Non o tivo fácil o xurado que valorou os máis de 60 traballos que elaboraron os 50 centros participantes en Nós tamén creamos!, porque a enorme calidade de todos eles obrigou a deixar sen premio curtametraxes de moitísimo valor. Non o tivo fácil, pero finalmente, e unha vez descartados os 7 traballos que chegaron fóra de prazo, optou por conceder os seguintes premios, tal e como pode verse no documento de resolución da convocatoria:

ALUMNADO DO SEGUNDO CICLO DE EDUCACION INFANTIL
A tartaruga que quería durmir, CPI As Revoltas, Cabana de Bergantiños, A Coruña.

ALUMNADO DO PRIMEIRO CICLO DE EDUCACION PRIMARIA
Lobo feroz, CPI Santa Lucía, Moraña, Pontevedra.

ALUMNADO DO SEGUNDO CICLO DE EDUCACION PRIMARIA
A máscara do león, CEIP Felipe de Castro, Noia, A Coruña.

De acordo coas bases do concurso, o profesorado que elaborou estas curtas será recoñecido con 20 horas de innovación educativa e o seu centro recibirá unha pantalla de plasma de alta definición, un lote de libros de OQOeditora e mais un diploma acreditativo.

A gran calidade dos traballos presentados motivou que a comisión de valoración acordase realizar mencións especiais en cada categoría:

ALUMNADO DO SEGUNDO CICLO DE EDUCACION INFANTIL
Maxia, CEIP Felipe de Castro, Noia, A Coruña, pola súa orixinalidade e calidade estética.

ALUMNADO DO PRIMEIRO CICLO DE EDUCACION PRIMARIA
A vella Lulula, CEE de Vilagarcía de Arousa, Pontevedra, pola calidade creativa, técnica e musical

Un can e un gato, CRA Ponte da Pedra, Carballo, A Coruña, pola calidade estética, axilidade narrativa e expresividade.

ALUMNADO DO SEGUNDO CICLO DE EDUCACION PRIMARIA
A máscara do león, CPI San Benito de Lérez, Pontevedra, pola orixinalidade e calidade estética.

Por outra banda, o xurado acordou recomendarlle á TVG a emisión doutras moitas curtas con calidade abonda, pero que non puideron ser premiadas. Todos os traballos presentados poden verse na sección Nós tamén creamos! da web da CRTVG.

A Secretaría Xeral de Política Lingüística agradece o enorme esforzo e entusiasmo demostrado polo profesorado e polo alumnado participante. 

Nós tamén creamos! é unha iniciativa para os centros de infantil e primaria de Galicia promovida pola Secretaría Xeral de Política Lingüística e a Dirección Xeral de Educación, Formación Profesional e Innovación Educativa en colaboración coa Compañía de Radio-Televisión de Galicia e con OQOeditora.

Para facilitar a elaboración das curtas, ofrecéuselle material, formación e asesoramento ao profesorado.

Os colexios gañadores recibirán un lote de libros de OQOeditora e mais unha pantalla de plasma.

Seleccionáronse  50 centros atendendo aos criterios de data de solicitude, representación equilibrada dos tres ciclos educativos a que se dirixe a convocatoria e distribución territorial.

O V Congreso Mundial de Estilos de Aprendizaxe levarase a cabo os días 27, 28 e 29 de xuño de 2012 en Santander.

Este evento ten a dobre intencionalidade de presentar ás comunidades científica, educativa, empresarial e outras interesadas, os avances dos estudos, investigacións e aplicacións dos Estilos de Aprendizaxe.

O Fondo Galego de Garantía Agraria (FOGGA) convoca axudas para a distribución de froitas frescas ao alumnado de centros educativos de Galicia para o curso 2012/2013.
Por que froita nas escolas?
O alarmante incremento de cifras de obesidade infantil e enfermidades cardiovasculares en adultos levou á Comisión Europea a formular un plan para a promoción de hábitos saudables como o consumo de froita, desde idades temperás.

Quen pode solicitar a axuda?
Os centros escolares de:

1. Educación infantil-segundo ciclo.
2. Educación primaria.
3. Educación secundaria obrigatoria.

En que consiste a axuda?
No pagamento íntegro da froita consumida polo alumnado, mediante a achega económica de 0,25€ por alumno/a e día lectivo.
Que froitas podo solicitar?
Albaricoque, cereixa, chirimoia, ameixa, framboesa, amorodo, amorodo grande, granada, figo, kiwi, mandarina, mazá, pexego, melón, laranxa, néspera, pera, plátano, sandía, uvas.
Onde e como reparto a froita?
A froita distribúese no recreo. O centro pode solicitar de un a catro períodos de reparto. Cada período é de 5 días lectivos consecutivos por mes. Os meses poden ser consecutivos ou non.

Como solicito a participación no Plan?
Só se presentan dous documentos:

• Anexo IIa: Solicitude de autorización.
• Anexo IIb: Solicitude de axuda, na que se indicaran as semanas de reparto e o número de alumnos/as.

Estes dous anexos atópanse na resolución publicada no DOG polo FOGGA ou tamén na páxina web do Plan.
Onde presento a solicitude?
No servizo territorial do FOGGA da provincia onde se atopa o centro escolar, en calquera rexistro administrativo ou por internet (https://sede.xunta.es).
Cando remata o prazo para presentar a solicitude?
No prazo dun mes desde a publicación da resolución no DOG.

Como solicito o pagamento da axuda?
O centro escolar presentará a solicitude de pagamento (anexo IV publicado na corrección da erros da convocatoria) unha vez rematado o período de reparto de froita.
É dicir, se teño autorizado o reparto de froita fresca por catro meses, terei que presentar catro anexos IV, segundo vaian rematando os períodos.
Coa solicitude de pagamento, xúntanse tanto as facturas (orixinal ou copia com-pulsada), como o xustificante do pagamento (xustificante da transferencia, etc).
O prazo para presentar a solicitude de pagamento remata o último día do terceiro mes seguinte ao que se fixo o reparto de froita.
É dicir, se a froita se submistrou ao alumnado a semana do 15 ao 19 de outubro, o prazo para solicitar o pagamento remata o 31 de xaneiro.