A Real Academia de Ciencias Exactas, Físicas e Naturais, en colaboración coa Facultade de Matemáticas da Universidade de Santiago de Compostela, presenta a  Convocatoria 2012 do Proxecto “ESTALMAT- Galicia” para a detección e estímulo do talento en Matemáticas, no ámbito da Comunidade Autónoma de Galicia. O Proxecto ESTALMAT-Galicia, integrado no Proxecto ESTALMAT-España, conta co aval científico da  Real Academia Española de Ciencias Exactas, Físicas e Naturais e co apoio económico da Consellería de Cultura, Educación e Ordenación Universitaria, da Fundación Vodafone-España, do Consello Superior de Investigacións Científicas (CSIC), das Deputacións da Coruña e Lugo e do Concello de Guitiriz.
Este proxecto ten como finalidade o estímulo do talento en Matemáticas en nenos e nenas de Galicia, nacidos en 1999 ou 2000.

Prazo de inscripción: antes das 24 horas do 29 de maio de 2012.

A Secretaría Xeral do Medio Rural e Montes, xunto coa Asociación Sectorial Forestal Galega (ASEFOGA) e coa Asociación Profesional de Selvicultores de Galicia (SILVANUS), puxo en marcha o proxecto Life+ “O Monte Vivo”, que está financiado coa contribución do instrumento financeiro para o medio ambiente LIFE+ da Unión Europea.

Os seus obxectivos son o incremento  do coñecemento dos  valores da nosa riqueza forestal e a modificación dalgúns comportamentos da cidadanía que poñen en risco aquela, co fin de contribuír a unha redución do número de incendios forestais provocados polo ser humano que, por neglixencia ou intención, é a principal causa dos lumes.

Unha das actividades principais que se van desenvolver neste proxecto é unha campaña de sensibilización para escolares sobre os incendios forestais. Con este fin creouse unha páxina web: www.lifeomontevivo.org, que serve como punto de información do público en xeral e como ferramenta de traballo para usar nas aulas por docentes e alumnos.

Ademais, dentro desta campaña, e co fin de incentivar a participación do alumnado, organizarase un concurso de debuxo dirixido a estudantes de educación primaria e outro de relatos dirixido a alumnado de 1º, 2º e 3º da ESO, cuxas bases aparecen na dita páxina web.

O prazo finalizará o 21 de maio de 2012.
 

Coa nova actualización do repositorio de recursos de Abalar alcánzanse os 1006 contidos procedentes, nesta ocasión, dunha selección de premios a contidos dixitais de convocatorias de anos anteriores, traballos de convocatorias PALE na súa fase C de creación de contidos do último ano e anteriores e, sobre todo, de aportacións e suxestións de docentes de toda a Comunidade que, mediante o procedemento aberto de cesión de materiais, fan que este almacén medre mes a mes e responda aos intereses e necesidades de toda a comunidade educativa.

Nesta nova actualización vense de incluír o primeiro contido en lingua alemana, co cal o repositorio filtra na actualidae en seis linguas: galego, castelán, inglés, francés, portugués e alemán.

Novos recursos publicados por orde alfabética:

