CM Mecanizado Dual

Mar, 22/06/2021 - 11:40 — IES de Valga

Que é a FP dual?

É unha modalidade de formación profesional que ten como finalidade a cualificación profesional das persoas nun réxime de alternancia de actividade laboral nunha empresa coa actividade formativa nun centro educativo. A FP dual integra os tres piares que sustentan o proceso de formación dun profesional: formación curricular (específica do ciclo formativo), traballo na empresa e formación complementaria (específica para os procesos produtivos da empresa), combinando a asistencia do alumnado no centro educativo coa súa formación e o seu traballo na empresa. Os centros e as empresas comparten as responsabilidades formativas para que as ensinanzas profesionais se adecúen ás necesidades do mercado laboral.

Cales son os requisitos para acceder?

Para acceder a esta modalidade de FP é preciso cumprir os requisitos académicos que se requiren para acceder aos ciclos formativos, dispoñibles no enderezo www.edu.xunta.es/fp, na epígrafe “Coñece a FP”, e ademais: Ter dezaoito anos ou máis no ano natural en que comece o ciclo formativo. Carecer da cualificación profesional, obtida e recoñecida polo sistema de formación para o emprego ou do sistema educativo, requirida para concertar un contrato en prácticas para o posto de traballo ou a ocupación obxecto do proxecto. Non ter realizado con anterioridade un contrato de formación e aprendizaxe, e cumprir os requisitos establecidos na normativa laboral vixente para o poder efectuar. Non ter superado ningún módulo profesional do ciclo formativo do proxecto solicitado, agás que fose cursando outro ciclo formativo.

CM MECANIZADO

Que se aprende a facer?

Executar os procesos de mecanizado por arranque de labra, conformando procedementos especiais, preparando e programando as máquinas, operando con elas e verificando o produto obtido conforme ás especificacións de calidade, seguridade e protección ambiental.

Que ámbitos se traballa?

En industrias transformadoras de metais relacionadas cos subsectores de construción de maquinaria e de equipamento mecánico, de material e de equipamento eléctrico, electrónico e óptico, e de material de transporte encadrado no sector industrial.

Que ocupacións de desempeñan?

Torneiro/a, fresador/a, mandrinador/a, axustador/a operario/a de máquinas ferramenta, pulidor/a de metais, afiador/a de ferramentas, operador/a de máquinas para traballar metais, operador/a de máquinas ferramenta, operador/a de robots industriais, traballadores e traballadoras da fabricación de ferramentas, mecánicos/as e axustadores/as, modelistas matriceiros/as e asimilados.

Que posibilidades teño de acceder ao mercado laboral?

Este ciclo foi creado atendendo a demanada de profesionais das empresas da contorna, que precisan de especialistas en mecanizado para manteren e mesmo para aumentaren a súa produción. As posibilidades de conseguires un contrato de traballo ao rematares a túa formación son moi altas.

Módulos profesionais

Código	Módulos 1º curso	Horas totais módulo	FCE¹	FEM²
MP0004	Fabricación por arranque de labra	400	107	293
MP008	Formación e orientación laboral	107	107	0
MP007	Interpretación Gráfica.	133	107	26
MP0001	Procesos de mecanizado	160	107	53
MP0005	Sistemas automatizados	160	107	53
TOTAL		960	535	425

Código	Módulos 2º curso	Horas totais módulo	FCE¹	FEM²
MP0009	Empresa e iniciativa emprendedora	53	53	0
MP0003	Fabricación por abrasión, electroerosión, corte e conformado e por procesos especiais	140	53	87
MP0002	Mecanizado por control numérico	314	106	208
MP006	Metroloxía e ensaios.	123	90	33
TOTAL		630	302	328