Skip to Content

Encontro aberto a toda a comunidade educativa

Xov, 15/02/2024 - 12:04

O venres, 16 de febreiro, o Club de Lectura de adultos organiza un encontro co médico e escritor Héctor Lema.

A xuntanza realizarase ás 17:00 hs na biblioteca escolar, consistirá nun obradoiro de escritura e está aberta a toda a comunidade educativa do IES Pedra da Aguia (membros do club de lectura de adultos, familias, profesorado, veciños...).

Héctor Lema é un profesional da Medicina orixinario da Ponte do Porto, con consulta de odontoloxía en Carballo e apaixonado da literatura. As súas principais novelas son "Placentas: el oro rojo" e "Una vida como la tuya", que é unha homenaxe ao seu pai.

Estades todos convidados así que... non faltedes!

Encontro artístico e literario con Xulia Pisón

Mar, 06/02/2024 - 12:16

O luns, día 5 de febreiro, celebramos o Día da Ilustración cun encontro na Biblio coa autora coruñesa Xulia Pisón.

Ao encontro asistiu o alumnado de 1º da ESO pertencente ao Club de Lectura e tiveron a oportunidade de descubrir os segredos de como foi creado o libro que leron, "Microalgas". 

O obradoiro foi eminentemente práctico e os asistentes usaron os seus lapis e pinturas de cores para aprender unha morea de trucos sobre como se debuxan as personaxes dos cómics e das películas de animación. 

Ademais de achegarse ao mundo da ilustración e da creación artística, o alumnado pasou unha boa mañá na compaña de Xulia Pisón. 

Intensa actividade en Bruxelas

Lun, 05/02/2024 - 14:23

Do 22 ao 28 de xaneiro, 24 alumnos de 3º da ESO tiveron a oportunidade de coñecer de preto dúas institucións comunitarias en Bruxelas (Parlamento e Consello europeo), falar con dúas eurodeputadas, facer obradoiros no Parlamentarium e na Casa da Historia de Europa e visitar a Fundación Galicia-Europa. Ademais, coñeceron o campo de batalla de Waterloo e cidades como Bruxas e Gante.

Máis información  en QPC, A Voz de Galicia, Diario de Bergantiños, O Correo Galego e Radio Nordés (dende o minuto 49.20)

Día da Ilustración

Mar, 30/01/2024 - 12:21

Cada 30 de xaneiro, coincidindo coa data nacemento de Castelao, celebramos o Día da Ilustración.  

Dende a Biblioteca unirémonos a esta conmemoración cun encontro coa ilustradora Xulia Pisón que se celebrará o vindeiro luns, 5 de febreiro.

No encontro, que consistirá nun obradoiro de ilustración, participarán os alumnos e alumnas de 1º e 2º ESO que sexan membros do Club de Lectura, posto que xa leron e coñecen o libro "Microalgas", obra da autora que nos visita.

Xulia Pisón é unha ilustradora e debuxante de cómics coruñesa que ten publicados numerosos libros para público infantil e xuvenil. 

Torneo de xadrez

Mar, 30/01/2024 - 12:06

Xa está convocado o gran torneo de xadrez anual do IES Pedra da Aguia!

Se a túa paixón é este deporte mental e te queres sentir coma un auténtico mestre de xadrez, apúntate XA na ficha de inscrición que está no taboleiro da entrada da Biblio.

Anima as túas amizades e aproveita para facerlle "xaque mate" á rutina e á monotonía. Agardamos por ti!

Concurso de poemas de natureza

Mar, 23/01/2024 - 12:20

A Biblioteca escolar e o equipo de Dinamización Linguística organizan un concurso literario para conmemorar o Día da Poesía e das Árbores, que se celebra o 21 de abril.

Xa podes comezar a escribir o teu poema e entregalo na Biblio, aínda que tes de prazo ata o 29 de febreiro.

O texto ten que tratar sobre a natureza, pode estar escrito en galego ou en castelán e deberá ter unha extensión entre 15 e 25 versos. Aquí podes consultar as bases. 

Haberá dous premios por categoría dotados de 50 e 30 euros. 

Inspírate saíndo ao monte, camiñando pola praia, paseando á beira dun río... Deixa saír ao poeta que levas dentro. E anímate a participar!

 

Distribuir contido


by Dr. Radut