• A cor e o impresionismo (1º da ESO)
• A cultura da auga (4º de Primaria)
• A miña pequena biografía (6º de Educación Infantil)
• A táboa periódica (1º de Bacharelato)
• Bingo matemático (5º de Primaria)
• Canada Connection (3º da ESO)
• Children of the World (5º de Primaria)
• Citius, altius, fortius (1º de Bacharelato)
• Essen und trinken in Berlin (1º da ESO)
• Eurobingo (4º de Primaria)
• Fractions (1º da ESO)
• Instrumentos da orquestra sinfónica (1º da ESO)
• Maruxa Mallo (6º de Primaria)
• Material de laboratorio de física e química (1º de Bacharelato)
• Mecanismos (castellano) (1º de Bacharelato)
• Mecanismos (galego) (1º de Bacharelato)
• Mechanisms (3º da ESO)
• Mulleres na biblia: Unha análise iconografica da historia da Arte (2º de Bacharelato)
• Músculos (6º de Primaria)
• O mercado (6º de Educación Infantil)
• O peso da túa mochila, ¿É o correcto? (1º da ESO)
• O Sistema Solar (5º de Primaria)
• Opposites (6º de Primaria)
• Ordenar oraciones
• Os Borbón en España (2º da ESO)
• Os froitos secos (4º de Primaria)
• Os instrumentos do Pórtico da Gloria (1º da ESO)
• Piggy´s Birthday (1º de Primaria)
• Poliedros (1º da ESO)
• Polo San Martiño... (5º de Primaria)
• Polygons (3º da ESO)
• Produto cartesiano (3º de Primaria)
• Profesións e oficios (1º de Primaria)
• Proxecto ED@D - Matemáticas 1º ESO (1º da ESO)
• Santiago de Compostela (5º de Primaria)
• Special Dates (6º de Primaria)
• The Entrepreneur: Skills and Attributes (3º da ESO)
• Time out (3º da ESO)
• Transports (3º de Primaria)
• Trivial de geometría (5º de Primaria)
• Vegetables (6º de Primaria)
• Xeometría plana (Tobor X.E.T.2004) (1º da ESO)
• Xogo matemático para o 1º Ciclo de EP (1º de Primaria)
• Zona Euro: unha única moeda (2º da ESO)

Finalmente, aquelas persoas que elaboran material educativo e están interesadas en ceder este material para o seu uso no repositorio de contidos dixitais do espazoAbalar, dispoñen dun procedemento no que se explican os pasos a seguir.(Acceder ao procedemento)

O Instituto Nacional de Tecnoloxías Educativas e de Formación do Profesorado (INTEF) do Ministerio de Educación, Cultura e Deporte ven de recoñecer o traballo da Escola de Educación Infantil de Milladoiro como Boa Práctica 2.0. Este centro estivo a traballar nos últimos anos na introdución das TIC nas aulas de 3, 4 e 5 anos. Como resultado desta práctica pódese consultar un dos seus traballos, Que chega o lobo!, dentro do apartado "Experiencias" do espazoAbalar.

Dentro da área de "Linguaxe Audiovisual e Novas Tecnoloxías" trabállase a imaxe a través dos debuxos e das fotos, e os sons coas palabras e a música. Para iso, consideran imprescindible que o alumnado coñeza o material co que van traballar e se familiaricen co seu uso na medida das súas posibilidades. Previamente, o profesorado prepara unha serie de actividades para que o alumnado poida crear e expresarse coas súas producións audiovisuais.

As expectativas da EEI Milladoiro son continuar fomentando a creatividade do alumnado, abrir novos campos de traballo da imaxe, son e vídeo, e fomentar o traballo cooperativo con outros centros educativos.

O actual Programa de Aprendizaxe Permanente (PAP) rematará en 2013 dando paso a un novo programa, “Erasmus for All”, que está actualmente en proceso de elaboración e debate nas institucións da Unión Europea.
Nese contexto de debate trasládase aos cidadáns a enquisa sobre a viabilidade de establecer mobilidades de longa duración (máis de seis semanas) para o profesorado.

O programa "Centros Educativos polo Comercio Xusto" é unha iniciativa que promove o uso de produtos de comercio xusto en entornos educativos. A participación no proxecto require formar un grupo de traballo co alumnado, profesorado, ANPAS, etc.; escribir un manifesto que recolla o compromiso do centro; promocionar e usar produtos de Comercio Xusto dentro do Centro Educativo (alimentación, papelería) e difundir a práctica do Comercio Xusto (obradoiros, feiras, charlas, vídeo-fórums).

"Centros Educativos polo Comercio Xusto" pertence ao programa europeo Ciudade polo Comercio Xusto e está respaldado pola Axencia Española de Cooperación Internacional para o Desenvolvemento (AECID).

Víctor Abalde Otero, alumno do primeiro curso do CM de soldadura no  CIFP Valentín Paz Andrade de Vigo obtivo a medalla de prata na competición de soldadura da WorldSkills Spain. Este alumno competiu con alumnado de outras seis comunidades autónomas: Aragón, Cantabria, Castela-A Mancha, Valencia, Murcia e Cataluña.

Esta competición foi patrocinada pola empresa Lincoln Electric e celebrouse nas súas instalacións de Barcelona o pasado 27 de abril.

