 a través das ensinanzas impartidas nos colexios integrados na Rede Galega de Centros Plurilingües e nas seccións bilingües. Así o explicou o conselleiro de Educación e Ordenación Universitaria, Xesús Vázquez Abad, nunha rolda de prensa na que presentou as novidades relativas a estas dúas liñas de actuación enmarcadas na estratexia de fomento do plurilingüismo que está a desenvolver a Xunta de Galicia, o Plan Galego de Potenciación das Linguas Estranxeiras.

Acompañado polo director xeral de Educación, Formación Profesional e Innovación Educativa, José Luis Mira, o conselleiro salientou a gran acollida que ambas actuacións – centros plurilingües e seccións bilingües- están a ter entre a comunidade educativa galega. Neste sentido destacou que, se ben as previsións para o 2011/2012 eran de chegar aos 100 centros integrados na Rede de Plurilingües e ás 1.600 seccións, o gran éxito das convocatorias fixo que se superaran estas cifras.

Así, o vindeiro curso haberá 110 centros plurilingües, 52 máis que no 2010/2011; e 1.863 seccións bilingües, 344 novas respecto do curso anterior. Así, só a través destas iniciativas, máis de 40.800 estudantes e profesores beneficiaranse dun ensino plurilingüe, o que supón superar as previsións anunciadas inicialmente para o Plan, polas que se estimaba que 40.000 galegas e galegos terían mellorado as súas competencias en outros idiomas ao final da lexislatura.

Centros e seccións

Tal e como explicou Vázquez Abad, o vindeiro curso 7.371 alumnos e 165 profesores participarán a diario das actividades de mellora das competencias en linguas estranxeiras desenvolvidas na Rede Galega de Centros Plurilingües, o que supón un incremento moi significativo respecto dos 2.525 estudantes e 87 docentes que o fixeron o curso pasado.

Ademais, o conselleiro destacou o forte incremento rexistrado no que vai de lexislatura no que toca ás seccións bilingües. “No curso 2011/2012 o número de seccións bilingües nos centros educativos galegos será un 159% superior ás que había ao inicio da lexislatura, ou o que é o mesmo, vimos de multiplicalas case por 2,6”, dixo. Desta forma, a partires de setembro 32.578 estudantes e 748 docentes adquirirán novas competencias en linguas estranxeiras nas 1.863 seccións bilingües que funcionarán nos colexios e institutos da Comunidade Autónoma.

Apoio nativo

Por outra banda Vázquez Abad destacou a incorporación de auxiliares de conversa aos centros que participan no Plan como "unha das medidas mellor valoradas pola comunidade educativa galega". "Por iso- explicou- a Consellería de Educación está a facer un importante esforzo para incrementar este apoio". Así, o vindeiro curso increméntase o número de auxiliares nun 30% respecto do curso anterior,ata chegar aos 339, que desenvolverán o seu labor nos centros plurilingües públicos de Galicia, nas seccións bilingües e nas Escolas Oficiais de Idiomas.

Ademais os centros plurilingües do rural galego volverán ter neste vindeiro ano académico o apoio de 18 mestres xubilados que desempeñan nestes colexios e institutos a función de apoio á aprendizaxe, fundamentalmente, do inglés.

Nesta mesma liña o conselleiro fixo fincapé en dúas novidades para o 2011/2012. Así, anunciou a incorporación de 3 profesores estadounidenses visitantes, que prestarán o seu apoio ao ensino do inglés en centros educativos galegos durante todo o ano académico. “Así mesmo -engadiu- disporemos de 1 profesor de lingua francesa a tempo completo, froito do convenio de colaboración entre a Consellería e a Academie de Amiens”.

“Deste xeito, e tendo en conta os auxiliares, os sénior e as devanditas colaboracións, no curso 2011/2012 serán 361 as persoas nativas que colaboren nos centros de ensino de Galicia para que tanto o alumnado como o profesorado mellore as súas competencias en linguas estranxeiras, un 438 % máis das que había ao inicio da lexislatura”, destacou Vázquez Abad.

Impulso no rural

Ademais da oportunidade que para os centros plurilingües do rural galego supón poder dispoñer do apoio dos mestres sénior nativos, o conselleiro fixo fincapé no importante incremento do programa de Cursos para a formación complementaria da aprendizaxe de linguas estranxeiras (CUALE). Así, no curso 2010/2011 increméntase nun 22,3% o número de alumnas e alumnos atendidos polo CUALE, un programa que ten como obxectivo formar ao alumnado, de forma gratuíta, para que poidan superar as probas para obter a certificación en idiomas outorgada polas Escolas Oficiais de Idiomas.

“A importancia deste programa radica principalmente en que se ofrecen clases preparatorias para a obtención de certificados oficiais a aqueles estudantes que, por vivir en zonas do rural, non teñen un fácil acceso ás Escolas Oficiais de Idiomas”, explicou o conselleiro.

Neste sentido o titular do departamento educativo da Xunta de Galicia destacou entre os principios fundamentais que guían as actuacións do Plan Galego de Potenciación das Linguas Estranxeiras a formación de  todas as galegas e galegos para a mellora das súas competencias en outros idiomas, independentemente do seu lugar de residencia e dos seus recursos económicos.

“Non podemos esquecer que o coñecemento de idiomas é cada vez máis imprescindible para participar na sociedade dos noso días, tanto desde o punto de vista persoal, como do académico e profesional”, lembrou.