María José González Macía, profesora de soldadura do referido centro,  participou  no xurado de expertos con outros das Comunidades Autónomas participantes.

• Máis información

O programa de bolsas de Formación Profesional de FEUGA está destinado a persoas tituladas en Formación Profesional dos centros públicos galegos de FP.

Este programa busca contribuír a facilitar a inserción profesional destas persoas, mellorando a súa cualificación e o seu desempeño profesional.  Para a execución deste programa cóntase coa directa colaboración dun elevado número de empresas, entidades e institucións privadas e públicas, así como coa colaboración do Servizo Público de Emprego de Galicia (SPEG).

Estas bolsas de Formación Profesional de FEUGA son un instrumento axeitado para favorecer o acceso ao mercado laboral das persoas que acaben de titularse e para completaren a súa formación teórica previa, cunha estadía práctica nun centro de traballo.

De cara ás empresas, estas bolsas constitúen unha ferramenta idónea, xa que poden acceder a profesionais con preparación e sen experiencia profesional, que poden formar durante a estadía na empresa en todos os aspectos propios do seu labor profesional e nun período previo á súa posible contratación.

Para ampliar información sobre o programa de bolsas, pode dirixirse á FEUGA no teléfono 981 534 180, no fax 981 524 351 ou no correo electrónico sdoce@feuga.es.

• Máis información
• Bases da convocatoria

O Encontro Internacional de Educación 2012/2013 é un espazo de diálogo que pretende dar resposta á pregunta: Como debería ser a educación no século XXI?

Serán 18 meses de actividades e obradoiros en rede, de debate e de intercambio de ideas. Ademais, cada dous meses, o Encontro aterrizará presencialmente nunha cidade distinta para presentar as conclusións do debate online. Durante dous anos, visitará até nove cidades de Iberoamérica e cada evento contará con grandes expertos do mundo educativo. Cada dous meses, abordaráse un dos nove temas que alimentarán o debate sobre o presente e o futuro da educación:

• Relacións entre sociedade, educación e traballo. Bos Aires.
• Tecnoloxía e calidade educativa. Santiago de Chile.
• Desenrolo integral da persoa: emocións, sentidos e valores na educación. Medellín.
• Que e como ensinar e aprender na sociedade dixital. Lima.
• O rol do profesor. México DF.
• Como liderar o cambio nos centros educativos. Sao Paulo.
• A familia: socio estratéxico para a educación. Quito.
• A educación permanente:a educación formal, informal e non formal. Caracas.
• Visión e tendencias educativas de futuro. Madrid.

Un exemplo do que se pode atopar neste espazo de encontro e diálogo é o debate síncrono "Da sociedade 1.0 á sociedade 3.0: Escolas 1.0 para formar estudantes 3.0?" no que participaron Anibal de la Torre, Dolors Reig e John Moravec mediante videoconferencia:

Co patrocinio da Comisión Europea os premios anuais MEDEA abren o concurso que recoñece a excelencia no uso dos medios de comunicación para apoiar o aprendizaxe e dedican un premio especial a material educativo que promova o envellecemento activo e a solidariedade entre as xeracións.
En cada edición do concurso inclúese unha serie de premios relacionados con categorías específicas. Este ano 2012, como un compromiso co Ano Europeo do Envellecemento Activo e da Solidariedade Interxeracional, o Comité Organizador dará un premio especial á mellor entrada de medios de comunicación educativa (audio, vídeo, gráficos e animación) que promovan o envellecemento activo e a solidariedade entre as xeracións.
Este premio especial está aberto a profesorado, alumnado, persoal docente, produtores e calquera persoa que teña creado medios de produción educativa que utilicen claramente recursos multimedia para fomentar e promover o envellecemento activo e a solidariedade entre as xeracións. As presentacións poden ser realizadas en castelán, inglés, francés, alemán, italiano e polaco.

A participación é gratuíta e a presentación das participacións é ata o 17 de setembro de 2012.

Todos os finalistas serán invitados a participar na presentación aos medios de comunicación no congreso 2012 en Bruxelas, que terá lugar do 14 ao 15 novembro e inclúe a cerimonia de entrega dos premios Medea.